1-4. පච්චයානුලොමාදි

හෙතුපච්චයො

346. සරණං ධම්මං පටිච්ච සරණො ධම්මො උප්පජ්ජති හෙතුපච්චයා – සරණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (පඤ්ච පඤ්හා අරූපාවචරදුකසදිසා, අනුලොමපටිච්චසදිසා.)

හෙතුයා පඤ්ච, ආරම්මණෙ ද්වෙ, අධිපතියා පඤ්ච…පෙ… අවිගතෙ පඤ්ච.

අනුලොමං.

සරණං ධම්මං පටිච්ච සරණො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

අරණං ධම්මං පටිච්ච අරණො ධම්මො උප්පජ්ජති නහෙතුපච්චයා – අහෙතුකං අරණං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා). (1)

නහෙතුයා ද්වෙ, නආරම්මණෙ තීණි, නඅධිපතියා පඤ්ච, නඅනන්තරෙ තීණි, නඋපනිස්සයෙ තීණි, නපුරෙජාතෙ චත්තාරි, නපච්ඡාජාතෙ පඤ්ච, නආසෙවනෙ පඤ්ච, නකම්මෙ ද්වෙ, නවිපාකෙ පඤ්ච, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ එකං, නසම්පයුත්තෙ තීණි, නවිප්පයුත්තෙ ද්වෙ, නොනත්ථියා තීණි, නොවිගතෙ තීණි.

පච්චනීයං.