(1) පච්චුප්පන්නවාරො

(ක) අනුලොමපුග්ගලො

50. (ක) යස්ස රූපක්ඛන්ධො උප්පජ්ජති තස්ස වෙදනාක්ඛන්ධො උප්පජ්ජතීති?

අසඤ්ඤසත්තං උපපජ්ජන්තානං තෙසං රූපක්ඛන්ධො උප්පජ්ජති, නො ච තෙසං වෙදනාක්ඛන්ධො උප්පජ්ජති. පඤ්චවොකාරං උපපජ්ජන්තානං තෙසං රූපක්ඛන්ධො ච උප්පජ්ජති වෙදනාක්ඛන්ධො ච උප්පජ්ජති.

(ඛ) යස්ස වා පන වෙදනාක්ඛන්ධො උප්පජ්ජති තස්ස රූපක්ඛන්ධො උප්පජ්ජතීති?

අරූපං උපපජ්ජන්තානං තෙසං වෙදනාක්ඛන්ධො උප්පජ්ජති, නො ච තෙසං රූපක්ඛන්ධො උප්පජ්ජති. පඤ්චවොකාරං උපපජ්ජන්තානං තෙසං වෙදනාක්ඛන්ධො ච උප්පජ්ජති රූපක්ඛන්ධො ච උප්පජ්ජති.

(ඛ) අනුලොමඔකාසො

51. (ක) යත්ථ රූපක්ඛන්ධො උප්පජ්ජති තත්ථ වෙදනාක්ඛන්ධො උප්පජ්ජතීති?

අසඤ්ඤසත්තෙ තත්ථ රූපක්ඛන්ධො උප්පජ්ජති, නො ච තත්ථ වෙදනාක්ඛන්ධො උප්පජ්ජති. පඤ්චවොකාරෙ තත්ථ රූපක්ඛන්ධො ච උප්පජ්ජති වෙදනාක්ඛන්ධො ච උප්පජ්ජති.

(ඛ) යත්ථ වා පන වෙදනාක්ඛන්ධො උප්පජ්ජති තත්ථ රූපක්ඛන්ධො උප්පජ්ජතීති?

අරූපෙ තත්ථ වෙදනාක්ඛන්ධො උප්පජ්ජති, නො ච තත්ථ රූපක්ඛන්ධො උප්පජ්ජති. පඤ්චවොකාරෙ තත්ථ වෙදනාක්ඛන්ධො ච උප්පජ්ජති රූපක්ඛන්ධො ච උප්පජ්ජති.

(ග) අනුලොමපුග්ගලොකාසා

52. (ක) යස්ස යත්ථ රූපක්ඛන්ධො උප්පජ්ජති තස්ස තත්ථ වෙදනාක්ඛන්ධො උප්පජ්ජතීති?

අසඤ්ඤසත්තං උපපජ්ජන්තානං තෙසං තත්ථ රූපක්ඛන්ධො උප්පජ්ජති, නො ච තෙසං තත්ථ වෙදනාක්ඛන්ධො උප්පජ්ජති. පඤ්චවොකාරං උපපජ්ජන්තානං තෙසං තත්ථ රූපක්ඛන්ධො ච උප්පජ්ජති වෙදනාක්ඛන්ධො ච උප්පජ්ජති.

(ඛ) යස්ස වා පන යත්ථ වෙදනාක්ඛන්ධො උප්පජ්ජති තස්ස තත්ථ රූපක්ඛන්ධො උප්පජ්ජතීති?

අරූපං උපපජ්ජන්තානං තෙසං තත්ථ වෙදනාක්ඛන්ධො උප්පජ්ජති, නො ච තෙසං තත්ථ රූපක්ඛන්ධො උප්පජ්ජති. පඤ්චවොකාරං උපපජ්ජන්තානං තෙසං තත්ථ වෙදනාක්ඛන්ධො ච උප්පජ්ජති රූපක්ඛන්ධො ච උප්පජ්ජති.

(ඝ) පච්චනීකපුග්ගලො

53. (ක) යස්ස රූපක්ඛන්ධො නුප්පජ්ජති තස්ස වෙදනාක්ඛන්ධො නුප්පජ්ජතීති?

අරූපං උපපජ්ජන්තානං තෙසං රූපක්ඛන්ධො නුප්පජ්ජති, නො ච තෙසං වෙදනාක්ඛන්ධො නුප්පජ්ජති. සබ්බෙසං චවන්තානං තෙසං රූපක්ඛන්ධො ච නුප්පජ්ජති වෙදනාක්ඛන්ධො ච නුප්පජ්ජති.

(ඛ) යස්ස වා පන වෙදනාක්ඛන්ධො නුප්පජ්ජති තස්ස රූපක්ඛන්ධො නුප්පජ්ජතීති?

අසඤ්ඤසත්තං උපපජ්ජන්තානං තෙසං වෙදනාක්ඛන්ධො නුප්පජ්ජති, නො ච තෙසං රූපක්ඛන්ධො නුප්පජ්ජති. සබ්බෙසං චවන්තානං තෙසං වෙදනාක්ඛන්ධො ච නුප්පජ්ජති රූපක්ඛන්ධො ච නුප්පජ්ජති.

(ඞ) පච්චනීකඔකාසො

54. (ක) යත්ථ රූපක්ඛන්ධො නුප්පජ්ජති තත්ථ වෙදනාක්ඛන්ධො නුප්පජ්ජතීති? උප්පජ්ජති.

(ඛ) යත්ථ වා පන වෙදනාක්ඛන්ධො නුප්පජ්ජති තත්ථ රූපක්ඛන්ධො නුප්පජ්ජතීති? උප්පජ්ජති.

(ච) පච්චනීකපුග්ගලොකාසා

55. (ක) යස්ස යත්ථ රූපක්ඛන්ධො නුප්පජ්ජති තස්ස තත්ථ වෙදනාක්ඛන්ධො නුප්පජ්ජතීති?

අරූපං උපපජ්ජන්තානං තෙසං තත්ථ රූපක්ඛන්ධො නුප්පජ්ජති, නො ච තෙසං තත්ථ වෙදනාක්ඛන්ධො නුප්පජ්ජති. සබ්බෙසං චවන්තානං තෙසං තත්ථ රූපක්ඛන්ධො ච නුප්පජ්ජති වෙදනාක්ඛන්ධො ච නුප්පජ්ජති.

(ඛ) යස්ස වා පන යත්ථ වෙදනාක්ඛන්ධො නුප්පජ්ජති තස්ස තත්ථ රූපක්ඛන්ධො නුප්පජ්ජතීති?

අසඤ්ඤසත්තං උපපජ්ජන්තානං තෙසං තත්ථ වෙදනාක්ඛන්ධො නුප්පජ්ජති, නො ච තෙසං තත්ථ රූපක්ඛන්ධො නුප්පජ්ජති. සබ්බෙසං චවන්තානං තෙසං තත්ථ වෙදනාක්ඛන්ධො ච නුප්පජ්ජති රූපක්ඛන්ධො ච නුප්පජ්ජති.