1. විභඞ්ගවාරො
නහෙතුපච්චයො
309. අනිය්‍යානිකං ධම්මං පච්චයා අනිය්‍යානිකො ධම්මො උප්පජ්ජති නහෙතුපච්චයා – අහෙතුකං අනිය්‍යානිකං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… (යාව අසඤ්ඤසත්තා) චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා අනිය්‍යානිකා ඛන්ධා, විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)
නආරම්මණපච්චයාදි
310. නිය්‍යානිකං ධම්මං පච්චයා අනිය්‍යානිකො ධම්මො උප්පජ්ජති නආරම්මණපච්චයා… තීණි.
නිය්‍යානිකං ධම්මං පච්චයා නිය්‍යානිකො ධම්මො උප්පජ්ජති නඅධිපතිපච්චයා – නිය්‍යානිකෙ ඛන්ධෙ පච්චයා නිය්‍යානිකාධිපති. (1)
අනිය්‍යානිකං ධම්මං පච්චයා අනිය්‍යානිකො ධම්මො උප්පජ්ජති නඅධිපතිපච්චයා – අනිය්‍යානිකං එකං ඛන්ධං පච්චයා…පෙ… (යාව අසඤ්ඤසත්තා) චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අනිය්‍යානිකා ඛන්ධා. අනිය්‍යානිකං ධම්මං පච්චයා නිය්‍යානිකො ධම්මො උප්පජ්ජති නඅධිපතිපච්චයා – වත්ථුං පච්චයා නිය්‍යානිකාධිපති. (2)
නිය්‍යානිකඤ්ච අනිය්‍යානිකඤ්ච ධම්මං පච්චයා නිය්‍යානිකො ධම්මො උප්පජ්ජති නඅධිපතිපච්චයා – නිය්‍යානිකෙ ඛන්ධෙ ච වත්ථුඤ්ච පච්චයා නිය්‍යානිකාධිපති. (1)