7. පඤ්හාවාරො
පච්චයචතුක්කං
හෙතු-ආරම්මණපච්චයා
54. ආසවවිප්පයුත්තො සාසවො අබ්‍යාකතො ධම්මො ආසවවිප්පයුත්තස්ස සාසවස්ස අබ්‍යාකතස්ස ධම්මස්ස හෙතුපච්චයෙන පච්චයො.
ආසවවිප්පයුත්තො අනාසවො අබ්‍යාකතො ධම්මො ආසවවිප්පයුත්තස්ස අනාසවස්ස අබ්‍යාකතස්ස ධම්මස්ස හෙතුපච්චයෙන පච්චයො. ආසවවිප්පයුත්තො අනාසවො අබ්‍යාකතො ධම්මො ආසවවිප්පයුත්තස්ස සාසවස්ස අබ්‍යාකතස්ස ධම්මස්ස හෙතුපච්චයෙන පච්චයො. ආසවවිප්පයුත්තො අනාසවො අබ්‍යාකතො ධම්මො ආසවවිප්පයුත්තස්ස සාසවස්ස අබ්‍යාකතස්ස ච ආසවවිප්පයුත්තස්ස අනාසවස්ස අබ්‍යාකතස්ස ච ධම්මස්ස හෙතුපච්චයෙන පච්චයො. (3)
ආසවවිප්පයුත්තො සාසවො අබ්‍යාකතො ධම්මො ආසවවිප්පයුත්තස්ස සාසවස්ස අබ්‍යාකතස්ස ධම්මස්ස ආරම්මණපච්චයෙන පච්චයො. (1)
ආසවවිප්පයුත්තො අනාසවො අබ්‍යාකතො ධම්මො ආසවවිප්පයුත්තස්ස අනාසවස්ස අබ්‍යාකතස්ස ධම්මස්ස ආරම්මණපච්චයෙන පච්චයො. ආසවවිප්පයුත්තො අනාසවො අබ්‍යාකතො ධම්මො ආසවවිප්පයුත්තස්ස සාසවස්ස අබ්‍යාකතස්ස ධම්මස්ස ආරම්මණපච්චයෙන පච්චයො. (2) (සංඛිත්තං.)
55. හෙතුයා චත්තාරි, ආරම්මණෙ තීණි, අධිපතියා චත්තාරි, අනන්තරෙ චත්තාරි, සමනන්තරෙ චත්තාරි, සහජාතෙ පඤ්ච, අඤ්ඤමඤ්ඤෙ ද්වෙ, නිස්සයෙ සත්ත, උපනිස්සයෙ චත්තාරි, පුරෙජාතෙ ද්වෙ, ආසෙවනෙ එකං, කම්මෙ චත්තාරි, විපාකෙ චත්තාරි, ආහාරෙ චත්තාරි…පෙ… අවිගතෙ සත්ත (සංඛිත්තං).
පච්චනීයුද්ධාරො
56. ආසවවිප්පයුත්තො සාසවො අබ්‍යාකතො ධම්මො ආසවවිප්පයුත්තස්ස සාසවස්ස අබ්‍යාකතස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො… පුරෙජාතපච්චයෙන පච්චයො… පච්ඡාජාතපච්චයෙන පච්චයො… ආහාරපච්චයෙන පච්චයො… ඉන්ද්‍රියපච්චයෙන පච්චයො (සංඛිත්තං).
57. නහෙතුයා සත්ත, නආරම්මණෙ සත්ත (සංඛිත්තං).
හෙතුපච්චයා නආරම්මණෙ චත්තාරි (සංඛිත්තං).
නහෙතුපච්චයා ආරම්මණෙ තීණි (සංඛිත්තං).
(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)
ආසවවිප්පයුත්තසාසවදුකකුසලත්තිකං නිට්ඨිතං.
ආසවගොච්ඡකං නිට්ඨිතං.