6. අතීතානාගතවාරො

211. (ක) යො රූපක්ඛන්ධං පරිජානිත්ථ සො වෙදනාක්ඛන්ධං පරිජානිස්සතීති? නො.

(ඛ) යො වා පන වෙදනාක්ඛන්ධං පරිජානිස්සති සො රූපක්ඛන්ධං පරිජානිත්ථාති? නො.

(ක) යො රූපක්ඛන්ධං න පරිජානිත්ථ සො වෙදනාක්ඛන්ධං න පරිජානිස්සතීති?

යෙ මග්ගං පටිලභිස්සන්ති තෙ රූපක්ඛන්ධං න පරිජානිත්ථ, නො ච වෙදනාක්ඛන්ධං න පරිජානිස්සන්ති. අග්ගමග්ගසමඞ්ගී යෙ ච පුථුජ්ජනා මග්ගං න පටිලභිස්සන්ති තෙ රූපක්ඛන්ධඤ්ච න පරිජානිත්ථ වෙදනාක්ඛන්ධඤ්ච න පරිජානිස්සන්ති.

(ඛ) යො වා පන වෙදනාක්ඛන්ධං න පරිජානිස්සති සො රූපක්ඛන්ධං න පරිජානිත්ථාති?

අරහා වෙදනාක්ඛන්ධං න පරිජානිස්සති, නො ච රූපක්ඛන්ධං න පරිජානිත්ථ. අග්ගමග්ගසමඞ්ගී යෙ ච පුථුජ්ජනා මග්ගං න පටිලභිස්සන්ති තෙ වෙදනාක්ඛන්ධඤ්ච න පරිජානිස්සන්ති රූපක්ඛන්ධඤ්ච න පරිජානිත්ථ.

පරිඤ්ඤාවාරො.

ඛන්ධයමකපාළි නිට්ඨිතා.

නමො තස්ස භගවතො අරහතො සම්මාසම්බුද්ධස්ස