1. විභඞ්ගවාරො
300. නිය්‍යානිකං ධම්මං පටිච්ච නිය්‍යානිකො ධම්මො උප්පජ්ජති හෙතුපච්චයා – නිය්‍යානිකං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. නිය්‍යානිකං ධම්මං පටිච්ච අනිය්‍යානිකො ධම්මො උප්පජ්ජති හෙතුපච්චයා – නිය්‍යානිකෙ ඛන්ධෙ පටිච්ච චිත්තසමුට්ඨානං රූපං. නිය්‍යානිකං ධම්මං පටිච්ච නිය්‍යානිකො ච අනිය්‍යානිකො ච ධම්මා උප්පජ්ජන්ති හෙතුපච්චයා – නිය්‍යානිකං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)
අනිය්‍යානිකං ධම්මං පටිච්ච අනිය්‍යානිකො ධම්මො උප්පජ්ජති හෙතුපච්චයා – අනිය්‍යානිකං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ…. (1)
නිය්‍යානිකඤ්ච අනිය්‍යානිකඤ්ච ධම්මං පටිච්ච අනිය්‍යානිකො ධම්මො උප්පජ්ජති හෙතුපච්චයා – නිය්‍යානිකෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)