(2) අතීතවාරො
(ක) අනුලොමපුග්ගලො
56. (ක) යස්ස රූපක්ඛන්ධො උප්පජ්ජිත්ථ තස්ස වෙදනාක්ඛන්ධො උප්පජ්ජිත්ථාති? ආමන්තා.
(ඛ) යස්ස වා පන වෙදනාක්ඛන්ධො උප්පජ්ජිත්ථ තස්ස රූපක්ඛන්ධො උප්පජ්ජිත්ථාති? ආමන්තා.
(ඛ) අනුලොමඔකාසො
57. (ක) යත්ථ රූපක්ඛන්ධො උප්පජ්ජිත්ථ තත්ථ වෙදනාක්ඛන්ධො උප්පජ්ජිත්ථාති?
අසඤ්ඤසත්තෙ තත්ථ රූපක්ඛන්ධො උප්පජ්ජිත්ථ, නො ච තත්ථ වෙදනාක්ඛන්ධො උප්පජ්ජිත්ථ. පඤ්චවොකාරෙ තත්ථ රූපක්ඛන්ධො ච උප්පජ්ජිත්ථ වෙදනාක්ඛන්ධො ච උප්පජ්ජිත්ථ.
(ඛ) යත්ථ වා පන වෙදනාක්ඛන්ධො උප්පජ්ජිත්ථ තත්ථ රූපක්ඛන්ධො උප්පජ්ජිත්ථාති?
අරූපෙ තත්ථ වෙදනාක්ඛන්ධො උප්පජ්ජිත්ථ, නො ච තත්ථ රූපක්ඛන්ධො උප්පජ්ජිත්ථ. පඤ්චවොකාරෙ තත්ථ වෙදනාක්ඛන්ධො ච උප්පජ්ජිත්ථ රූපක්ඛන්ධො ච උප්පජ්ජිත්ථ.
(ග) අනුලොමපුග්ගලොකාසා
58. (ක) යස්ස යත්ථ රූපක්ඛන්ධො උප්පජ්ජිත්ථ තස්ස තත්ථ වෙදනාක්ඛන්ධො උප්පජ්ජිත්ථාති?
අසඤ්ඤසත්තානං තෙසං තත්ථ රූපක්ඛන්ධො උප්පජ්ජිත්ථ, නො ච තෙසං තත්ථ වෙදනාක්ඛන්ධො උප්පජ්ජිත්ථ. පඤ්චවොකාරානං තෙසං තත්ථ රූපක්ඛන්ධො ච උප්පජ්ජිත්ථ වෙදනාක්ඛන්ධො ච උප්පජ්ජිත්ථ.
(ඛ) යස්ස වා පන යත්ථ වෙදනාක්ඛන්ධො උප්පජ්ජිත්ථ තස්ස තත්ථ රූපක්ඛන්ධො උප්පජ්ජිත්ථාති?
අරූපානං තෙසං තත්ථ වෙදනාක්ඛන්ධො උප්පජ්ජිත්ථ, නො ච තෙසං තත්ථ රූපක්ඛන්ධො උප්පජ්ජිත්ථ. පඤ්චවොකාරානං තෙසං තත්ථ වෙදනාක්ඛන්ධො ච උප්පජ්ජිත්ථ රූපක්ඛන්ධො ච උප්පජ්ජිත්ථ.
(ඝ) පච්චනීකපුග්ගලො
59. (ක) යස්ස රූපක්ඛන්ධො නුප්පජ්ජිත්ථ තස්ස වෙදනාක්ඛන්ධො නුප්පජ්ජිත්ථාති? නත්ථි.
(ඛ) යස්ස වා පන වෙදනාක්ඛන්ධො නුප්පජ්ජිත්ථ තස්ස රූපක්ඛන්ධො නුප්පජ්ජිත්ථාති? නත්ථි.
(ඞ) පච්චනීකඔකාසො
60. (ක) යත්ථ රූපක්ඛන්ධො නුප්පජ්ජිත්ථ තත්ථ වෙදනාක්ඛන්ධො නුප්පජ්ජිත්ථාති? උප්පජ්ජිත්ථ.
(ඛ) යත්ථ වා පන වෙදනාක්ඛන්ධො නුප්පජ්ජිත්ථ තත්ථ රූපක්ඛන්ධො නුප්පජ්ජිත්ථාති? උප්පජ්ජිත්ථ.
(ච) පච්චනීකපුග්ගලොකාසා
61. (ක) යස්ස යත්ථ රූපක්ඛන්ධො නුප්පජ්ජිත්ථ තස්ස තත්ථ වෙදනාක්ඛන්ධො නුප්පජ්ජිත්ථාති?
අරූපානං තෙසං තත්ථ රූපක්ඛන්ධො නුප්පජ්ජිත්ථ, නො ච තෙසං තත්ථ වෙදනාක්ඛන්ධො නුප්පජ්ජිත්ථ. සුද්ධාවාසානං තෙසං තත්ථ රූපක්ඛන්ධො ච නුප්පජ්ජිත්ථ වෙදනාක්ඛන්ධො ච නුප්පජ්ජිත්ථ.
(ක) යස්ස වා පන යත්ථ වෙදනාක්ඛන්ධො නුප්පජ්ජිත්ථ තස්ස තත්ථ රූපක්ඛන්ධො නුප්පජ්ජිත්ථාති?
අසඤ්ඤසත්තානං තෙසං තත්ථ වෙදනාක්ඛන්ධො නුප්පජ්ජිත්ථ, නො ච තෙසං තත්ථ රූපක්ඛන්ධො නුප්පජ්ජිත්ථ. සුද්ධාවාසානං තෙසං තත්ථ වෙදනාක්ඛන්ධො ච නුප්පජ්ජිත්ථ රූපක්ඛන්ධො ච නුප්පජ්ජිත්ථ.