1-7. පටිච්චවාරාදි
හෙතුපච්චයො
93. අනුපාදින්නුපාදානියං කුසලං ධම්මං පටිච්ච අනුපාදින්නුපාදානියො කුසලො ධම්මො උප්පජ්ජති හෙතුපච්චයා.
අනුපාදින්නඅනුපාදානියං කුසලං ධම්මං පටිච්ච අනුපාදින්නඅනුපාදානියො කුසලො ධම්මො උප්පජ්ජති හෙතුපච්චයා. (1) (සංඛිත්තං.)
හෙතුයා ද්වෙ. (සබ්බත්ථ විත්ථාරො.)
අනුපාදින්නුපාදානියං අකුසලං ධම්මං පටිච්ච අනුපාදින්නුපාදානියො අකුසලො ධම්මො උප්පජ්ජති හෙතුපච්චයා. (සබ්බත්ථ එකං. සබ්බත්ථ විත්ථාරො.)
94. උපාදින්නුපාදානියං අබ්‍යාකතං ධම්මං පටිච්ච උපාදින්නුපාදානියො අබ්‍යාකතො ධම්මො උප්පජ්ජති හෙතුපච්චයා… තීණි. (සබ්බත්ථ විත්ථාරො.)
අනුපාදින්නුපාදානියං අබ්‍යාකතං ධම්මං පටිච්ච අනුපාදින්නුපාදානියො අබ්‍යාකතො ධම්මො උප්පජ්ජති හෙතුපච්චයා… තීණි.
අනුපාදින්නඅනුපාදානියං අබ්‍යාකතං ධම්මං පටිච්ච අනුපාදින්නඅනුපාදානියො අබ්‍යාකතො ධම්මො උප්පජ්ජති හෙතුපච්චයා. (1)
අනුපාදින්නුපාදානියං අබ්‍යාකතඤ්ච අනුපාදින්නඅනුපාදානියං අබ්‍යාකතඤ්ච ධම්මං පටිච්ච අනුපාදින්නුපාදානියො අබ්‍යාකතො ධම්මො උප්පජ්ජති හෙතුපච්චයා. (1)
උපාදින්නුපාදානියං අබ්‍යාකතඤ්ච අනුපාදින්නුපාදානියං අබ්‍යාකතඤ්ච ධම්මං පටිච්ච අනුපාදින්නුපාදානියො අබ්‍යාකතො ධම්මො උප්පජ්ජති හෙතුපච්චයා. (1) (සංඛිත්තං.)
හෙතුයා නව. (සබ්බත්ථ විත්ථාරො.)