1. පටිච්චවාරො

හෙතුපච්චයො

74. කිලෙසඤ්චෙව සංකිලෙසිකඤ්ච ධම්මං පටිච්ච කිලෙසො චෙව සංකිලෙසිකො ච ධම්මො උප්පජ්ජති හෙතුපච්චයා – ලොභං පටිච්ච මොහො දිට්ඨි ථිනං උද්ධච්චං අහිරිකං අනොත්තප්පං (චක්කං). (1)

කිලෙසඤ්චෙව සංකිලෙසිකඤ්ච ධම්මං පටිච්ච සංකිලෙසිකො චෙව නො ච කිලෙසො ධම්මො උප්පජ්ජති හෙතුපච්චයා – කිලෙසෙ පටිච්ච සම්පයුත්තකා ඛන්ධා චිත්තසමුට්ඨානඤ්ච රූපං. (2)

කිලෙසඤ්චෙව සංකිලෙසිකඤ්ච ධම්මං පටිච්ච කිලෙසො චෙව සංකිලෙසිකො ච සංකිලෙසිකො චෙව නො ච කිලෙසො ච ධම්මා උප්පජ්ජන්ති හෙතුපච්චයා – ලොභං පටිච්ච මොහො දිට්ඨි ථිනං උද්ධච්චං අහිරිකං අනොත්තප්පං සම්පයුත්තකා ච ඛන්ධා චිත්තසමුට්ඨානඤ්ච රූපං. (3)