1-7. පටිච්චවාරාදි

පච්චයචතුක්කං

හෙතුපච්චයො

5. නසහෙතුකං ධම්මං පටිච්ච නසහෙතුකො ධම්මො උප්පජ්ජති හෙතුපච්චයා – විචිකිච්ඡාසහගතං උද්ධච්චසහගතං මොහං පටිච්ච චිත්තසමුට්ඨානං රූපං, එකං මහාභූතං පටිච්ච තයො මහාභූතා…පෙ… ද්වෙ මහාභූතෙ පටිච්ච ද්වෙ මහාභූතා, මහාභූතෙ පටිච්ච චිත්තසමුට්ඨානං රූපං කටත්තාරූපං උපාදාරූපං. නසහෙතුකං ධම්මං පටිච්ච නඅහෙතුකො ධම්මො උප්පජ්ජති හෙතුපච්චයා – විචිකිච්ඡාසහගතං උද්ධච්චසහගතං මොහං පටිච්ච සම්පයුත්තකා ඛන්ධා; පටිසන්ධික්ඛණෙ වත්ථුං පටිච්ච සහෙතුකා ඛන්ධා. නසහෙතුකං ධම්මං පටිච්ච නසහෙතුකො ච නඅහෙතුකො ච ධම්මා උප්පජ්ජන්ති හෙතුපච්චයා. (3)

නඅහෙතුකං ධම්මං පටිච්ච නඅහෙතුකො ධම්මො උප්පජ්ජති හෙතුපච්චයා… තීණි.

නසහෙතුකඤ්ච නඅහෙතුකඤ්ච ධම්මං පටිච්ච නසහෙතුකො ධම්මො උප්පජ්ජති හෙතුපච්චයා. නසහෙතුකඤ්ච නඅහෙතුකඤ්ච ධම්මං පටිච්ච නඅහෙතුකො ධම්මො උප්පජ්ජති හෙතුපච්චයා. නසහෙතුකඤ්ච නඅහෙතුකඤ්ච ධම්මං පටිච්ච නසහෙතුකො ච නඅහෙතුකො ච ධම්මා උප්පජ්ජන්ති හෙතුපච්චයා. (3) (සංඛිත්තං.)

6. හෙතුයා නව, ආරම්මණෙ ඡ…පෙ… අවිගතෙ නව.

(සහජාතවාරම්පි…පෙ… සම්පයුත්තවාරම්පි පටිච්චවාරසදිසං එවං විත්ථාරෙතබ්බං.)

හෙතු-ආරම්මණපච්චයා

7. නසහෙතුකො ධම්මො නසහෙතුකස්ස ධම්මස්ස හෙතුපච්චයෙන පච්චයො. නසහෙතුකො ධම්මො නඅහෙතුකස්ස ධම්මස්ස හෙතුපච්චයෙන පච්චයො. නසහෙතුකො ධම්මො නසහෙතුකස්ස ච නඅහෙතුකස්ස ච ධම්මස්ස හෙතුපච්චයෙන පච්චයො. (3)

නඅහෙතුකො ධම්මො නඅහෙතුකස්ස ධම්මස්ස හෙතුපච්චයෙන පච්චයො… තීණි.

නසහෙතුකො ධම්මො නසහෙතුකස්ස ධම්මස්ස ආරම්මණපච්චයෙන පච්චයො (සංඛිත්තං.)

8. හෙතුයා ඡ, ආරම්මණෙ නව…පෙ… අවිගතෙ නව.

(යථා කුසලත්තිකෙ පඤ්හාවාරං, එවං විත්ථාරෙතබ්බං.)