1-7. පටිච්චවාරාදි

පච්චයචතුක්කං

හෙතුපච්චයො

23. නීවරණියඤ්චෙව නො ච නීවරණං කුසලං ධම්මං පටිච්ච නීවරණියො චෙව නො ච නීවරණො කුසලො ධම්මො උප්පජ්ජති හෙතුපච්චයා (සංඛිත්තං).

24. හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ එකං.)

25. නීවරණඤ්චෙව නීවරණියඤ්ච අකුසලං ධම්මං පටිච්ච නීවරණො චෙව නීවරණියො ච අකුසලො ධම්මො උප්පජ්ජති හෙතුපච්චයා… තීණි.

නීවරණියඤ්චෙව නො ච නීවරණං අකුසලං ධම්මං පටිච්ච නීවරණියො චෙව නො ච නීවරණො අකුසලො ධම්මො උප්පජ්ජති හෙතුපච්චයා… තීණි.

නීවරණඤ්චෙව නීවරණියං අකුසලඤ්ච නීවරණියඤ්චෙව නො ච නීවරණං අකුසලඤ්ච ධම්මං පටිච්ච නීවරණො ච නීවරණියො ච අකුසලො ධම්මො උප්පජ්ජති හෙතුපච්චයා… තීණි (සංඛිත්තං).

26. හෙතුයා නව, ආරම්මණෙ නව…පෙ… අවිගතෙ නව (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ නව.)

27. නීවරණියඤ්චෙව නො ච නීවරණං අබ්‍යාකතං ධම්මං පටිච්ච නීවරණියො චෙව නො ච නීවරණො අබ්‍යාකතො ධම්මො උප්පජ්ජති හෙතුපච්චයා (සංඛිත්තං).

28. හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ එකං.)