1-13. හෙතුදුක-ආසවදුකං

32. හෙතුං ආසවං ධම්මං පටිච්ච හෙතු ආසවො ධම්මො උප්පජ්ජති හෙතුපච්චයා. හෙතුං ආසවං ධම්මං පටිච්ච නහෙතු ආසවො ධම්මො උප්පජ්ජති හෙතුපච්චයා. හෙතුං ආසවං ධම්මං පටිච්ච හෙතු ආසවො ච නහෙතු ආසවො ච ධම්මා උප්පජ්ජන්ති හෙතුපච්චයා. (3)

නහෙතුං ආසවං ධම්මං පටිච්ච නහෙතු ආසවො ධම්මො උප්පජ්ජති හෙතුපච්චයා. (1)

හෙතුං ආසවඤ්ච නහෙතුං ආසවඤ්ච ධම්මං පටිච්ච හෙතු ආසවො ධම්මො උප්පජ්ජති හෙතුපච්චයා. (1) (සංඛිත්තං.)

හෙතුයා පඤ්ච, ආරම්මණෙ පඤ්ච…පෙ… අවිගතෙ පඤ්ච. (සබ්බත්ථ විත්ථාරො.)

33. හෙතුං නොආසවං ධම්මං පටිච්ච හෙතු නොආසවො ධම්මො උප්පජ්ජති හෙතුපච්චයා… තීණි.

නහෙතුං නොආසවං ධම්මං පටිච්ච නහෙතු නොආසවො ධම්මො උප්පජ්ජති හෙතුපච්චයා… තීණි.

හෙතුං නොආසවඤ්ච නහෙතුං නොආසවඤ්ච ධම්මං පටිච්ච හෙතු නොආසවො ධම්මො උප්පජ්ජති හෙතුපච්චයා… තීණි. (සංඛිත්තං.)

හෙතුයා නව…පෙ… අවිගතෙ නව. (සබ්බත්ථ විත්ථාරො.)