1-7. පටිච්චවාරාදි

පච්චයචතුක්කං

හෙතුපච්චයො

12. හෙතුං හෙතුසම්පයුත්තං ධම්මං පටිච්ච හෙතු හෙතුසම්පයුත්තො ධම්මො උප්පජ්ජති හෙතුපච්චයා. හෙතුං හෙතුසම්පයුත්තං ධම්මං පටිච්ච නහෙතු හෙතුසම්පයුත්තො ධම්මො උප්පජ්ජති හෙතුපච්චයා. හෙතුං හෙතුසම්පයුත්තං ධම්මං පටිච්ච හෙතු හෙතුසම්පයුත්තො ච නහෙතු හෙතුසම්පයුත්තො ච ධම්මා උප්පජ්ජන්ති හෙතුපච්චයා. (3)

නහෙතුං හෙතුසම්පයුත්තං ධම්මං පටිච්ච නහෙතු හෙතුසම්පයුත්තො ධම්මො උප්පජ්ජති හෙතුපච්චයා… තීණි.

හෙතුං හෙතුසම්පයුත්තඤ්ච නහෙතුං හෙතුසම්පයුත්තඤ්ච ධම්මං පටිච්ච හෙතු හෙතුසම්පයුත්තො ධම්මො උප්පජ්ජති හෙතුපච්චයා… තීණි. (සංඛිත්තං.)

13. හෙතුයා නව, ආරම්මණෙ නව…පෙ… අවිගතෙ නව. (සංඛිත්තං.)

14. හෙතු හෙතුසම්පයුත්තො ධම්මො හෙතුස්ස හෙතුසම්පයුත්තස්ස ධම්මස්ස හෙතුපච්චයෙන පච්චයො… තීණි. (සංඛිත්තං.)

හෙතුයා තීණි…පෙ… අවිගතෙ නව. (සංඛිත්තං.)

(යථා කුසලත්තිකෙ පඤ්හාවාරං, එවං විත්ථාරෙතබ්බං.)

15. හෙතුං හෙතුවිප්පයුත්තං ධම්මං පටිච්ච නහෙතු හෙතුවිප්පයුත්තො ධම්මො උප්පජ්ජති හෙතුපච්චයා. (1)

නහෙතුං හෙතුවිප්පයුත්තං ධම්මං පටිච්ච නහෙතු හෙතුවිප්පයුත්තො ධම්මො උප්පජ්ජති හෙතුපච්චයා. (1)

හෙතුං හෙතුවිප්පයුත්තඤ්ච නහෙතුං හෙතුවිප්පයුත්තඤ්ච ධම්මං පටිච්ච නහෙතු හෙතුවිප්පයුත්තො ධම්මො උප්පජ්ජති හෙතුපච්චයා. (1) (සංඛිත්තං.)

හෙතුයා තීණි, ආරම්මණෙ එකං…පෙ… අවිගතෙ තීණි.

(සහජාතවාරම්පි…පෙ… සම්පයුත්තවාරම්පි පටිච්චවාරසදිසං විත්ථාරෙතබ්බං.)

16. හෙතු හෙතුවිප්පයුත්තො ධම්මො නහෙතුස්ස හෙතුවිප්පයුත්තස්ස ධම්මස්ස හෙතුපච්චයෙන පච්චයො. (සංඛිත්තං.)

හෙතුයා එකං, ආරම්මණෙ චත්තාරි…පෙ… අවිගතෙ චත්තාරි. (සංඛිත්තං.)

(යථා කුසලත්තිකෙ පඤ්හාවාරං, එවං විත්ථාරෙතබ්බං.)