(3) අනාගතවාරො

(ක) අනුලොමපුග්ගලො

48. (ක) යස්ස දුක්ඛසච්චං උප්පජ්ජිස්සති තස්ස සමුදයසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති තෙසං දුක්ඛසච්චං උප්පජ්ජිස්සති, නො ච තෙසං සමුදයසච්චං උප්පජ්ජිස්සති. ඉතරෙසං තෙසං දුක්ඛසච්චඤ්ච උප්පජ්ජිස්සති සමුදයසච්චඤ්ච උප්පජ්ජිස්සති.

(ඛ) යස්ස වා පන…පෙ…? ආමන්තා.

(ක) යස්ස දුක්ඛසච්චං උප්පජ්ජිස්සති තස්ස මග්ගසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති තෙසං දුක්ඛසච්චං උප්පජ්ජිස්සති, නො ච තෙසං මග්ගසච්චං උප්පජ්ජිස්සති. යස්ස චිත්තස්ස අනන්තරා අග්ගමග්ගං පටිලභිස්සන්ති යෙ චඤ්ඤෙ මග්ගං පටිලභිස්සන්ති තෙසං දුක්ඛසච්චඤ්ච උප්පජ්ජිස්සති මග්ගසච්චඤ්ච උප්පජ්ජිස්සති.

(ඛ) යස්ස වා පන…පෙ… උප්පජ්ජිස්සතීති? ආමන්තා.

49. (ක) යස්ස සමුදයසච්චං උප්පජ්ජිස්සති තස්ස මග්ගසච්චං උප්පජ්ජිස්සතීති?

යෙ පුථුජ්ජනා මග්ගං න පටිලභිස්සන්ති තෙසං සමුදයසච්චං උප්පජ්ජිස්සති, නො ච තෙසං මග්ගසච්චං උප්පජ්ජිස්සති. යෙ මග්ගං පටිලභිස්සන්ති තෙසං සමුදයසච්චඤ්ච උප්පජ්ජිස්සති මග්ගසච්චඤ්ච උප්පජ්ජිස්සති.

(ඛ) යස්ස වා පන මග්ගසච්චං උප්පජ්ජිස්සති තස්ස සමුදයසච්චං උප්පජ්ජිස්සතීති?

යස්ස චිත්තස්ස අනන්තරා අග්ගමග්ගං පටිලභිස්සන්ති තෙසං මග්ගසච්චං උප්පජ්ජිස්සති, නො ච තෙසං සමුදයසච්චං උප්පජ්ජිස්සති. යෙ මග්ගං පටිලභිස්සන්ති තෙසං මග්ගසච්චඤ්ච උප්පජ්ජිස්සති සමුදයසච්චඤ්ච උප්පජ්ජිස්සති.

(ඛ) අනුලොමඔකාසො

50. යත්ථ දුක්ඛසච්චං උප්පජ්ජිස්සති…පෙ….

(ග) අනුලොමපුග්ගලොකාසා

51. (ක) යස්ස යත්ථ දුක්ඛසච්චං උප්පජ්ජිස්සති තස්ස තත්ථ සමුදයසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති අසඤ්ඤසත්තානං තෙසං තත්ථ දුක්ඛසච්චං උප්පජ්ජිස්සති, නො ච තෙසං තත්ථ සමුදයසච්චං උප්පජ්ජිස්සති. ඉතරෙසං චතුවොකාරානං පඤ්චවොකාරානං තෙසං තත්ථ දුක්ඛසච්චඤ්ච උප්පජ්ජිස්සති සමුදයසච්චඤ්ච උප්පජ්ජිස්සති.

(ඛ) යස්ස වා පන යත්ථ සමුදයසච්චං උප්පජ්ජිස්සති…පෙ… උප්පජ්ජිස්සතීති? ආමන්තා.

(ක) යස්ස යත්ථ දුක්ඛසච්චං උප්පජ්ජිස්සති තස්ස තත්ථ මග්ගසච්චං උප්පජ්ජිස්සතීති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති ආපායිකානං අසඤ්ඤසත්තානං තෙසං තත්ථ දුක්ඛසච්චං උප්පජ්ජිස්සති, නො ච තෙසං තත්ථ මග්ගසච්චං උප්පජ්ජිස්සති. යස්ස චිත්තස්ස අනන්තරා අග්ගමග්ගං පටිලභිස්සන්ති, යෙ චඤ්ඤෙ මග්ගං පටිලභිස්සන්ති තෙසං තත්ථ දුක්ඛසච්චඤ්ච උප්පජ්ජිස්සති මග්ගසච්චඤ්ච උප්පජ්ජිස්සති.

(ඛ) යස්ස වා පන යත්ථ මග්ගසච්චං උප්පජ්ජිස්සති තස්ස තත්ථ දුක්ඛසච්චං උප්පජ්ජිස්සතීති? ආමන්තා.

52. (ක) යස්ස යත්ථ සමුදයසච්චං උප්පජ්ජිස්සති තස්ස තත්ථ මග්ගසච්චං උප්පජ්ජිස්සතීති?

ආපායිකානං යෙ ච පුථුජ්ජනා මග්ගං න පටිලභිස්සන්ති තෙසං තත්ථ සමුදයසච්චං උප්පජ්ජිස්සති, නො ච තෙසං තත්ථ මග්ගසච්චං උප්පජ්ජිස්සති. යෙ මග්ගං පටිලභිස්සන්ති තෙසං තත්ථ සමුදයසච්චඤ්ච උප්පජ්ජිස්සති මග්ගසච්චඤ්ච උප්පජ්ජිස්සති.

(ඛ) යස්ස වා පන යත්ථ මග්ගසච්චං උප්පජ්ජිස්සති තස්ස තත්ථ සමුදයසච්චං උප්පජ්ජිස්සතීති?

යස්ස චිත්තස්ස අනන්තරා අග්ගමග්ගං පටිලභිස්සන්ති තෙසං තත්ථ මග්ගසච්චං උප්පජ්ජිස්සති, නො ච තෙසං තත්ථ සමුදයසච්චං උප්පජ්ජිස්සති. යෙ මග්ගං පටිලභිස්සන්ති තෙසං තත්ථ මග්ගසච්චඤ්ච උප්පජ්ජිස්සති සමුදයසච්චඤ්ච උප්පජ්ජිස්සති.

(ඝ) පච්චනීකපුග්ගලො

53. (ක) යස්ස දුක්ඛසච්චං නුප්පජ්ජිස්සති තස්ස සමුදයසච්චං නුප්පජ්ජිස්සතීති? ආමන්තා.

(ඛ) යස්ස වා පන සමුදයසච්චං නුප්පජ්ජිස්සති තස්ස දුක්ඛසච්චං නුප්පජ්ජිස්සතීති?

අග්ගමග්ගසමඞ්ගීනං අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති තෙසං සමුදයසච්චං නුප්පජ්ජිස්සති, නො ච තෙසං දුක්ඛසච්චං නුප්පජ්ජිස්සති. පච්ඡිමචිත්තසමඞ්ගීනං තෙසං සමුදයසච්චඤ්ච නුප්පජ්ජිස්සති දුක්ඛසච්චඤ්ච නුප්පජ්ජිස්සති.

(ක) යස්ස දුක්ඛසච්චං නුප්පජ්ජිස්සති තස්ස මග්ගසච්චං නුප්පජ්ජිස්සතීති? ආමන්තා.

(ඛ) යස්ස වා පන මග්ගසච්චං නුප්පජ්ජිස්සති තස්ස දුක්ඛසච්චං නුප්පජ්ජිස්සතීති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති තෙසං මග්ගසච්චං නුප්පජ්ජිස්සති, නො ච තෙසං දුක්ඛසච්චං නුප්පජ්ජිස්සති. පච්ඡිමචිත්තසමඞ්ගීනං තෙසං මග්ගසච්චඤ්ච නුප්පජ්ජිස්සති දුක්ඛසච්චඤ්ච නුප්පජ්ජිස්සති.

54. (ක) යස්ස සමුදයසච්චං නුප්පජ්ජිස්සති තස්ස මග්ගසච්චං නුප්පජ්ජිස්සතීති?

යස්ස චිත්තස්ස අනන්තරා අග්ගමග්ගං පටිලභිස්සන්ති තෙසං සමුදයසච්චං නුප්පජ්ජිස්සති, නො ච තෙසං මග්ගසච්චං නුප්පජ්ජිස්සති. අග්ගමග්ගසමඞ්ගීනං අරහන්තානං තෙසං සමුදයසච්චඤ්ච නුප්පජ්ජිස්සති මග්ගසච්චඤ්ච නුප්පජ්ජිස්සති.

(ඛ) යස්ස වා පන මග්ගසච්චං නුප්පජ්ජිස්සති තස්ස සමුදයසච්චං නුප්පජ්ජිස්සතීති?

යෙ පුථුජ්ජනා මග්ගං න පටිලභිස්සන්ති තෙසං මග්ගසච්චං නුප්පජ්ජිස්සති, නො ච තෙසං සමුදයසච්චං නුප්පජ්ජිස්සති. අග්ගමග්ගසමඞ්ගීනං අරහන්තානං තෙසං මග්ගසච්චඤ්ච නුප්පජ්ජිස්සති සමුදයසච්චඤ්ච නුප්පජ්ජිස්සති.

(ඞ) පච්චනීකඔකාසො

55. යත්ථ දුක්ඛසච්චං නුප්පජ්ජිස්සති…පෙ….

(ච) පච්චනීකපුග්ගලොකාසා

56. (ක) යස්ස යත්ථ දුක්ඛසච්චං නුප්පජ්ජිස්සති තස්ස තත්ථ සමුදයසච්චං නුප්පජ්ජිස්සතීති? ආමන්තා.

(ඛ) යස්ස වා පන යත්ථ සමුදයසච්චං නුප්පජ්ජිස්සති තස්ස තත්ථ දුක්ඛසච්චං නුප්පජ්ජිස්සතීති?

අග්ගමග්ගසමඞ්ගීනං අරහන්තානං යස්ස චිත්තස්ස අනන්තරා අග්ගමග්ගං පටිලභිස්සන්ති අසඤ්ඤසත්තානං තෙසං තත්ථ සමුදයසච්චං නුප්පජ්ජිස්සති, නො ච තෙසං තත්ථ දුක්ඛසච්චං නුප්පජ්ජිස්සති. පච්ඡිමචිත්තසමඞ්ගීනං තෙසං තත්ථ සමුදයසච්චඤ්ච නුප්පජ්ජිස්සති දුක්ඛසච්චඤ්ච නුප්පජ්ජිස්සති.

(ක) යස්ස යත්ථ දුක්ඛසච්චං නුප්පජ්ජිස්සති තස්ස තත්ථ මග්ගසච්චං නුප්පජ්ජිස්සතීති? ආමන්තා.

(ඛ) යස්ස වා පන යත්ථ මග්ගසච්චං නුප්පජ්ජිස්සති තස්ස තත්ථ දුක්ඛසච්චං නුප්පජ්ජිස්සතීති?

අග්ගමග්ගසමඞ්ගීනං අරහන්තානං යෙ ච පුථුජ්ජනා මග්ගං න පටිලභිස්සන්ති ආපායිකානං අසඤ්ඤසත්තානං තෙසං තත්ථ මග්ගසච්චං නුප්පජ්ජිස්සති, නො ච තෙසං තත්ථ දුක්ඛසච්චං නුප්පජ්ජිස්සති. පච්ඡිමචිත්තසමඞ්ගීනං තෙසං තත්ථ මග්ගසච්චඤ්ච නුප්පජ්ජිස්සති දුක්ඛසච්චඤ්ච නුප්පජ්ජිස්සති.

57. (ක) යස්ස යත්ථ සමුදයසච්චං නුප්පජ්ජිස්සති තස්ස තත්ථ මග්ගසච්චං නුප්පජ්ජිස්සතීති?

යස්ස චිත්තස්ස අනන්තරා අග්ගමග්ගං පටිලභිස්සන්ති තෙසං තත්ථ සමුදයසච්චං නුප්පජ්ජිස්සති, නො ච තෙසං තත්ථ මග්ගසච්චං නුප්පජ්ජිස්සති. අග්ගමග්ගසමඞ්ගීනං අරහන්තානං අසඤ්ඤසත්තානං තෙසං තත්ථ සමුදයසච්චඤ්ච නුප්පජ්ජිස්සති මග්ගසච්චඤ්ච නුප්පජ්ජිස්සති.

(ඛ) යස්ස වා පන යත්ථ මග්ගසච්චං නුප්පජ්ජිස්සති තස්ස තත්ථ සමුදයසච්චං නුප්පජ්ජිස්සතීති?

ආපායිකානං යෙ ච පුථුජ්ජනා මග්ගං න පටිලභිස්සන්ති තෙසං තත්ථ මග්ගසච්චං නුප්පජ්ජිස්සති, නො ච තෙසං තත්ථ සමුදයසච්චං නුප්පජ්ජිස්සති. අග්ගමග්ගසමඞ්ගීනං අරහන්තානං අසඤ්ඤසත්තානං තෙසං තත්ථ මග්ගසච්චඤ්ච නුප්පජ්ජිස්සති සමුදයසච්චඤ්ච නුප්පජ්ජිස්සති.