1. විභඞ්ගවාරො

හෙතුපච්චයො

1. දස්සනෙන පහාතබ්බං ධම්මං පටිච්ච දස්සනෙන පහාතබ්බො ධම්මො උප්පජ්ජති හෙතුපච්චයා – දස්සනෙන පහාතබ්බං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

දස්සනෙන පහාතබ්බං ධම්මං පටිච්ච නදස්සනෙන පහාතබ්බො ධම්මො උප්පජ්ජති හෙතුපච්චයා – දස්සනෙන පහාතබ්බෙ ඛන්ධෙ පටිච්ච චිත්තසමුට්ඨානං රූපං. (2)

දස්සනෙන පහාතබ්බං ධම්මං පටිච්ච දස්සනෙන පහාතබ්බො ච නදස්සනෙන පහාතබ්බො ච ධම්මා උප්පජ්ජන්ති හෙතුපච්චයා – දස්සනෙන පහාතබ්බං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච…පෙ… ද්වෙ ඛන්ධෙ…පෙ…. (3)

නදස්සනෙන පහාතබ්බං ධම්මං පටිච්ච නදස්සනෙන පහාතබ්බො ධම්මො උප්පජ්ජති හෙතුපච්චයා – නදස්සනෙන පහාතබ්බං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ…. (1)

දස්සනෙන පහාතබ්බඤ්ච නදස්සනෙන පහාතබ්බඤ්ච ධම්මං පටිච්ච නදස්සනෙන පහාතබ්බො ධම්මො උප්පජ්ජති හෙතුපච්චයා – දස්සනෙන පහාතබ්බෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං (සංඛිත්තං). (1)