1-6. පටිච්චවාරාදි

පච්චයචතුක්කං

හෙතුපච්චයො

20. සඤ්ඤොජනවිප්පයුත්තං කුසලං ධම්මං පටිච්ච සඤ්ඤොජනවිප්පයුත්තො කුසලො ධම්මො උප්පජ්ජති හෙතුපච්චයා (සංඛිත්තං).

හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).

(සහජාතවාරෙපි …පෙ… පඤ්හාවාරෙපි සබ්බත්ථ එකං.)

21. සඤ්ඤොජනසම්පයුත්තං අකුසලං ධම්මං පටිච්ච සඤ්ඤොජනසම්පයුත්තො අකුසලො ධම්මො උප්පජ්ජති හෙතුපච්චයා… තීණි.

සඤ්ඤොජනසම්පයුත්තං අකුසලං ධම්මං පටිච්ච සඤ්ඤොජනසම්පයුත්තො අකුසලො ධම්මො උප්පජ්ජති ආරම්මණපච්චයා (සංඛිත්තං).

22. හෙතුයා තීණි, ආරම්මණෙ පඤ්ච, අධිපතියා එකං…පෙ… අවිගතෙ පඤ්ච (සංඛිත්තං, අනුලොමං).

පච්චනීයං

නහෙතුපච්චයො

23. සඤ්ඤොජනසම්පයුත්තං අකුසලං ධම්මං පටිච්ච සඤ්ඤොජනසම්පයුත්තො අකුසලො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ පටිච්ච විචිකිච්ඡාසහගතො මොහො. සඤ්ඤොජනසම්පයුත්තං අකුසලං ධම්මං පටිච්ච සඤ්ඤොජනවිප්පයුත්තො අකුසලො ධම්මො උප්පජ්ජති නහෙතුපච්චයා – උද්ධච්චසහගතෙ ඛන්ධෙ පටිච්ච උද්ධච්චසහගතො මොහො. (2) (සංඛිත්තං.)

24. නහෙතුයා ද්වෙ, නඅධිපතියා පඤ්ච, නපුරෙජාතෙ පඤ්ච…පෙ… නකම්මෙ තීණි…පෙ… නවිප්පයුත්තෙ පඤ්ච (සංඛිත්තං, පච්චනීයං).