4. පච්චුප්පන්නාතීතවාරො

252. (ක) යො චක්ඛායතනං පරිජානාති සො සොතායතනං පරිජානිත්ථාති? නො.

(ඛ) යො වා පන සොතායතනං පරිජානිත්ථ සො චක්ඛායතනං පරිජානාතීති? නො.

(ක) යො චක්ඛායතනං න පරිජානාති සො සොතායතනං න පරිජානිත්ථාති?

අරහා චක්ඛායතනං න පරිජානාති, නො ච සොතායතනං න පරිජානිත්ථ. අග්ගමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා චක්ඛායතනඤ්ච න පරිජානන්ති සොතායතනඤ්ච න පරිජානිත්ථ.

(ඛ) යො වා පන සොතායතනං න පරිජානිත්ථ සො චක්ඛායතනං න පරිජානාතීති?

අග්ගමග්ගසමඞ්ගී සොතායතනං න පරිජානිත්ථ, නො ච චක්ඛායතනං න පරිජානාති. අග්ගමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා සොතායතනඤ්ච න පරිජානිත්ථ චක්ඛායතනඤ්ච න පරිජානන්ති.