3. පඤ්හාපුච්ඡකං

747. චතස්සො පටිසම්භිදා – අත්ථපටිසම්භිදා, ධම්මපටිසම්භිදා, නිරුත්තිපටිසම්භිදා, පටිභානපටිසම්භිදා.

748. චතුන්නං පටිසම්භිදානං කති කුසලා, කති අකුසලා, කති අබ්‍යාකතා…පෙ… කති සරණා, කති අරණා?

1. තිකං

749. සියා කුසලා, සියා අබ්‍යාකතා. සියා සුඛාය වෙදනාය සම්පයුත්තා, සියා අදුක්ඛමසුඛාය වෙදනාය සම්පයුත්තා. තිස්සො පටිසම්භිදා සියා විපාකධම්මධම්මා, සියා නෙවවිපාකනවිපාකධම්මධම්මා; අත්ථපටිසම්භිදා සියා විපාකා, සියා විපාකධම්මධම්මා, සියා නෙවවිපාකනවිපාකධම්මධම්මා. තිස්සො පටිසම්භිදා අනුපාදින්නුපාදානියා; අත්ථපටිසම්භිදා සියා අනුපාදින්නුපාදානියා, සියා අනුපාදින්නඅනුපාදානියා. තිස්සො පටිසම්භිදා අසංකිලිට්ඨඅසංකිලෙසිකා; අත්ථපටිසම්භිදා සියා අසංකිලිට්ඨසංකිලෙසිකා, සියා අසංකිලිට්ඨඅසංකිලෙසිකා.

තිස්සො පටිසම්භිදා සවිතක්කසවිචාරා; අත්ථපටිසම්භිදා සියා සවිතක්කසවිචාරා, සියා අවිතක්කවිචාරමත්තා, සියා අවිතක්කඅවිචාරා. සියා පීතිසහගතා, සියා සුඛසහගතා, සියා උපෙක්ඛාසහගතා. නෙව දස්සනෙන න භාවනාය පහාතබ්බා. නෙව දස්සනෙන න භාවනාය පහාතබ්බහෙතුකා.

තිස්සො පටිසම්භිදා සියා ආචයගාමිනො, සියා නෙවාචයගාමිනාපචයගාමිනො; අත්ථපටිසම්භිදා සියා ආචයගාමිනී, සියා අපචයගාමිනී, සියා නෙවාචයගාමිනාපචයගාමිනී.

තිස්සො පටිසම්භිදා නෙවසෙක්ඛනාසෙක්ඛා, අත්ථපටිසම්භිදා සියා සෙක්ඛා, සියා අසෙක්ඛා, සියා නෙවසෙක්ඛනාසෙක්ඛා. තිස්සො පටිසම්භිදා පරිත්තා; අත්ථපටිසම්භිදා සියා පරිත්තා, සියා අප්පමාණා. නිරුත්තිපටිසම්භිදා පරිත්තාරම්මණා; තිස්සො පටිසම්භිදා සියා පරිත්තාරම්මණා, සියා මහග්ගතාරම්මණා, සියා අප්පමාණාරම්මණා.

තිස්සො පටිසම්භිදා මජ්ඣිමා; අත්ථපටිසම්භිදා සියා මජ්ඣිමා, සියා පණීතා. තිස්සො පටිසම්භිදා අනියතා; අත්ථපටිසම්භිදා සියා සම්මත්තනියතා, සියා අනියතා. නිරුත්තිපටිසම්භිදා න වත්තබ්බා – මග්ගාරම්මණාතිපි, මග්ගහෙතුකාතිපි, මග්ගාධිපතිනීතිපි; අත්ථපටිසම්භිදා න මග්ගාරම්මණා, සියා මග්ගහෙතුකා, සියා මග්ගාධිපතිනී, සියා න වත්තබ්බා මග්ගහෙතුකාතිපි, මග්ගාධිපතිනීතිපි; ද්වෙ පටිසම්භිදා සියා මග්ගාරම්මණා, න මග්ගහෙතුකා, සියා මග්ගාධිපතිනො, සියා න වත්තබ්බා මග්ගාරම්මණාතිපි, මග්ගාධිපතිනොතිපි.

තිස්සො පටිසම්භිදා සියා උප්පන්නා, සියා අනුප්පන්නා, න වත්තබ්බා උප්පාදිනොති; අත්ථපටිසම්භිදා සියා උප්පන්නා, සියා අනුප්පන්නා, සියා උප්පාදිනී. සියා අතීතා, සියා අනාගතා, සියා පච්චුප්පන්නා. නිරුත්තිපටිසම්භිදා පච්චුප්පන්නාරම්මණා; ද්වෙ පටිසම්භිදා සියා අතීතාරම්මණා, සියා අනාගතාරම්මණා, සියා පච්චුප්පන්නාරම්මණා; අත්ථපටිසම්භිදා සියා අතීතාරම්මණා, සියා අනාගතාරම්මණා, සියා පච්චුප්පන්නාරම්මණා, සියා න වත්තබ්බා අතීතාරම්මණාතිපි, අනාගතාරම්මණාතිපි, පච්චුප්පන්නාරම්මණාතිපි. සියා අජ්ඣත්තා, සියා බහිද්ධා, සියා අජ්ඣත්තබහිද්ධා. නිරුත්තිපටිසම්භිදා බහිද්ධාරම්මණා; තිස්සො පටිසම්භිදා සියා අජ්ඣත්තාරම්මණා, සියා බහිද්ධාරම්මණා, සියා අජ්ඣත්තබහිද්ධාරම්මණා. අනිදස්සනඅපටිඝා.

2. දුකං

750. හෙතූ, සහෙතුකා, හෙතුසම්පයුත්තා, හෙතූ චෙව සහෙතුකා ච, හෙතූ චෙව හෙතුසම්පයුත්තා ච, න වත්තබ්බා න හෙතූ සහෙතුකාතිපි, නහෙතූඅහෙතුකාතිපි.

සප්පච්චයා, සඞ්ඛතා, අනිදස්සනා, අප්පටිඝා, අරූපා, තිස්සො පටිසම්භිදා ලොකියා, අත්ථපටිසම්භිදා සියා ලොකියා, සියා ලොකුත්තරා, කෙනචි විඤ්ඤෙය්‍යා, කෙනචි න විඤ්ඤෙය්‍යා.

නො ආසවා. තිස්සො පටිසම්භිදා සාසවා; අත්ථපටිසම්භිදා සියා සාසවා, සියා අනාසවා. ආසවවිප්පයුත්තා. තිස්සො පටිසම්භිදා න වත්තබ්බා ආසවා චෙව සාසවා චාති, සාසවා චෙව නො ච ආසවා; අත්ථපටිසම්භිදා න වත්තබ්බා ආසවො [ආසවා (සී.) ධාතුවිභඞ්ගෙ පන පාඨනානත්තං නත්ථි] චෙව සාසවා චාති, සියා සාසවා චෙව නො ච ආසවො [ආසවා (සී.) ධාතුවිභඞ්ගෙ පන පාඨනානත්තං නත්ථි], සියා න වත්තබ්බා සාසවා චෙව නො ච ආසවාති. න වත්තබ්බා ආසවා චෙව ආසවසම්පයුත්තා චාතිපි, ආසවසම්පයුත්තා චෙව නො ච ආසවාතිපි. තිස්සො පටිසම්භිදා ආසවවිප්පයුත්තා සාසවා; අත්ථපටිසම්භිදා සියා ආසවවිප්පයුත්තා සාසවා, සියා ආසවවිප්පයුත්තා අනාසවා.

නො සංයොජනා…පෙ… නො ගන්ථා…පෙ… නො ඔඝා…පෙ… නො යොගා…පෙ… නො නීවරණා…පෙ… නො පරාමාසා…පෙ… සාරම්මණා. නො චිත්තා, චෙතසිකා, චිත්තසම්පයුත්තා, චිත්තසංසට්ඨා, චිත්තසමුට්ඨානා, චිත්තසහභුනො, චිත්තානුපරිවත්තිනො. චිත්තසංසට්ඨසමුට්ඨානා, චිත්තසංසට්ඨසමුට්ඨානසහභුනො, චිත්තසංසට්ඨසමුට්ඨානානුපරිවත්තිනො, බාහිරා, නො උපාදා, අනුපාදින්නා.

නො උපාදානා…පෙ… නො කිලෙසා…පෙ… න දස්සනෙන පහාතබ්බා. න භාවනාය පහාතබ්බා. න දස්සනෙන පහාතබ්බහෙතුකා. න භාවනාය පහාතබ්බහෙතුකා. තිස්සො පටිසම්භිදා සවිතක්කා; අත්ථපටිසම්භිදා සියා සවිතක්කා, සියා අවිතක්කා. තිස්සො පටිසම්භිදා සවිචාරා; අත්ථපටිසම්භිදා සියා සවිචාරා, සියා අවිචාරා. සියා සප්පීතිකා, සියා අප්පීතිකා. සියා පීතිසහගතා, සියා න පීතිසහගතා. සියා සුඛසහගතා, සියා න සුඛසහගතා. සියා උපෙක්ඛාසහගතා, සියා න උපෙක්ඛාසහගතා. තිස්සො පටිසම්භිදා කාමාවචරා; අත්ථපටිසම්භිදා සියා කාමාවචරා, සියා න කාමාවචරා. න රූපාවචරා. න අරූපාවචරා. තිස්සො පටිසම්භිදා පරියාපන්නා; අත්ථපටිසම්භිදා සියා පරියාපන්නා, සියා අපරියාපන්නා. තිස්සො පටිසම්භිදා අනිය්‍යානිකා; අත්ථපටිසම්භිදා සියා නිය්‍යානිකා, සියා අනිය්‍යානිකා. තිස්සො පටිසම්භිදා අනියතා; අත්ථපටිසම්භිදා සියා නියතා, සියා අනියතා. තිස්සො පටිසම්භිදා සඋත්තරා; අත්ථපටිසම්භිදා සියා සඋත්තරා, සියා අනුත්තරා. අරණාති.

පඤ්හාපුච්ඡකං.

පටිසම්භිදාවිභඞ්ගො නිට්ඨිතො.