පච්චනීයං

නහෙතුපච්චයො

56. නසරණං ධම්මං පටිච්ච අරණො ධම්මො උප්පජ්ජති නහෙතුපච්චයා. නඅරණං ධම්මං පටිච්ච සරණො ධම්මො උප්පජ්ජති නහෙතුපච්චයා (සංඛිත්තං).

නහෙතුයා ද්වෙ, නආරම්මණෙ තීණි…පෙ… නොවිගතෙ තීණි.

(සහජාතවාරම්පි…පෙ… සම්පයුත්තවාරම්පි පටිච්චවාරසදිසං.)

හෙතු-ආරම්මණපච්චයා

57. නසරණො ධම්මො අරණස්ස ධම්මස්ස හෙතුපච්චයෙන පච්චයො. (1)

නඅරණො ධම්මො අරණස්ස ධම්මස්ස හෙතුපච්චයෙන පච්චයො. නඅරණො ධම්මො සරණස්ස ධම්මස්ස හෙතුපච්චයෙන පච්චයො. නඅරණො ධම්මො සරණස්ස ච අරණස්ස ච ධම්මස්ස හෙතුපච්චයෙන පච්චයො. (3)

58. නසරණො ධම්මො සරණස්ස ධම්මස්ස ආරම්මණපච්චයෙන පච්චයො. නසරණො ධම්මො අරණස්ස ධම්මස්ස ආරම්මණපච්චයෙන පච්චයො. ද්වෙ.

නඅරණො ධම්මො අරණස්ස ධම්මස්ස ආරම්මණපච්චයෙන පච්චයො. නඅරණො ධම්මො සරණස්ස ධම්මස්ස ආරම්මණපච්චයෙන පච්චයො. ද්වෙ.

59. හෙතුයා චත්තාරි, ආරම්මණෙ චත්තාරි…පෙ… අවිගතෙ සත්ත.

පච්චනීයුද්ධාරො

60. නසරණො ධම්මො සරණස්ස ධම්මස්ස ආරම්මණපච්චයෙන පච්චයො, උපනිස්සයපච්චයෙන පච්චයො, පුරෙජාතපච්චයෙන පච්චයො (සංඛිත්තං).

නහෙතුයා සත්ත, නආරම්මණෙ සත්ත…පෙ… නොඅවිගතෙ චත්තාරි.

(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)

ධම්මපච්චනීයානුලොමෙ දුකපට්ඨානං නිට්ඨිතං.