9. නවකනිද්දෙසො

(1) නව ආඝාතවත්ථූනි

960. තත්ථ කතමානි නව ආඝාතවත්ථූනි? ‘‘අනත්ථං මෙ අචරී’’ති ආඝාතො ජායති; ‘‘අනත්ථං මෙ චරතී’’ති ආඝාතො ජායති; ‘‘අනත්ථං මෙ චරිස්සතී’’ති ආඝාතො ජායති; ‘‘පියස්ස මෙ මනාපස්ස අනත්ථං අචරි’’…පෙ… අනත්ථං චරති…පෙ… අනත්ථං චරිස්සතීති ආඝාතො ජායති; අප්පියස්ස මෙ අමනාපස්ස අත්ථං අචරි…පෙ… අත්ථං චරති…පෙ… අත්ථං චරිස්සතීති ආඝාතො ජායති. ඉමානි නව ආඝාතවත්ථූනි.

(2) නව පුරිසමලානි

961. තත්ථ කතමානි නව පුරිසමලානි? කොධො, මක්ඛො, ඉස්සා, මච්ඡරියං, මායා, සාඨෙය්‍යං, මුසාවාදො, පාපිච්ඡතා, මිච්ඡාදිට්ඨි – ඉමානි නව පුරිසමලානි.

(3) නවවිධා මානා

962. තත්ථ කතමෙ නවවිධා මානා? ‘‘සෙය්‍යස්ස සෙය්‍යොහමස්මී’’ති මානො, ‘‘සෙය්‍යස්ස සදිසොහමස්මී’’ති මානො, ‘‘සෙය්‍යස්ස හීනොහමස්මී’’ති මානො, ‘‘සදිසස්ස සෙය්‍යොහමස්මී’’ති මානො, ‘‘සදිසස්ස සදිසොහමස්මී’’ති මානො, ‘‘සදිසස්ස හීනොහමස්මී’’ති මානො, ‘‘හීනස්ස සෙය්‍යොහමස්මී’’ති මානො, ‘‘හීනස්ස සදිසොහමස්මී’’ති මානො, ‘‘හීනස්ස හීනොහමස්මී’’ති මානො – ඉමෙ නවවිධා මානා.

(4) නව තණ්හාමූලකා ධම්මා

963. තත්ථ කතමෙ නව තණ්හාමූලකා ධම්මා? තණ්හං පටිච්ච පරියෙසනා, පරියෙසනං පටිච්ච ලාභො, ලාභං පටිච්ච විනිච්ඡයො, විනිච්ඡයං පටිච්ච ඡන්දරාගො, ඡන්දරාගං පටිච්ච අජ්ඣොසානං, අජ්ඣොසානං පටිච්ච පරිග්ගහො, පරිග්ගහං පටිච්ච මච්ඡරියං, මච්ඡරියං පටිච්ච ආරක්ඛො, ආරක්ඛාධිකරණං දණ්ඩාදාන-සත්ථාදාන-කලහ-විග්ගහවිවාද-තුවංතුවං-පෙසුඤ්ඤ-මුසාවාදා අනෙකෙ පාපකා අකුසලා ධම්මා සම්භවන්ති – ඉමෙ නව තණ්හාමූලකා ධම්මා.

(5) නව ඉඤ්ජිතානි

964. තත්ථ කතමානි නව ඉඤ්ජිතානි? ‘‘අස්මී’’ති ඉඤ්ජිතමෙතං, ‘‘අහමස්මී’’ති ඉඤ්ජිතමෙතං, ‘‘අයමහමස්මී’’ති ඉඤ්ජිතමෙතං ‘‘භවිස්ස’’න්ති ඉඤ්ජිතමෙතං, ‘‘රූපී භවිස්ස’’න්ති ඉඤ්ජිතමෙතං, ‘‘අරූපී භවිස්ස’’න්ති ඉඤ්ජිතමෙතං, ‘‘සඤ්ඤී භවිස්ස’’න්ති ඉඤ්ජිතමෙතං, ‘‘අසඤ්ඤී භවිස්ස’’න්ති ඉඤ්ජිතමෙතං, ‘‘නෙවසඤ්ඤීනාසඤ්ඤී භවිස්ස’’න්ති ඉඤ්ජිතමෙතං – ඉමානි නව ඉඤ්ජිතානි.

(6-9) නව මඤ්ඤිතාදීනි

965. තත්ථ කතමානි නව මඤ්ඤිතානි… නව ඵන්දිතානි… නව පපඤ්චිතානි… නව සඞ්ඛතානි? ‘‘අස්මී’’ති සඞ්ඛතමෙතං, ‘‘අහමස්මී’’ති සඞ්ඛතමෙතං, ‘‘අයමහමස්මී’’ති සඞ්ඛතමෙතං, ‘‘භවිස්ස’’න්ති සඞ්ඛතමෙතං, ‘‘රූපී භවිස්ස’’න්ති සඞ්ඛතමෙතං, ‘‘අරූපී භවිස්ස’’න්ති සඞ්ඛතමෙතං, ‘‘සඤ්ඤී භවිස්ස’’න්ති සඞ්ඛතමෙතං, ‘‘අසඤ්ඤී භවිස්ස’’න්ති සඞ්ඛතමෙතං, ‘‘නෙවසඤ්ඤීනාසඤ්ඤී භවිස්ස’’න්ති සඞ්ඛතමෙතං – ඉමානි නව සඞ්ඛතානි.

නවකං.