1-7. පටිච්චවාරාදි
පච්චයචතුක්කං
84. අබ්‍යාකතං අනිදස්සනසප්පටිඝං ධම්මං පටිච්ච අබ්‍යාකතො අනිදස්සනසප්පටිඝො ධම්මො උප්පජ්ජති හෙතුපච්චයා. (සංඛිත්තං.)
හෙතුයා එකං…පෙ… අවිගතෙ එකං. (සංඛිත්තං.)
(සහජාතවාරම්පි…පෙ… පඤ්හාවාරම්පි විත්ථාරෙතබ්බං.)
85. කුසලං අනිදස්සනඅප්පටිඝං ධම්මං පටිච්ච කුසලො අනිදස්සනඅප්පටිඝො ධම්මො උප්පජ්ජති හෙතුපච්චයා. කුසලං අනිදස්සනඅප්පටිඝං ධම්මං පටිච්ච අබ්‍යාකතො අනිදස්සනඅප්පටිඝො ධම්මො උප්පජ්ජති හෙතුපච්චයා. කුසලං අනිදස්සනඅප්පටිඝං ධම්මං පටිච්ච කුසලො අනිදස්සනඅප්පටිඝො ච අබ්‍යාකතො අනිදස්සනඅප්පටිඝො ච ධම්මා උප්පජ්ජන්ති හෙතුපච්චයා. (3)
අකුසලං අනිදස්සනඅප්පටිඝං ධම්මං පටිච්ච අකුසලො අනිදස්සනඅප්පටිඝො ධම්මො උප්පජ්ජති හෙතුපච්චයා… තීණි.
අබ්‍යාකතං අනිදස්සනඅප්පටිඝං ධම්මං පටිච්ච අබ්‍යාකතො අනිදස්සනඅප්පටිඝො ධම්මො උප්පජ්ජති හෙතුපච්චයා. (1)
කුසලං අනිදස්සනඅප්පටිඝඤ්ච අබ්‍යාකතං අනිදස්සනඅප්පටිඝඤ්ච ධම්මං පටිච්ච අබ්‍යාකතො අනිදස්සනඅප්පටිඝො ධම්මො උප්පජ්ජති හෙතුපච්චයා. (1)
අකුසලං අනිදස්සනඅප්පටිඝඤ්ච අබ්‍යාකතං අනිදස්සනඅප්පටිඝඤ්ච ධම්මං පටිච්ච අබ්‍යාකතො අනිදස්සනඅප්පටිඝො ධම්මො උප්පජ්ජති හෙතුපච්චයා. (1)
හෙතුයා නව, ආරම්මණෙ තීණි…පෙ… විපාකෙ එකං…පෙ… අවිගතෙ නව. (සංඛිත්තං. සහජාතවාරම්පි…පෙ… සම්පයුත්තවාරම්පි පඤ්හාවාරම්පි විත්ථාරෙතබ්බං.)
කුසලත්තිකසනිදස්සනත්තිකං නිට්ඨිතං.