1-7. පටිච්චවාරාදි

පච්චයචතුක්කං

1. නොගන්ථං කුසලං ධම්මං පටිච්ච නොගන්ථො කුසලො ධම්මො උප්පජ්ජති හෙතුපච්චයා (සංඛිත්තං).

2. හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).

(සහජාතවාරෙපි …පෙ… පඤ්හාවාරෙපි සබ්බත්ථ එකං).

3. ගන්ථං අකුසලං ධම්මං පටිච්ච ගන්ථො අකුසලො ධම්මො උප්පජ්ජති හෙතුපච්චයා. ගන්ථං අකුසලං ධම්මං පටිච්ච නොගන්ථො අකුසලො ධම්මො උප්පජ්ජති හෙතුපච්චයා. ගන්ථං අකුසලං ධම්මං පටිච්ච ගන්ථො අකුසලො ච නොගන්ථො අකුසලො ච ධම්මා උප්පජ්ජන්ති හෙතුපච්චයා. (3)

නොගන්ථං අකුසලං ධම්මං පටිච්ච නොගන්ථො අකුසලො ධම්මො උප්පජ්ජති හෙතුපච්චයා… තීණි.

ගන්ථං අකුසලඤ්ච නොගන්ථං අකුසලඤ්ච ධම්මං පටිච්ච ගන්ථො අකුසලො ධම්මො උප්පජ්ජති හෙතුපච්චයා… තීණි (සංඛිත්තං).

4. හෙතුයා නව, ආරම්මණෙ නව…පෙ… අවිගතෙ නව (සංඛිත්තං).

නහෙතුයා එකං, නඅධිපතියා නව, නපුරෙජාතෙ නව, නපච්ඡාජාතෙ නව, නආසෙවනෙ නව, නකම්මෙ තීණි, නවිපාකෙ නව, නවිප්පයුත්තෙ නව (සංඛිත්තං).

(සහජාතවාරොපි…පෙ… සම්පයුත්තවාරොපි පටිච්චවාරසදිසා විත්ථාරෙතබ්බා.)

5. ගන්ථො අකුසලො ධම්මො ගන්ථස්ස අකුසලස්ස ධම්මස්ස හෙතුපච්චයෙන පච්චයො (සංඛිත්තං).

6. හෙතුයා නව, ආරම්මණෙ නව, අධිපතියා නව…පෙ… කම්මෙ ආහාරෙ ඉන්ද්‍රියෙ ඣානෙ තීණි…පෙ… අවිගතෙ නව (සංඛිත්තං).

7. නහෙතුයා නව, නආරම්මණෙ නව (සංඛිත්තං).

හෙතුපච්චයා නආරම්මණෙ නව (සංඛිත්තං).

නහෙතුපච්චයා ආරම්මණෙ නව (සංඛිත්තං).

(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)

8. නොගන්ථං අබ්‍යාකතං ධම්මං පටිච්ච නොගන්ථො අබ්‍යාකතො ධම්මො උප්පජ්ජති හෙතුපච්චයා (සංඛිත්තං).

9. හෙතුයා එකං…පෙ… අවිගතෙ එකං (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ එකං.)