7. පඤ්හාවාරො
හෙතුපච්චයො
36. ආසවො චෙව සාසවොච අකුසලො ධම්මො ආසවස්ස චෙව සාසවස්ස ච අකුසලස්ස ධම්මස්ස හෙතුපච්චයෙන පච්චයො (සංඛිත්තං).
37. හෙතුයා සත්ත, ආරම්මණෙ නව, අධිපතියා නව…පෙ… උපනිස්සයෙ ආසෙවනෙ නව, කම්මෙ ආහාරෙ ඉන්ද්‍රියෙ ඣානෙ තීණි, මග්ගෙ සම්පයුත්තෙ නව…පෙ… අවිගතෙ නව (සංඛිත්තං).
පච්චනීයුද්ධාරො
38. ආසවො චෙව සාසවො ච අකුසලො ධම්මො ආසවස්ස චෙව සාසවස්ස ච අකුසලස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො (සංඛිත්තං).
39. නහෙතුයා නව, නආරම්මණෙ නව (සංඛිත්තං).
හෙතුපච්චයා නආරම්මණෙ සත්ත (සංඛිත්තං).
නහෙතුපච්චයා ආරම්මණෙ නව (සංඛිත්තං).
(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)
3. අබ්‍යාකතපදං
හෙතුපච්චයො
40. සාසවඤ්චෙව නො ච ආසවං අබ්‍යාකතං ධම්මං පටිච්ච සාසවො චෙව නො ච ආසවො අබ්‍යාකතො ධම්මො උප්පජ්ජති හෙතුපච්චයා (සංඛිත්තං).
41. හෙතුයා එකං, ආරම්මණෙ එකං…පෙ… අවිගතෙ එකං (සංඛිත්තං).
(සහජාතවාරෙපි …පෙ… පඤ්හාවාරෙපි සබ්බත්ථ එකං.)
ආසවසාසවදුකකුසලත්තිකං නිට්ඨිතං.