(2) අතීතවාරො

(ක) අනුලොමපුග්ගලො

38. (ක) යස්ස දුක්ඛසච්චං උප්පජ්ජිත්ථ තස්ස සමුදයසච්චං උප්පජ්ජිත්ථාති? ආමන්තා.

(ඛ) යස්ස වා පන සමුදයසච්චං උප්පජ්ජිත්ථ තස්ස දුක්ඛසච්චං උප්පජ්ජිත්ථාති? ආමන්තා.

(ක) යස්ස දුක්ඛසච්චං උප්පජ්ජිත්ථ තස්ස මග්ගසච්චං උප්පජ්ජිත්ථාති?

අනභිසමෙතාවීනං තෙසං දුක්ඛසච්චං උප්පජ්ජිත්ථ, නො ච තෙසං මග්ගසච්චං උප්පජ්ජිත්ථ. අභිසමෙතාවීනං තෙසං දුක්ඛසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිත්ථ.

(ඛ) යස්ස වා පන…පෙ… උප්පජ්ජිත්ථාති? ආමන්තා.

39. (ක) යස්ස සමුදයසච්චං උප්පජ්ජිත්ථ තස්ස මග්ගසච්චං උප්පජ්ජිත්ථාති?

අනභිසමෙතාවීනං තෙසං සමුදයසච්චං උප්පජ්ජිත්ථ, නො ච තෙසං මග්ගසච්චං උප්පජ්ජිත්ථ. අභිසමෙතාවීනං තෙසං සමුදයසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිත්ථ.

(ඛ) යස්ස වා පන…පෙ… උප්පජ්ජිත්ථාති? ආමන්තා.

(ඛ) අනුලොමඔකාසො

40. යත්ථ දුක්ඛසච්චං උප්පජ්ජිත්ථ…පෙ….

(යත්ථකම්පි සබ්බත්ථ සදිසං. තන්තිනානාකරණං හෙට්ඨා යත්ථකසදිසං).

(ග) අනුලොමපුග්ගලොකාසා

41. (ක) යස්ස යත්ථ දුක්ඛසච්චං උප්පජ්ජිත්ථ තස්ස තත්ථ සමුදයසච්චං උප්පජ්ජිත්ථාති?

සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ දුක්ඛසච්චං උප්පජ්ජිත්ථ, නො ච තෙසං තත්ථ සමුදයසච්චං උප්පජ්ජිත්ථ. ඉතරෙසං චතුවොකාරානං පඤ්චවොකාරානං තෙසං තත්ථ දුක්ඛසච්චඤ්ච උප්පජ්ජිත්ථ සමුදයසච්චඤ්ච උප්පජ්ජිත්ථ.

(ඛ) යස්ස වා පන යත්ථ…පෙ… උප්පජ්ජිත්ථාති? ආමන්තා.

(ක) යස්ස යත්ථ දුක්ඛසච්චං උප්පජ්ජිත්ථ තස්ස තත්ථ මග්ගසච්චං උප්පජ්ජිත්ථාති?

සුද්ධාවාසානං දුතියෙ චිත්තෙ වත්තමානෙ අනභිසමෙතාවීනං අසඤ්ඤසත්තානං තෙසං තත්ථ දුක්ඛසච්චං උප්පජ්ජිත්ථ, නො ච තෙසං තත්ථ මග්ගසච්චං උප්පජ්ජිත්ථ. අභිසමෙතාවීනං තෙසං තත්ථ දුක්ඛසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිත්ථ.

(ඛ) යස්ස වා පන යත්ථ…පෙ… උප්පජ්ජිත්ථාති? ආමන්තා.

42. (ක) යස්ස යත්ථ සමුදයසච්චං උප්පජ්ජිත්ථ තස්ස තත්ථ මග්ගසච්චං උප්පජ්ජිත්ථාති?

සුද්ධාවාසානං දුතියෙ අකුසලෙ චිත්තෙ වත්තමානෙ අනභිසමෙතාවීනං තෙසං තත්ථ සමුදයසච්චං උප්පජ්ජිත්ථ, නො ච තෙසං තත්ථ මග්ගසච්චං උප්පජ්ජිත්ථ. අභිසමෙතාවීනං තෙසං තත්ථ සමුදයසච්චඤ්ච උප්පජ්ජිත්ථ මග්ගසච්චඤ්ච උප්පජ්ජිත්ථ.

(ඛ) යස්ස වා පන යත්ථ…පෙ… උප්පජ්ජිත්ථාති? ආමන්තා.

(ඝ) පච්චනීකපුග්ගලො

43. (ක) යස්ස දුක්ඛසච්චං නුප්පජ්ජිත්ථ තස්ස සමුදයසච්චං නුප්පජ්ජිත්ථාති? නත්ථි.

(ඛ) යස්ස වා පන…පෙ… නුප්පජ්ජිත්ථාති? නත්ථි.

(ක) යස්ස දුක්ඛසච්චං නුප්පජ්ජිත්ථ තස්ස මග්ගසච්චං නුප්පජ්ජිත්ථාති? නත්ථි.

(ඛ) යස්ස වා පන මග්ගසච්චං නුප්පජ්ජිත්ථ තස්ස දුක්ඛසච්චං නුප්පජ්ජිත්ථාති? උප්පජ්ජිත්ථ.

44. (ක) යස්ස සමුදයසච්චං නුප්පජ්ජිත්ථ තස්ස මග්ගසච්චං නුප්පජ්ජිත්ථාති? නත්ථි.

(ඛ) යස්ස වා පන…පෙ… නුප්පජ්ජිත්ථාති? උප්පජ්ජිත්ථ.

(ඞ) පච්චනීකඔකාසො

45. යත්ථ දුක්ඛසච්චං නුප්පජ්ජිත්ථ…පෙ….

(ච) පච්චනීකපුග්ගලොකාසා

46. (ක) යස්ස යත්ථ දුක්ඛසච්චං නුප්පජ්ජිත්ථ තස්ස තත්ථ සමුදයසච්චං නුප්පජ්ජිත්ථාති? ආමන්තා.

(ඛ) යස්ස වා පන යත්ථ සමුදයසච්චං නුප්පජ්ජිත්ථ තස්ස තත්ථ දුක්ඛසච්චං නුප්පජ්ජිත්ථාති?

සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ සමුදයසච්චං නුප්පජ්ජිත්ථ, නො ච තෙසං තත්ථ දුක්ඛසච්චං නුප්පජ්ජිත්ථ. සුද්ධාවාසං උපපජ්ජන්තානං තෙසං තත්ථ සමුදයසච්චඤ්ච නුප්පජ්ජිත්ථ දුක්ඛසච්චඤ්ච නුප්පජ්ජිත්ථ.

(ක) යස්ස යත්ථ දුක්ඛසච්චං නුප්පජ්ජිත්ථ තස්ස තත්ථ මග්ගසච්චං නුප්පජ්ජිත්ථාති? ආමන්තා.

(ඛ) යස්ස වා පන යත්ථ මග්ගසච්චං නුප්පජ්ජිත්ථ තස්ස තත්ථ දුක්ඛසච්චං නුප්පජ්ජිත්ථාති?

සුද්ධාවාසානං දුතියෙ චිත්තෙ වත්තමානෙ අනභිසමෙතාවීනං අසඤ්ඤසත්තානං තෙසං තත්ථ මග්ගසච්චං නුප්පජ්ජිත්ථ, නො ච තෙසං තත්ථ දුක්ඛසච්චං නුප්පජ්ජිත්ථ. සුද්ධාවාසං උපපජ්ජන්තානං තෙසං තත්ථ මග්ගසච්චඤ්ච නුප්පජ්ජිත්ථ දුක්ඛසච්චඤ්ච නුප්පජ්ජිත්ථ.

47. (ක) යස්ස යත්ථ සමුදයසච්චං නුප්පජ්ජිත්ථ තස්ස තත්ථ මග්ගසච්චං නුප්පජ්ජිත්ථාති? ආමන්තා.

(ඛ) යස්ස වා පන යත්ථ මග්ගසච්චං නුප්පජ්ජිත්ථ තස්ස තත්ථ සමුදයසච්චං නුප්පජ්ජිත්ථාති?

සුද්ධාවාසානං දුතියෙ අකුසලෙ චිත්තෙ වත්තමානෙ අනභිසමෙතාවීනං තෙසං තත්ථ මග්ගසච්චං නුප්පජ්ජිත්ථ, නො ච තෙසං තත්ථ සමුදයසච්චං නුප්පජ්ජිත්ථ. සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ මග්ගසච්චඤ්ච නුප්පජ්ජිත්ථ සමුදයසච්චඤ්ච නුප්පජ්ජිත්ථ.