4. සුද්ධධාතුමූලචක්කවාරො

(ක) අනුලොමං

16. (ක) චක්ඛු ධාතූති? ආමන්තා.

(ඛ) ධාතූ සොතධාතූති?

සොතධාතු ධාතු චෙව සොතධාතු ච. අවසෙසා ධාතූ න සොතධාතු.

චක්ඛු ධාතූති? ආමන්තා.

ධාතූ ඝානධාතු…පෙ… ධාතූ ධම්මධාතූති?

ධම්මධාතු ධාතු චෙව ධම්මධාතු ච. අවසෙසා ධාතූ න ධම්මධාතු. (චක්කං බන්ධිතබ්බං).

(ඛ) පච්චනීකං

17. (ක) න චක්ඛු න ධාතූති?

චක්ඛුං ඨපෙත්වා අවසෙසා ධාතූ න චක්ඛුධාතු. චක්ඛුඤ්ච ධාතුඤ්ච ඨපෙත්වා අවසෙසා න චෙව චක්ඛු න ච ධාතු.

(ඛ) න ධාතූ න සොතධාතූති? ආමන්තා.

න චක්ඛු න ධාතූති?

චක්ඛුං ඨපෙත්වා අවසෙසා ධාතූ න චක්ඛු, ධාතු. චක්ඛු ච ධාතුඤ්ච ඨපෙත්වා අවසෙසා න චෙව චක්ඛු න ච ධාතු. න ධාතූ න ඝානධාතු…පෙ… න ධාතූ න ධම්මධාතූති? ආමන්තා.

(ක) න ධම්මො න ධාතූති? ආමන්තා.

(ඛ) න ධාතූ න චක්ඛුධාතූති? ආමන්තා.

න ධම්මො න ධාතූති? ආමන්තා.

න ධාතූ න සොතධාතු…පෙ… න ධාතූ න මනොවිඤ්ඤාණධාතූති? ආමන්තා. (චක්කං බන්ධිතබ්බං).

(යථා ආයතනයමකස්ස පණ්ණත්ති එවං ධාතුයමකස්ස පණ්ණත්ති විත්ථාරෙතබ්බා)

පණ්ණත්තිනිද්දෙසවාරො.