5. පච්චුප්පන්නානාගතවාරො

210. (ක) යො රූපක්ඛන්ධං පරිජානාති සො වෙදනාක්ඛන්ධං පරිජානිස්සතීති? නො.

(ඛ) යො වා පන වෙදනාක්ඛන්ධං පරිජානිස්සති සො රූපක්ඛන්ධං පරිජානාතීති? නො.

(ක) යො රූපක්ඛන්ධං න පරිජානාති සො වෙදනාක්ඛන්ධං න පරිජානිස්සතීති?

යෙ මග්ගං පටිලභිස්සන්ති තෙ රූපක්ඛන්ධං න පරිජානන්ති, නො ච වෙදනාක්ඛන්ධං න පරිජානිස්සන්ති. අරහා යෙ ච පුථුජ්ජනා මග්ගං න පටිලභිස්සන්ති තෙ රූපක්ඛන්ධඤ්ච න පරිජානන්ති වෙදනාක්ඛන්ධඤ්ච න පරිජානිස්සන්ති.

(ඛ) යො වා පන වෙදනාක්ඛන්ධං න පරිජානිස්සති සො රූපක්ඛන්ධං න පරිජානාතීති?

අග්ගමග්ගසමඞ්ගී වෙදනාක්ඛන්ධං න පරිජානිස්සති, නො ච රූපක්ඛන්ධං න පරිජානාති. අරහා යෙ ච පුථුජ්ජනා මග්ගං න පටිලභිස්සන්ති තෙ වෙදනාක්ඛන්ධඤ්ච න පරිජානිස්සන්ති රූපක්ඛන්ධඤ්ච න පරිජානන්ති.