1-7. පටිච්චවාරාදි
පච්චයචතුක්කං
හෙතුපච්චයො
42. සඤ්ඤොජනවිප්පයුත්තං සඤ්ඤොජනියං කුසලං ධම්මං පටිච්ච සඤ්ඤොජනවිප්පයුත්තො සඤ්ඤොජනියො කුසලො ධම්මො උප්පජ්ජති හෙතුපච්චයා. (1)
සඤ්ඤොජනවිප්පයුත්තං අසඤ්ඤොජනියං කුසලං ධම්මං පටිච්ච සඤ්ඤොජනවිප්පයුත්තො අසඤ්ඤොජනියො කුසලො ධම්මො උප්පජ්ජති හෙතුපච්චයා. (1)
43. හෙතුයා ද්වෙ, ආරම්මණෙ ද්වෙ…පෙ… අවිගතෙ ද්වෙ (සංඛිත්තං).
(යථා චූළන්තරදුකෙ ලොකියදුකසදිසං. සහජාතවාරොපි…පෙ… පඤ්හාවාරොපි සබ්බත්ථ විත්ථාරෙතබ්බා.)
44. සඤ්ඤොජනවිප්පයුත්තො සඤ්ඤොජනියො අකුසලො ධම්මො සඤ්ඤොජනවිප්පයුත්තස්ස සඤ්ඤොජනියස්ස අකුසලස්ස ධම්මස්ස ආරම්මණපච්චයෙන පච්චයො (සංඛිත්තං).
45. ආරම්මණෙ එකං (සබ්බත්ථ එකං, සංඛිත්තං).
46. සඤ්ඤොජනවිප්පයුත්තං සඤ්ඤොජනියං අබ්‍යාකතං ධම්මං පටිච්ච සඤ්ඤොජනවිප්පයුත්තො සඤ්ඤොජනියො අබ්‍යාකතො ධම්මො උප්පජ්ජති හෙතුපච්චයා. (1)
සඤ්ඤොජනවිප්පයුත්තං අසඤ්ඤොජනියං අබ්‍යාකතං ධම්මං පටිච්ච සඤ්ඤොජනවිප්පයුත්තො අසඤ්ඤොජනියො අබ්‍යාකතො ධම්මො උප්පජ්ජති හෙතුපච්චයා. සඤ්ඤොජනවිප්පයුත්තං අසඤ්ඤොජනියං අබ්‍යාකතං ධම්මං පටිච්ච සඤ්ඤොජනවිප්පයුත්තො සඤ්ඤොජනියො අබ්‍යාකතො ධම්මො උප්පජ්ජති හෙතුපච්චයා. සඤ්ඤොජනවිප්පයුත්තං අසඤ්ඤොජනියං අබ්‍යාකතං ධම්මං පටිච්ච සඤ්ඤොජනවිප්පයුත්තො සඤ්ඤොජනියො අබ්‍යාකතො ච සඤ්ඤොජනවිප්පයුත්තො අසඤ්ඤොජනියො අබ්‍යාකතො ච ධම්මා උප්පජ්ජන්ති හෙතුපච්චයා. (3)
සඤ්ඤොජනවිප්පයුත්තං සඤ්ඤොජනියං අබ්‍යාකතඤ්ච සඤ්ඤොජනවිප්පයුත්තං අසඤ්ඤොජනියං අබ්‍යාකතඤ්ච ධම්මං පටිච්ච සඤ්ඤොජනවිප්පයුත්තො සඤ්ඤොජනියො අබ්‍යාකතො ධම්මො උප්පජ්ජති හෙතුපච්චයා. (1) (සංඛිත්තං.)
47. හෙතුයා පඤ්ච, ආරම්මණෙ ද්වෙ, අධිපතියා පඤ්ච…පෙ… ආසෙවනෙ එකං, කම්මෙ පඤ්ච, විපාකෙ පඤ්ච…පෙ… අවිගතෙ පඤ්ච (සංඛිත්තං).
නහෙතුයා එකං, නආරම්මණෙ තීණි, නඅධිපතියා ද්වෙ, නපුරෙජාතෙ චත්තාරි, නපච්ඡාජාතෙ පඤ්ච, නආසෙවනෙ පඤ්ච, නකම්මෙ එකං, නවිපාකෙ එකං, නවිප්පයුත්තෙ ද්වෙ…පෙ… නොවිගතෙ තීණි (සංඛිත්තං).
(සහජාතවාරොපි…පෙ… සම්පයුත්තවාරොපි පටිච්චවාරසදිසා.)
48. සඤ්ඤොජනවිප්පයුත්තො සඤ්ඤොජනියො අබ්‍යාකතො ධම්මො සඤ්ඤොජනවිප්පයුත්තස්ස සඤ්ඤොජනියස්ස අබ්‍යාකතස්ස ධම්මස්ස හෙතුපච්චයෙන පච්චයො (සංඛිත්තං).
49. හෙතුයා චත්තාරි, ආරම්මණෙ තීණි, අධිපතියා චත්තාරි, අනන්තරෙ චත්තාරි…පෙ… අවිගතෙ සත්ත (සංඛිත්තං).
50. නහෙතුයා සත්ත, නආරම්මණෙ සත්ත (සංඛිත්තං).
හෙතුපච්චයා නආරම්මණෙ චත්තාරි (සංඛිත්තං).
නහෙතුපච්චයා ආරම්මණෙ තීණි (සංඛිත්තං).
(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)
සඤ්ඤොජනගොච්ඡකකුසලත්තිකං නිට්ඨිතං.