1. විභඞ්ගවාරො

හෙතුපච්චයො

265. අරූපාවචරං ධම්මං පටිච්ච අරූපාවචරො ධම්මො උප්පජ්ජති හෙතුපච්චයා – අරූපාවචරං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. අරූපාවචරං ධම්මං පටිච්ච නඅරූපාවචරො ධම්මො උප්පජ්ජති හෙතුපච්චයා – අරූපාවචරෙ ඛන්ධෙ පටිච්ච චිත්තසමුට්ඨානං රූපං. අරූපාවචරං ධම්මං පටිච්ච අරූපාවචරො ච නඅරූපාවචරො ච ධම්මා උප්පජ්ජන්ති හෙතුපච්චයා – අරූපාවචරං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ…. (3)

266. නඅරූපාවචරං ධම්මං පටිච්ච නඅරූපාවචරො ධම්මො උප්පජ්ජති හෙතුපච්චයා – නඅරූපාවචරං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං …පෙ… ද්වෙ ඛන්ධෙ…පෙ… පටිසන්ධික්ඛණෙ නඅරූපාවචරං එකං ඛන්ධං පටිච්ච තයො ඛන්ධා කටත්තා ච රූපං…පෙ… ද්වෙ ඛන්ධෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා, එකං මහාභූතං…පෙ…. (1)

අරූපාවචරඤ්ච නඅරූපාවචරඤ්ච ධම්මං පටිච්ච නඅරූපාවචරො ධම්මො උප්පජ්ජති හෙතුපච්චයා – අරූපාවචරෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1) (සංඛිත්තං.)