(1) පච්චුප්පන්නවාරො

(ක) අනුලොමපුග්ගලො

27. (ක) යස්ස දුක්ඛසච්චං උප්පජ්ජති තස්ස සමුදයසච්චං උප්පජ්ජතීති?

සබ්බෙසං උපපජ්ජන්තානං පවත්තෙ තණ්හාවිප්පයුත්තචිත්තස්ස උප්පාදක්ඛණෙ තෙසං දුක්ඛසච්චං උප්පජ්ජති, නො ච තෙසං සමුදයසච්චං උප්පජ්ජති. තණ්හාය උප්පාදක්ඛණෙ තෙසං දුක්ඛසච්චඤ්ච උප්පජ්ජති සමුදයසච්චඤ්ච උප්පජ්ජති.

(ඛ) යස්ස වා පන සමුදයසච්චං උප්පජ්ජති තස්ස දුක්ඛසච්චං උප්පජ්ජතීති? ආමන්තා.

(ක) යස්ස දුක්ඛසච්චං උප්පජ්ජති තස්ස මග්ගසච්චං උප්පජ්ජතීති?

සබ්බෙසං උපපජ්ජන්තානං පවත්තෙ මග්ගවිප්පයුත්තචිත්තස්ස උප්පාදක්ඛණෙ තෙසං දුක්ඛසච්චං උප්පජ්ජති, නො ච තෙසං මග්ගසච්චං උප්පජ්ජති. පඤ්චවොකාරෙ මග්ගස්ස උප්පාදක්ඛණෙ තෙසං දුක්ඛසච්චඤ්ච උප්පජ්ජති මග්ගසච්චඤ්ච උප්පජ්ජති.

(ඛ) යස්ස වා පන මග්ගසච්චං උප්පජ්ජති තස්ස දුක්ඛසච්චං උප්පජ්ජතීති?

අරූපෙ මග්ගස්ස උප්පාදක්ඛණෙ තෙසං මග්ගසච්චං උප්පජ්ජති, නො ච තෙසං දුක්ඛසච්චං උප්පජ්ජති. පඤ්චවොකාරෙ මග්ගස්ස උප්පාදක්ඛණෙ තෙසං මග්ගසච්චඤ්ච උප්පජ්ජති දුක්ඛසච්චඤ්ච උප්පජ්ජති.

28. (ක) යස්ස සමුදයසච්චං උප්පජ්ජති තස්ස මග්ගසච්චං උප්පජ්ජතීති? නො.

(ඛ) යස්ස වා පන මග්ගසච්චං උප්පජ්ජති තස්ස සමුදයසච්චං උප්පජ්ජතීති? නො.

(ඛ) අනුලොමඔකාසො

29. (ක) යත්ථ දුක්ඛසච්චං උප්පජ්ජති තත්ථ සමුදයසච්චං උප්පජ්ජතීති?

අසඤ්ඤසත්තෙ තත්ථ දුක්ඛසච්චං උප්පජ්ජති, නො ච තත්ථ සමුදයසච්චං උප්පජ්ජති. චතුවොකාරෙ පඤ්චවොකාරෙ තත්ථ දුක්ඛසච්චඤ්ච උප්පජ්ජති සමුදයසච්චඤ්ච උප්පජ්ජති.

(ඛ) යත්ථ වා පන…පෙ…? ආමන්තා.

(ක) යත්ථ දුක්ඛසච්චං උප්පජ්ජති තත්ථ මග්ගසච්චං උප්පජ්ජතීති?

අපායෙ අසඤ්ඤසත්තෙ තත්ථ දුක්ඛසච්චං උප්පජ්ජති, නො ච තත්ථ මග්ගසච්චං උප්පජ්ජති. අවසෙසෙ චතුවොකාරෙ පඤ්චවොකාරෙ තත්ථ දුක්ඛසච්චඤ්ච උප්පජ්ජති මග්ගසච්චඤ්ච උප්පජ්ජති.

(ඛ) යත්ථ වා පන මග්ගසච්චං උප්පජ්ජති තත්ථ දුක්ඛසච්චං උප්පජ්ජතීති? ආමන්තා.

30. (ක) යත්ථ සමුදයසච්චං උප්පජ්ජති තත්ථ මග්ගසච්චං උප්පජ්ජතීති?

අපායෙ තත්ථ සමුදයසච්චං උප්පජ්ජති, නො ච තත්ථ මග්ගසච්චං උප්පජ්ජති. අවසෙසෙ චතුවොකාරෙ පඤ්චවොකාරෙ තත්ථ සමුදයසච්චඤ්ච උප්පජ්ජති මග්ගසච්චඤ්ච උප්පජ්ජති.

(ඛ) යත්ථ වා පන…පෙ…? ආමන්තා.

(ග) අනුලොමපුග්ගලොකාසා

31. යස්ස යත්ථ දුක්ඛසච්චං උප්පජ්ජති තස්ස තත්ථ සමුදයසච්චං උප්පජ්ජතීති?…පෙ….

(යස්සකම්පි යස්සයත්ථකම්පි සදිසං විත්ථාරෙතබ්බං).

(ඝ) පච්චනීකපුග්ගලො

32. (ක) යස්ස දුක්ඛසච්චං නුප්පජ්ජති තස්ස සමුදයසච්චං නුප්පජ්ජතීති? ආමන්තා.

(ඛ) යස්ස වා පන සමුදයසච්චං නුප්පජ්ජති තස්ස දුක්ඛසච්චං නුප්පජ්ජතීති?

සබ්බෙසං උපපජ්ජන්තානං පවත්තෙ තණ්හාවිප්පයුත්තචිත්තස්ස උප්පාදක්ඛණෙ තෙසං සමුදයසච්චං නුප්පජ්ජති, නො ච තෙසං දුක්ඛසච්චං නුප්පජ්ජති. සබ්බෙසං චවන්තානං පවත්තෙ චිත්තස්ස භඞ්ගක්ඛණෙ අරූපෙ මග්ගස්ස ච ඵලස්ස ච උප්පාදක්ඛණෙ තෙසං සමුදයසච්චඤ්ච නුප්පජ්ජති දුක්ඛසච්චඤ්ච නුප්පජ්ජති.

(ක) යස්ස දුක්ඛසච්චං නුප්පජ්ජති තස්ස මග්ගසච්චං නුප්පජ්ජතීති?

අරූපෙ මග්ගස්ස උප්පාදක්ඛණෙ තෙසං දුක්ඛසච්චං නුප්පජ්ජති, නො ච තෙසං මග්ගසච්චං නුප්පජ්ජති. සබ්බෙසං චවන්තානං පවත්තෙ චිත්තස්ස භඞ්ගක්ඛණෙ අරූපෙ ඵලස්ස උප්පාදක්ඛණෙ තෙසං දුක්ඛසච්චඤ්ච නුප්පජ්ජති මග්ගසච්චඤ්ච නුප්පජ්ජති.

(ඛ) යස්ස වා පන මග්ගසච්චං නුප්පජ්ජති තස්ස දුක්ඛසච්චං නුප්පජ්ජතීති?

සබ්බෙසං උපපජ්ජන්තානං පවත්තෙ මග්ගවිප්පයුත්තචිත්තස්ස උප්පාදක්ඛණෙ තෙසං මග්ගසච්චං නුප්පජ්ජති, නො ච තෙසං දුක්ඛසච්චං නුප්පජ්ජති. සබ්බෙසං චවන්තානං පවත්තෙ චිත්තස්ස භඞ්ගක්ඛණෙ අරූපෙ ඵලස්ස උප්පාදක්ඛණෙ තෙසං මග්ගසච්චඤ්ච නුප්පජ්ජති දුක්ඛසච්චඤ්ච නුප්පජ්ජති.

33. (ක) යස්ස සමුදයසච්චං නුප්පජ්ජති තස්ස මග්ගසච්චං නුප්පජ්ජතීති?

මග්ගස්ස උප්පාදක්ඛණෙ තෙසං සමුදයසච්චං නුප්පජ්ජති, නො ච තෙසං මග්ගසච්චං නුප්පජ්ජති. සබ්බෙසං චිත්තස්ස භඞ්ගක්ඛණෙ තණ්හාවිප්පයුත්තමග්ගවිප්පයුත්තචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං සමුදයසච්චඤ්ච නුප්පජ්ජති මග්ගසච්චඤ්ච නුප්පජ්ජති.

(ඛ) යස්ස වා පන මග්ගසච්චං නුප්පජ්ජති තස්ස සමුදයසච්චං නුප්පජ්ජතීති?

තණ්හාය උප්පාදක්ඛණෙ තෙසං මග්ගසච්චං නුප්පජ්ජති, නො ච තෙසං සමුදයසච්චං නුප්පජ්ජති. සබ්බෙසං චිත්තස්ස භඞ්ගක්ඛණෙ මග්ගවිප්පයුත්තතණ්හාවිප්පයුත්තචිත්තස්ස [තණ්හාවිප්පයුත්තමග්ගවිප්පයුත්තචිත්තස්ස (සී.) එවං පුග්ගලොකාසෙපි නිරොධවාරෙපි] උප්පාදක්ඛණෙ නිරොධසමාපන්නානං අසඤ්ඤසත්තානං තෙසං මග්ගසච්චඤ්ච නුප්පජ්ජති සමුදයසච්චඤ්ච නුප්පජ්ජති.

(ඞ) පච්චනීකඔකාසො

34. (ක) යත්ථ දුක්ඛසච්චං නුප්පජ්ජති තත්ථ සමුදයසච්චං නුප්පජ්ජතීති? නත්ථි.

(ඛ) යත්ථ වා පන සමුදයසච්චං නුප්පජ්ජති තත්ථ දුක්ඛසච්චං නුප්පජ්ජතීති? උප්පජ්ජති.

(ක) යත්ථ දුක්ඛසච්චං නුප්පජ්ජති තත්ථ මග්ගසච්චං නුප්පජ්ජතීති? නත්ථි.

(ඛ) යත්ථ වා පන මග්ගසච්චං නුප්පජ්ජති තත්ථ දුක්ඛසච්චං නුප්පජ්ජතීති? උප්පජ්ජති.

35. (ක) යත්ථ සමුදයසච්චං නුප්පජ්ජති තත්ථ මග්ගසච්චං නුප්පජ්ජතීති? ආමන්තා.

(ඛ) යත්ථ වා පන මග්ගසච්චං නුප්පජ්ජති තත්ථ සමුදයසච්චං නුප්පජ්ජතීති?

අපායෙ තත්ථ මග්ගසච්චං නුප්පජ්ජති, නො ච තත්ථ සමුදයසච්චං නුප්පජ්ජති. අසඤ්ඤසත්තෙ තත්ථ මග්ගසච්චඤ්ච නුප්පජ්ජති සමුදයසච්චඤ්ච නුප්පජ්ජති.

(ච) පච්චනීකපුග්ගලොකාසා

36. (ක) යස්ස යත්ථ දුක්ඛසච්චං නුප්පජ්ජති තස්ස තත්ථ සමුදයසච්චං නුප්පජ්ජතීති? ආමන්තා.

(ඛ) යස්ස වා පන යත්ථ සමුදයසච්චං නුප්පජ්ජති තස්ස තත්ථ දුක්ඛසච්චං නුප්පජ්ජතීති?

සබ්බෙසං උපපජ්ජන්තානං පවත්තෙ තණ්හාවිප්පයුත්තචිත්තස්ස උප්පාදක්ඛණෙ තෙසං තත්ථ සමුදයසච්චං නුප්පජ්ජති, නො ච තෙසං තත්ථ දුක්ඛසච්චං නුප්පජ්ජති. සබ්බෙසං චවන්තානං පවත්තෙ චිත්තස්ස භඞ්ගක්ඛණෙ අරූපෙ මග්ගස්ස ච ඵලස්ස ච උප්පාදක්ඛණෙ තෙසං තත්ථ සමුදයසච්චඤ්ච නුප්පජ්ජති දුක්ඛසච්චඤ්ච නුප්පජ්ජති.

(ක) යස්ස යත්ථ දුක්ඛසච්චං නුප්පජ්ජති තස්ස තත්ථ මග්ගසච්චං නුප්පජ්ජතීති?

අරූපෙ මග්ගස්ස උප්පාදක්ඛණෙ තෙසං තත්ථ දුක්ඛසච්චං නුප්පජ්ජති, නො ච තෙසං තත්ථ මග්ගසච්චං නුප්පජ්ජති. සබ්බෙසං චවන්තානං පවත්තෙ චිත්තස්ස භඞ්ගක්ඛණෙ අරූපෙ ඵලස්ස උප්පාදක්ඛණෙ තෙසං තත්ථ දුක්ඛසච්චඤ්ච නුප්පජ්ජති මග්ගසච්චඤ්ච නුප්පජ්ජති.

(ඛ) යස්ස වා පන යත්ථ මග්ගසච්චං නුප්පජ්ජති තස්ස තත්ථ දුක්ඛසච්චං නුප්පජ්ජතීති?

සබ්බෙසං උපපජ්ජන්තානං පවත්තෙ මග්ගවිප්පයුත්තචිත්තස්ස උප්පාදක්ඛණෙ තෙසං තත්ථ මග්ගසච්චං නුප්පජ්ජති, නො ච තෙසං තත්ථ දුක්ඛසච්චං නුප්පජ්ජති. සබ්බෙසං චවන්තානං පවත්තෙ චිත්තස්ස භඞ්ගක්ඛණෙ අරූපෙ ඵලස්ස උප්පාදක්ඛණෙ තෙසං තත්ථ මග්ගසච්චඤ්ච නුප්පජ්ජති දුක්ඛසච්චඤ්ච නුප්පජ්ජති.

37. (ක) යස්ස යත්ථ සමුදයසච්චං නුප්පජ්ජති තස්ස තත්ථ මග්ගසච්චං නුප්පජ්ජතීති?

මග්ගස්ස උප්පාදක්ඛණෙ තෙසං තත්ථ සමුදයසච්චං නුප්පජ්ජති, නො ච තෙසං තත්ථ මග්ගසච්චං නුප්පජ්ජති. සබ්බෙසං චිත්තස්ස භඞ්ගක්ඛණෙ තණ්හාවිප්පයුත්තමග්ගවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ සමුදයසච්චඤ්ච නුප්පජ්ජති මග්ගසච්චඤ්ච නුප්පජ්ජති.

(ඛ) යස්ස වා පන යත්ථ මග්ගසච්චං නුප්පජ්ජති තස්ස තත්ථ සමුදයසච්චං නුප්පජ්ජතීති?

තණ්හාය උප්පාදක්ඛණෙ තෙසං තත්ථ මග්ගසච්චං නුප්පජ්ජති, නො ච තෙසං තත්ථ සමුදයසච්චං නුප්පජ්ජති. සබ්බෙසං චිත්තස්ස භඞ්ගක්ඛණෙ මග්ගවිප්පයුත්තතණ්හාවිප්පයුත්තචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ මග්ගසච්චඤ්ච නුප්පජ්ජති සමුදයසච්චඤ්ච නුප්පජ්ජති.