5. පඤ්චකනිද්දෙසො

804. (1) තත්ථ කතමො පඤ්චඞ්ගිකො සම්මාසමාධි? පීතිඵරණතා, සුඛඵරණතා, චෙතොඵරණතා, ආලොකඵරණතා, පච්චවෙක්ඛණානිමිත්තං. ද්වීසු ඣානෙසු පඤ්ඤා පීතිඵරණතා. තීසු ඣානෙසු පඤ්ඤා සුඛඵරණතා. පරචිත්තෙ ඤාණං චෙතොඵරණතා. දිබ්බචක්ඛු ආලොකඵරණතා. තම්හා තම්හා සමාධිම්හා වුට්ඨිතස්ස පච්චවෙක්ඛණාඤාණං පච්චවෙක්ඛණානිමිත්තං. අයං වුච්චති පඤ්චඞ්ගිකො සම්මාසමාධි.

(2) තත්ථ කතමො පඤ්චඤාණිකො සම්මාසමාධි? ‘‘අයං සමාධි පච්චුප්පන්නසුඛො චෙව ආයතිඤ්ච සුඛවිපාකො’’ති පච්චත්තඤ්ඤෙව ඤාණං උප්පජ්ජති. ‘‘අයං සමාධි අරියො නිරාමිසො’’ති පච්චත්තඤ්ඤෙව ඤාණං උප්පජ්ජති. ‘‘අයං සමාධි අකාපුරිසසෙවිතො’’ති පච්චත්තඤ්ඤෙව ඤාණං උප්පජ්ජති. ‘‘අයං සමාධි සන්තො පණීතො පටිප්පස්සද්ධලද්ධො එකොදිභාවාධිගතො න සසඞ්ඛාරනිග්ගය්හවාරිතගතො’’ති පච්චත්තඤ්ඤෙව ඤාණං උප්පජ්ජති. සො ඛො පනාහං ඉමං සමාධිං සතො සමාපජ්ජාමි සතො වුට්ඨහාමී’’ති පච්චත්තඤ්ඤෙව ඤාණං උප්පජ්ජති. අයං පඤ්චඤාණිකො සම්මාසමාධි. එවං පඤ්චවිධෙන ඤාණවත්ථු.

පඤ්චකං.