1. විභඞ්ගවාරො

හෙතුපච්චයො

75. කිලෙසො චෙව සංකිලෙසිකො ච ධම්මො කිලෙසස්ස චෙව සංකිලෙසිකස්ස ච ධම්මස්ස හෙතුපච්චයෙන පච්චයො – කිලෙසා චෙව සංකිලෙසිකා ච හෙතූ සම්පයුත්තකානං කිලෙසානං හෙතුපච්චයෙන පච්චයො (එවං චත්තාරි, කිලෙසදුකසදිසං.) (4)

ආරම්මණපච්චයො

76. කිලෙසො චෙව සංකිලෙසිකො ච ධම්මො කිලෙසස්ස චෙව සංකිලෙසිකස්ස ච ධම්මස්ස ආරම්මණපච්චයෙන පච්චයො – කිලෙසෙ ආරබ්භ කිලෙසා උප්පජ්ජන්ති. (මූලං කාතබ්බං.) කිලෙසෙ ආරබ්භ සංකිලෙසිකා චෙව නො ච කිලෙසා ඛන්ධා උප්පජ්ජන්ති. (මූලං කාතබ්බං.) කිලෙසෙ ආරබ්භ කිලෙසා ච සම්පයුත්තකා ච ඛන්ධා උප්පජ්ජන්ති. (3)

77. සංකිලෙසිකො චෙව නො ච කිලෙසො ධම්මො සංකිලෙසිකස්ස චෙව නො ච කිලෙසස්ස ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං…පෙ… පුබ්බෙ සුචිණ්ණානි…පෙ… ඣානා වුට්ඨහිත්වා ඣානං පච්චවෙක්ඛති, අස්සාදෙති අභිනන්දති, තං ආරබ්භ රාගො උප්පජ්ජති…පෙ… උද්ධච්චං උප්පජ්ජති, ඣානෙ පරිහීනෙ විප්පටිසාරිස්ස දොමනස්සං උප්පජ්ජති; අරියා ගොත්‍රභුං පච්චවෙක්ඛන්ති, වොදානං පච්චවෙක්ඛන්ති, චක්ඛුං…පෙ… වත්ථුං සංකිලෙසිකෙ චෙව නො ච කිලෙසෙ ඛන්ධෙ අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති…පෙ… ආවජ්ජනාය ආරම්මණපච්චයෙන පච්චයො (ඉතරෙ ද්වෙ කිලෙසදුකසදිසා, ඝටනාරම්මණාපි කිලෙසදුකසදිසා).

අධිපතිපච්චයො

78. කිලෙසො චෙව සංකිලෙසිකො ච ධම්මො කිලෙසස්ස චෙව සංකිලෙසිකස්ස ච ධම්මස්ස අධිපතිපච්චයෙන පච්චයො – ආරම්මණාධිපති… තීණි.

සංකිලෙසිකො චෙව නො ච කිලෙසො ධම්මො සංකිලෙසිකස්ස චෙව නො ච කිලෙසස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං…පෙ… පුබ්බෙ සුචිණ්ණානි…පෙ… ඣානා වුට්ඨහිත්වා ඣානං ගරුං කත්වා පච්චවෙක්ඛති, සෙක්ඛා ගොත්‍රභුං ගරුං කත්වා පච්චවෙක්ඛන්ති, වොදානං ගරුං කත්වා පච්චවෙක්ඛන්ති; චක්ඛුං…පෙ… වත්ථුං සංකිලෙසිකෙ චෙව නො ච කිලෙසෙ ඛන්ධෙ ගරුං කත්වා සංකිලෙසිකා චෙව නො ච කිලෙසා ඛන්ධා උප්පජ්ජන්ති. සහජාතාධිපති – සංකිලෙසිකා චෙව නො ච කිලෙසාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (ඉතරෙ ද්වෙපි කිලෙසදුකසදිසා. ඝටනාධිපතිපි.)

අනන්තරපච්චයාදි

79. කිලෙසො චෙව සංකිලෙසිකො ච ධම්මො කිලෙසස්ස චෙව සංකිලෙසිකස්ස ච ධම්මස්ස අනන්තරපච්චයෙන පච්චයො… තීණි (කිලෙසදුකසදිසා).

සංකිලෙසිකො චෙව නො ච කිලෙසො ධම්මො සංකිලෙසිකස්ස චෙව නො ච කිලෙසස්ස ධම්මස්ස අනන්තරපච්චයෙන පච්චයො – පුරිමා පුරිමා සංකිලෙසිකා චෙව නො ච කිලෙසා ඛන්ධා පච්ඡිමානං පච්ඡිමානං සංකිලෙසිකානඤ්චෙව නො ච කිලෙසානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස… අනුලොමං වොදානස්ස… ආවජ්ජනා සංකිලෙසිකානඤ්චෙව නො ච කිලෙසානං ඛන්ධානං අනන්තරපච්චයෙන පච්චයො.

(ඉතරෙ ද්වෙ අනන්තරා කිලෙසදුකසදිසා, නින්නානාකරණා. ඝටනානන්තරම්පි සබ්බෙ පච්චයා කිලෙසදුකසදිසා, නින්නානාකරණා. උපනිස්සයෙ ලොකුත්තරං නත්ථි, ඉදං දුකං කිලෙසදුකසදිසං, නින්නානාකරණං.)

කිලෙසසංකිලෙසිකදුකං නිට්ඨිතං.