අප්පීතිකපදං
හෙතුපච්චයො
24. කුසලං අප්පීතිකං ධම්මං පටිච්ච කුසලො අප්පීතිකො ධම්මො උප්පජ්ජති හෙතුපච්චයා… තීණි.
අකුසලං අප්පීතිකං ධම්මං පටිච්ච අකුසලො අප්පීතිකො ධම්මො උප්පජ්ජති හෙතුපච්චයා… තීණි.
අබ්‍යාකතං අප්පීතිකං ධම්මං පටිච්ච අබ්‍යාකතො අප්පීතිකො ධම්මො උප්පජ්ජති හෙතුපච්චයා. (1)
කුසලං අප්පීතිකඤ්ච අබ්‍යාකතං අප්පීතිකඤ්ච ධම්මං පටිච්ච අබ්‍යාකතො අප්පීතිකො ධම්මො උප්පජ්ජති හෙතුපච්චයා. (1)
අකුසලං අප්පීතිකඤ්ච අබ්‍යාකතං අප්පීතිකඤ්ච ධම්මං පටිච්ච අබ්‍යාකතො අප්පීතිකො ධම්මො උප්පජ්ජති හෙතුපච්චයා. (1) (සංඛිත්තං.)
25. හෙතුයා නව, ආරම්මණෙ තීණි…පෙ… අවිගතෙ නව (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).
26. කුසලො අප්පීතිකො ධම්මො කුසලස්ස අප්පීතිකස්ස ධම්මස්ස හෙතුපච්චයෙන පච්චයො (සංඛිත්තං).
හෙතුයා සත්ත, ආරම්මණෙ නව…පෙ… අවිගතෙ තෙරස (සංඛිත්තං. යථා කුසලත්තිකෙ පඤ්හාවාරං, එවං විත්ථාරෙතබ්බං).