1. විභඞ්ගවාරො

හෙතුපච්චයො

86. කිලෙසො චෙව සංකිලිට්ඨො ච ධම්මො කිලෙසස්ස චෙව සංකිලිට්ඨස්ස ච ධම්මස්ස හෙතුපච්චයෙන පච්චයො – කිලෙසා චෙව සංකිලිට්ඨා ච හෙතූ සම්පයුත්තකානං කිලෙසානං හෙතුපච්චයෙන පච්චයො. (1)

කිලෙසො චෙව සංකිලිට්ඨො ච ධම්මො සංකිලිට්ඨස්ස චෙව නො ච කිලෙසස්ස ධම්මස්ස හෙතුපච්චයෙන පච්චයො – කිලෙසා චෙව සංකිලිට්ඨා ච හෙතූ සම්පයුත්තකානං ඛන්ධානං හෙතුපච්චයෙන පච්චයො.

කිලෙසො චෙව සංකිලිට්ඨො ච ධම්මො කිලෙසස්ස චෙව සංකිලිට්ඨස්ස ච සංකිලිට්ඨස්ස චෙව නො ච කිලෙසස්ස ච ධම්මස්ස හෙතුපච්චයෙන පච්චයො – කිලෙසා චෙව සංකිලිට්ඨා ච හෙතූ සම්පයුත්තකානං ඛන්ධානං කිලෙසානඤ්ච හෙතුපච්චයෙන පච්චයො. (3)

ආරම්මණපච්චයො

87. කිලෙසො චෙව සංකිලිට්ඨො ච ධම්මො කිලෙසස්ස චෙව සංකිලිට්ඨස්ස ච ධම්මස්ස ආරම්මණපච්චයෙන පච්චයො – කිලෙසෙ ආරබ්භ කිලෙසා උප්පජ්ජන්ති. (මූලං කාතබ්බං.) කිලෙසෙ ආරබ්භ සංකිලිට්ඨා චෙව නො ච කිලෙසා ඛන්ධා උප්පජ්ජන්ති. (මූලං කාතබ්බං.) කිලෙසෙ ආරබ්භ කිලෙසා ච සම්පයුත්තකා ඛන්ධා ච උප්පජ්ජන්ති. (3)

88. සංකිලිට්ඨො චෙව නො ච කිලෙසො ධම්මො සංකිලිට්ඨස්ස චෙව නො ච කිලෙසස්ස ධම්මස්ස ආරම්මණපච්චයෙන පච්චයො – සංකිලිට්ඨෙ චෙව නො ච කිලෙසෙ ඛන්ධෙ ආරබ්භ සංකිලිට්ඨා චෙව නො ච කිලෙසා ඛන්ධා උප්පජ්ජන්ති. (මූලං කාතබ්බං.) සංකිලිට්ඨෙ චෙව නො ච කිලෙසෙ ඛන්ධෙ ආරබ්භ කිලෙසා උප්පජ්ජන්ති. (මූලං කාතබ්බං.) සංකිලිට්ඨෙ චෙව නො ච කිලෙසෙ ඛන්ධෙ ආරබ්භ කිලෙසා ච සම්පයුත්තකා ඛන්ධා ච උප්පජ්ජන්ති. (3)

(ඉතරෙපි තීණි කාතබ්බා.)

අධිපතිපච්චයො

89. කිලෙසො චෙව සංකිලිට්ඨො ච ධම්මො කිලෙසස්ස චෙව සංකිලිට්ඨස්ස ච ධම්මස්ස අධිපතිපච්චයෙන පච්චයො – ආරම්මණාධිපති… තීණි.

සංකිලිට්ඨො චෙව නො ච කිලෙසො ධම්මො සංකිලිට්ඨස්ස චෙව නො ච කිලෙසස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – සංකිලිට්ඨෙ චෙව නො ච කිලෙසෙ ඛන්ධෙ ගරුං කත්වා…පෙ… තීණි. (ද්වෙ අධිපති තීණිපි කාතබ්බා, ඉතරෙ ද්වෙපි තීණි කාතබ්බා.)

අනන්තරපච්චයාදි

90. කිලෙසො චෙව සංකිලිට්ඨො ච ධම්මො කිලෙසස්ස චෙව සංකිලිට්ඨස්ස ච ධම්මස්ස අනන්තරපච්චයෙන පච්චයො (නවපි කාතබ්බා, ආවජ්ජනාපි වුට්ඨානම්පි නත්ථි)… සමනන්තරපච්චයෙන පච්චයො… සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො… උපනිස්සයපච්චයෙන පච්චයො… නව පඤ්හා (පුරෙජාතපච්චයො පච්ඡාජාතපච්චයොපි නත්ථි)… ආසෙවනපච්චයෙන පච්චයො.

කම්මපච්චයාදි

91. සංකිලිට්ඨො චෙව නො ච කිලෙසො ධම්මො සංකිලිට්ඨස්ස චෙව නො ච කිලෙසස්ස ධම්මස්ස කම්මපච්චයෙන පච්චයො – සංකිලිට්ඨා චෙව නො ච කිලෙසා චෙතනා සම්පයුත්තකානං ඛන්ධානං කම්මපච්චයෙන පච්චයො. (1)

සංකිලිට්ඨො චෙව නො ච කිලෙසො ධම්මො කිලෙසස්ස චෙව සංකිලිට්ඨස්ස ච ධම්මස්ස කම්මපච්චයෙන පච්චයො – සංකිලිට්ඨා චෙව නො ච කිලෙසා චෙතනා සම්පයුත්තකානං කිලෙසානං කම්මපච්චයෙන පච්චයො. (2)

සංකිලිට්ඨො චෙව නො ච කිලෙසො ධම්මො කිලෙසස්ස චෙව සංකිලිට්ඨස්ස ච සංකිලිට්ඨස්ස චෙව නො ච කිලෙසස්ස ධම්මස්ස කම්මපච්චයෙන පච්චයො – සංකිලිට්ඨා චෙව නො ච කිලෙසා චෙතනා සම්පයුත්තකානං ඛන්ධානං කිලෙසානඤ්ච කම්මපච්චයෙන පච්චයො. (3)

ආහාරපච්චයෙන පච්චයො… තීණි… ඉන්ද්‍රියපච්චයෙන පච්චයො… තීණි… ඣානපච්චයෙන පච්චයො… තීණි… මග්ගපච්චයෙන පච්චයො… නව… සම්පයුත්තපච්චයෙන පච්චයො… නව… අත්ථිපච්චයෙන පච්චයො… නව… නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො… නව.