1-58. කුසලත්තික-චිත්තසම්පයුත්තදුකං
36. කුසලං චිත්තසම්පයුත්තං ධම්මං පටිච්ච නකුසලො නචිත්තසම්පයුත්තො ධම්මො උප්පජ්ජති හෙතුපච්චයා. කුසලං චිත්තසම්පයුත්තං ධම්මං පටිච්ච නඅකුසලො නචිත්තසම්පයුත්තො ධම්මො උප්පජ්ජති හෙතුපච්චයා. කුසලං චිත්තසම්පයුත්තං ධම්මං පටිච්ච නඅබ්‍යාකතො නචිත්තසම්පයුත්තො ධම්මො උප්පජ්ජති හෙතුපච්චයා. කුසලං චිත්තසම්පයුත්තං ධම්මං පටිච්ච නඅකුසලො නචිත්තසම්පයුත්තො ච නඅබ්‍යාකතො නචිත්තසම්පයුත්තො ච ධම්මා උප්පජ්ජන්ති හෙතුපච්චයා. කුසලං චිත්තසම්පයුත්තං ධම්මං පටිච්ච නකුසලො නචිත්තසම්පයුත්තො ච නඅකුසලො නචිත්තසම්පයුත්තො ච ධම්මා උප්පජ්ජන්ති හෙතුපච්චයා. පඤ්ච.
අකුසලං චිත්තසම්පයුත්තං ධම්මං පටිච්ච නඅකුසලො නචිත්තසම්පයුත්තො ධම්මො උප්පජ්ජති හෙතුපච්චයා… පඤ්ච.
අබ්‍යාකතං චිත්තසම්පයුත්තං ධම්මං පටිච්ච නකුසලො නචිත්තසම්පයුත්තො ධම්මො උප්පජ්ජති හෙතුපච්චයා. අබ්‍යාකතං චිත්තසම්පයුත්තං ධම්මං පටිච්ච නඅකුසලො නචිත්තසම්පයුත්තො ධම්මො උප්පජ්ජති හෙතුපච්චයා. අබ්‍යාකතං චිත්තසම්පයුත්තං ධම්මං පටිච්ච නකුසලො නචිත්තසම්පයුත්තො ච නඅකුසලො නචිත්තසම්පයුත්තො ච ධම්මා උප්පජ්ජන්ති හෙතුපච්චයා. තීණි. (සංඛිත්තං.) හෙතුයා තෙරස. චිත්තවිප්පයුත්තෙ තීණි.