1. විභඞ්ගවාරො

හෙතුපච්චයො

80. කිලෙසඤ්චෙව සංකිලිට්ඨඤ්ච ධම්මං පටිච්ච කිලෙසො චෙව සංකිලිට්ඨො ච ධම්මො උප්පජ්ජති හෙතුපච්චයා – ලොභං පටිච්ච මොහො දිට්ඨි ථිනං උද්ධච්චං අහිරිකං අනොත්තප්පං (චක්කං). (1)

කිලෙසඤ්චෙව සංකිලිට්ඨඤ්ච ධම්මං පටිච්ච සංකිලිට්ඨො චෙව නො ච කිලෙසො ධම්මො උප්පජ්ජති හෙතුපච්චයා – කිලෙසෙ පටිච්ච සම්පයුත්තකා ඛන්ධා. (2)

කිලෙසඤ්චෙව සංකිලිට්ඨඤ්ච ධම්මං පටිච්ච කිලෙසො චෙව සංකිලිට්ඨො ච සංකිලිට්ඨො චෙව නො ච කිලෙසො ච ධම්මා උප්පජ්ජන්ති හෙතුපච්චයා – ලොභං පටිච්ච මොහො දිට්ඨි ථිනං උද්ධච්චං අහිරිකං අනොත්තප්පං සම්පයුත්තකා ච ඛන්ධා (චක්කං). (3)

81. සංකිලිට්ඨඤ්චෙව නො ච කිලෙසං ධම්මං පටිච්ච සංකිලිට්ඨො චෙව නො ච කිලෙසො ධම්මො උප්පජ්ජති හෙතුපච්චයා – සංකිලිට්ඨඤ්චෙව නො ච කිලෙසං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

සංකිලිට්ඨඤ්චෙව නො ච කිලෙසං ධම්මං පටිච්ච කිලෙසො චෙව සංකිලිට්ඨො ච ධම්මො උප්පජ්ජති හෙතුපච්චයා – සංකිලිට්ඨෙ චෙව නො ච කිලෙසෙ ඛන්ධෙ පටිච්ච කිලෙසා. (2)

සංකිලිට්ඨඤ්චෙව නො ච කිලෙසං ධම්මං පටිච්ච කිලෙසො චෙව සංකිලිට්ඨො ච සංකිලිට්ඨො චෙව නො ච කිලෙසො ච ධම්මා උප්පජ්ජන්ති හෙතුපච්චයා – සංකිලිට්ඨඤ්චෙව නො ච කිලෙසං එකං ඛන්ධං පටිච්ච තයො ඛන්ධා කිලෙසා ච…පෙ… ද්වෙ ඛන්ධෙ…පෙ…. (3)

82. කිලෙසඤ්චෙව සංකිලිට්ඨඤ්ච සංකිලිට්ඨඤ්චෙව නො ච කිලෙසඤ්ච ධම්මං පටිච්ච කිලෙසො චෙව සංකිලිට්ඨො ච ධම්මො උප්පජ්ජති හෙතුපච්චයා – ලොභඤ්ච සම්පයුත්තකෙ ච ඛන්ධෙ පටිච්ච මොහො දිට්ඨි ථිනං උද්ධච්චං අහිරිකං අනොත්තප්පං (චක්කං). (1)

කිලෙසඤ්චෙව සංකිලිට්ඨඤ්ච සංකිලිට්ඨඤ්චෙව නො ච කිලෙසඤ්ච ධම්මං පටිච්ච සංකිලිට්ඨො චෙව නො ච කිලෙසො ධම්මො උප්පජ්ජති හෙතුපච්චයා – සංකිලිට්ඨඤ්චෙව නො ච කිලෙසං එකං ඛන්ධඤ්ච කිලෙසෙ ච පටිච්ච තයො ඛන්ධා…පෙ… ද්වෙ ඛන්ධෙ ච…පෙ…. (2)

කිලෙසඤ්චෙව සංකිලිට්ඨඤ්ච සංකිලිට්ඨඤ්චෙව නො ච කිලෙසඤ්ච ධම්මං පටිච්ච කිලෙසො චෙව සංකිලිට්ඨො ච සංකිලිට්ඨො චෙව නො ච කිලෙසො ච ධම්මා උප්පජ්ජන්ති හෙතුපච්චයා – සංකිලිට්ඨඤ්චෙව නො ච කිලෙසං එකං ඛන්ධඤ්ච ලොභඤ්ච පටිච්ච තයො ඛන්ධා මොහො දිට්ඨි ථිනං උද්ධච්චං අහිරිකං අනොත්තප්පං…පෙ… ද්වෙ ඛන්ධෙ ච…පෙ… (චක්කං). (3)