1. විභඞ්ගවාරො

නහෙතුපච්චයො

5. කිලෙසං ධම්මං පටිච්ච කිලෙසො ධම්මො උප්පජ්ජති නහෙතුපච්චයා – විචිකිච්ඡං පටිච්ච මොහො, උද්ධච්චං පටිච්ච මොහො. (1)

නොකිලෙසං ධම්මං පටිච්ච නොකිලෙසො ධම්මො උප්පජ්ජති නහෙතුපච්චයා – අහෙතුකං නොකිලෙසං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා). (1)

නොකිලෙසං ධම්මං පටිච්ච කිලෙසො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (2)

කිලෙසඤ්ච නොකිලෙසඤ්ච ධම්මං පටිච්ච කිලෙසො ධම්මො උප්පජ්ජති නහෙතුපච්චයා – විචිකිච්ඡාසහගතෙ ඛන්ධෙ ච විචිකිච්ඡඤ්ච පටිච්ච විචිකිච්ඡාසහගතො මොහො, උද්ධච්චසහගතෙ ඛන්ධෙ ච උද්ධච්චඤ්ච පටිච්ච උද්ධච්චසහගතො මොහො. (1)

නආරම්මණපච්චයාදි

6. කිලෙසං ධම්මං පටිච්ච නොකිලෙසො ධම්මො උප්පජ්ජති නආරම්මණපච්චයා – කිලෙසෙ පටිච්ච චිත්තසමුට්ඨානං රූපං. (1)

නොකිලෙසං ධම්මං පටිච්ච නොකිලෙසො ධම්මො උප්පජ්ජති නආරම්මණපච්චයා – නොකිලෙසෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… ඛන්ධෙ පටිච්ච වත්ථු (යාව අසඤ්ඤසත්තා). (1)

කිලෙසඤ්ච නොකිලෙසඤ්ච ධම්මං පටිච්ච නොකිලෙසො ධම්මො උප්පජ්ජති නආරම්මණපච්චයා – කිලෙසෙ ච සම්පයුත්තකෙ ච ඛන්ධෙ පටිච්ච චිත්තසමුට්ඨානං රූපං, කිලෙසෙ ච මහාභූතෙ ච පටිච්ච චිත්තසමුට්ඨානං රූපං. (1)

නඅධිපතිපච්චයා… නඅනන්තරපච්චයා… නසමනන්තරපච්චයා… නඅඤ්ඤමඤ්ඤපච්චයා… නඋපනිස්සයපච්චයා.

නපුරෙජාතපච්චයාදි

7. කිලෙසං ධම්මං පටිච්ච කිලෙසො ධම්මො උප්පජ්ජති නපුරෙජාතපච්චයා – අරූපෙ ලොභං පටිච්ච මොහො දිට්ඨි ථිනං උද්ධච්චං අහිරිකං අනොත්තප්පං, ලොභං පටිච්ච මොහො දිට්ඨි උද්ධච්චං අහිරිකං අනොත්තප්පං, ලොභං පටිච්ච මොහො මානො ථිනං උද්ධච්චං අහිරිකං අනොත්තප්පං, ලොභං පටිච්ච මොහො මානො උද්ධච්චං අහිරිකං අනොත්තප්පං, ලොභං පටිච්ච මොහො ථිනං උද්ධච්චං අහිරිකං අනොත්තප්පං, ලොභං පටිච්ච මොහො උද්ධච්චං අහිරිකං අනොත්තප්පං; විචිකිච්ඡං පටිච්ච මොහො උද්ධච්චං අහිරිකං අනොත්තප්පං; උද්ධච්චං පටිච්ච මොහො අහිරිකං අනොත්තප්පං (අරූපෙ දොසමූලකං නත්ථි). (1)

කිලෙසං ධම්මං පටිච්ච නොකිලෙසො ධම්මො උප්පජ්ජති නපුරෙජාතපච්චයා – අරූපෙ කිලෙසෙ පටිච්ච සම්පයුත්තකා ඛන්ධා, කිලෙසෙ පටිච්ච චිත්තසමුට්ඨානං රූපං (එවං නවපි පඤ්හා කාතබ්බා), නපච්ඡාජාතපච්චයා, නආසෙවනපච්චයා.

නකම්මපච්චයො

8. කිලෙසං ධම්මං පටිච්ච නොකිලෙසො ධම්මො උප්පජ්ජති නකම්මපච්චයා – කිලෙසෙ පටිච්ච සම්පයුත්තකා චෙතනා. (1)

නොකිලෙසං ධම්මං පටිච්ච නොකිලෙසො ධම්මො උප්පජ්ජති නකම්මපච්චයා – නොකිලෙසෙ ඛන්ධෙ පටිච්ච සම්පයුත්තකා චෙතනා; බාහිරං… ආහාරසමුට්ඨානං… උතුසමුට්ඨානං…පෙ…. (1)

කිලෙසඤ්ච නොකිලෙසඤ්ච ධම්මං පටිච්ච නොකිලෙසො ධම්මො උප්පජ්ජති නකම්මපච්චයා – කිලෙසෙ ච සම්පයුත්තකෙ ච ඛන්ධෙ පටිච්ච සම්පයුත්තකා චෙතනා. (1) (එවං සබ්බෙ පච්චයා කාතබ්බා.)