7-13. චූළන්තරදුකාදි

7. නඅප්පච්චයං ධම්මං පටිච්ච සප්පච්චයො ධම්මො උප්පජ්ජති හෙතුපච්චයා. හෙතුයා එකං.

8. නඅසඞ්ඛතං ධම්මං පටිච්ච සඞ්ඛතො ධම්මො උප්පජ්ජති හෙතුපච්චයා. හෙතුයා එකං.

9. නසනිදස්සනං ධම්මං පටිච්ච සනිදස්සනො ධම්මො උප්පජ්ජති හෙතුපච්චයා. නසනිදස්සනං ධම්මං පටිච්ච අනිදස්සනො ධම්මො උප්පජ්ජති හෙතුපච්චයා. නසනිදස්සනං ධම්මං පටිච්ච සනිදස්සනො ච අනිදස්සනො ච ධම්මා උප්පජ්ජන්ති හෙතුපච්චයා. හෙතුයා තීණි.

නසනිදස්සනො ධම්මො සනිදස්සනස්ස ධම්මස්ස හෙතුපච්චයෙන පච්චයො… තීණි.

නසනිදස්සනො ධම්මො අනිදස්සනස්ස ධම්මස්ස ආරම්මණපච්චයෙන පච්චයො. නඅනිදස්සනො ධම්මො අනිදස්සනස්ස ධම්මස්ස ආරම්මණපච්චයෙන පච්චයො.

10. නසප්පටිඝං ධම්මං පටිච්ච සප්පටිඝො ධම්මො උප්පජ්ජති හෙතුපච්චයා. නසප්පටිඝං ධම්මං පටිච්ච අප්පටිඝො ධම්මො උප්පජ්ජති හෙතුපච්චයා. නසප්පටිඝං ධම්මං පටිච්ච සප්පටිඝො ච අප්පටිඝො ච ධම්මා උප්පජ්ජන්ති හෙතුපච්චයා. තීණි.

නඅප්පටිඝං ධම්මං පටිච්ච අප්පටිඝො ධම්මො උප්පජ්ජති හෙතුපච්චයා. නඅප්පටිඝං ධම්මං පටිච්ච සප්පටිඝො ධම්මො උප්පජ්ජති හෙතුපච්චයා. නඅප්පටිඝං ධම්මං පටිච්ච සප්පටිඝො ච අප්පටිඝො ච ධම්මා උප්පජ්ජන්ති හෙතුපච්චයා. තීණි.

නසප්පටිඝඤ්ච නඅප්පටිඝඤ්ච ධම්මං පටිච්ච සප්පටිඝො ධම්මො උප්පජ්ජති හෙතුපච්චයා… තීණි. හෙතුයා නව.

11. නරූපිං ධම්මං පටිච්ච රූපී ධම්මො උප්පජ්ජති හෙතුපච්චයා… හෙතුයා නව.

12. නලොකියං ධම්මං පටිච්ච ලොකියො ධම්මො උප්පජ්ජති හෙතුපච්චයා. නලොකියං ධම්මං පටිච්ච ලොකුත්තරො ධම්මො උප්පජ්ජති හෙතුපච්චයා. නලොකියං ධම්මං පටිච්ච ලොකියො ච ලොකුත්තරො ච ධම්මා උප්පජ්ජන්ති හෙතුපච්චයා. (3)

නලොකුත්තරං ධම්මං පටිච්ච ලොකියො ධම්මො උප්පජ්ජති හෙතුපච්චයා. (1)

නලොකියඤ්ච නලොකුත්තරඤ්ච ධම්මං පටිච්ච ලොකියො ධම්මො උප්පජ්ජති හෙතුපච්චයා. (1). හෙතුයා පඤ්ච.

13. නකෙනචි විඤ්ඤෙය්‍යං ධම්මං පටිච්ච කෙනචි විඤ්ඤෙය්‍යො ධම්මො උප්පජ්ජති හෙතුපච්චයා… හෙතුයා නව.