නකාමාවචරපදං
හෙතු-ආරම්මණපච්චයා
32. කුසලං නකාමාවචරං ධම්මං පටිච්ච කුසලො නකාමාවචරො ධම්මො උප්පජ්ජති හෙතුපච්චයා. (1)
අබ්‍යාකතං නකාමාවචරං ධම්මං පටිච්ච අබ්‍යාකතො නකාමාවචරො ධම්මො උප්පජ්ජති හෙතුපච්චයා. (1) (සංඛිත්තං.)
හෙතුයා ද්වෙ, ආරම්මණෙ ද්වෙ…පෙ… අවිගතෙ ද්වෙ (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).
33. කුසලො නකාමාවචරො ධම්මො කුසලස්ස නකාමාවචරස්ස ධම්මස්ස හෙතුපච්චයෙන පච්චයො. (1)
අබ්‍යාකතො නකාමාවචරො ධම්මො අබ්‍යාකතස්ස නකාමාවචරස්ස ධම්මස්ස හෙතුපච්චයෙන පච්චයො. (1)
කුසලො නකාමාවචරො ධම්මො කුසලස්ස නකාමාවචරස්ස ධම්මස්ස ආරම්මණපච්චයෙන පච්චයො. කුසලො නකාමාවචරො ධම්මො අබ්‍යාකතස්ස නකාමාවචරස්ස ධම්මස්ස ආරම්මණපච්චයෙන පච්චයො. (2)
අබ්‍යාකතො නකාමාවචරො ධම්මො අබ්‍යාකතස්ස නකාමාවචරස්ස ධම්මස්ස ආරම්මණපච්චයෙන පච්චයො. අබ්‍යාකතො නකාමාවචරො ධම්මො කුසලස්ස නකාමාවචරස්ස ධම්මස්ස ආරම්මණපච්චයෙන පච්චයො. (2)
34. හෙතුයා ද්වෙ, ආරම්මණෙ චත්තාරි, අධිපතියා තීණි…පෙ… අවිගතෙ ද්වෙ (සංඛිත්තං).
(යථා කුසලත්තිකෙ පඤ්හාවාරං, එවං විත්ථාරෙතබ්බං.)