1. විභඞ්ගවාරො

හෙතුපච්චයො

245. රූපාවචරො ධම්මො රූපාවචරස්ස ධම්මස්ස හෙතුපච්චයෙන පච්චයො – රූපාවචරා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං.) රූපාවචරා හෙතූ චිත්තසමුට්ඨානානං රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං.) රූපාවචරා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (3)

නරූපාවචරො ධම්මො නරූපාවචරස්ස ධම්මස්ස හෙතුපච්චයෙන පච්චයො – නරූපාවචරා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

ආරම්මණපච්චයො

246. රූපාවචරො ධම්මො රූපාවචරස්ස ධම්මස්ස ආරම්මණපච්චයෙන පච්චයො – චෙතොපරියඤාණෙන රූපාවචරචිත්තසමඞ්ගිස්ස චිත්තං ජානාති, රූපාවචරා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආරම්මණපච්චයෙන පච්චයො. රූපාවචරො ධම්මො නරූපාවචරස්ස ධම්මස්ස ආරම්මණපච්චයෙන පච්චයො – පඨමං ඣානං පච්චවෙක්ඛති…පෙ… චතුත්ථං ඣානං පච්චවෙක්ඛති, දිබ්බං චක්ඛුං පච්චවෙක්ඛති, දිබ්බං සොතධාතුං…පෙ… ඉද්ධිවිධඤාණං…පෙ… චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අනාගතංසඤාණං පච්චවෙක්ඛති, රූපාවචරෙ ඛන්ධෙ අනිච්චතො…පෙ… දොමනස්සං උප්පජ්ජති. (2)

247. නරූපාවචරො ධම්මො නරූපාවචරස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං…පෙ… පුබ්බෙ සුචිණ්ණානි පච්චවෙක්ඛති අස්සාදෙති අභිනන්දති, තං ආරබ්භ රාගො…පෙ… දොමනස්සං උප්පජ්ජති; අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති, නිබ්බානං පච්චවෙක්ඛන්ති, නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො; අරියා පහීනෙ කිලෙසෙ…පෙ… වික්ඛම්භිතෙ කිලෙසෙ…පෙ… පුබ්බෙ…පෙ… චක්ඛුං…පෙ… වත්ථුං නරූපාවචරෙ ඛන්ධෙ අනිච්චතො…පෙ… දොමනස්සං උප්පජ්ජති; ආකාසානඤ්චායතනං විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස ආරම්මණපච්චයෙන පච්චයො. (1)

නරූපාවචරො ධම්මො රූපාවචරස්ස ධම්මස්ස ආරම්මණපච්චයෙන පච්චයො – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන නරූපාවචරචිත්තසමඞ්ගිස්ස චිත්තං ජානාති, නරූපාවචරා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආරම්මණපච්චයෙන පච්චයො. (2)

අධිපතිපච්චයො

248. රූපාවචරො ධම්මො රූපාවචරස්ස ධම්මස්ස අධිපතිපච්චයෙන පච්චයො. සහජාතාධිපති – රූපාවචරාධිපති සම්පයුත්තකානං ඛන්ධානං අධිපතිපච්චයෙන පච්චයො. රූපාවචරො ධම්මො නරූපාවචරස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – පඨමං ඣානං ගරුං කත්වා පච්චවෙක්ඛති, අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති…පෙ… චතුත්ථං ඣානං…පෙ… දිබ්බං චක්ඛුං…පෙ… දිබ්බං සොතධාතුං…පෙ… ඉද්ධිවිධඤාණං…පෙ… චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අනාගතංසඤාණං ගරුං කත්වා පච්චවෙක්ඛති අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති, රූපාවචරෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – රූපාවචරාධිපති චිත්තසමුට්ඨානානං රූපානං අධිපතිපච්චයෙන පච්චයො. රූපාවචරො ධම්මො රූපාවචරස්ස ච නරූපාවචරස්ස ච ධම්මස්ස අධිපතිපච්චයෙන පච්චයො. සහජාතාධිපති – රූපාවචරාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

249. නරූපාවචරො ධම්මො නරූපාවචරස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං…පෙ… පුබ්බෙ සුචිණ්ණානි ගරුං කත්වා පච්චවෙක්ඛති අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති; අරියා මග්ගා වුට්ඨහිත්වා මග්ගං ගරුං කත්වා…පෙ… ඵලං…පෙ… නිබ්බානං ගරුං කත්වා පච්චවෙක්ඛන්ති, නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස අධිපතිපච්චයෙන පච්චයො; චක්ඛුං…පෙ… වත්ථුං නරූපාවචරෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති; ආකාසානඤ්චායතනං ගරුං කත්වා පච්චවෙක්ඛති…පෙ… නෙවසඤ්ඤානාසඤ්ඤායතනං ගරුං කත්වා පච්චවෙක්ඛති. සහජාතාධිපති – නරූපාවචරාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

අනන්තරපච්චයාදි

250. රූපාවචරො ධම්මො රූපාවචරස්ස ධම්මස්ස අනන්තරපච්චයෙන පච්චයො – පුරිමා පුරිමා රූපාවචරා ඛන්ධා පච්ඡිමානං පච්ඡිමානං රූපාවචරානං ඛන්ධානං අනන්තරපච්චයෙන පච්චයො. රූපාවචරො ධම්මො නරූපාවචරස්ස ධම්මස්ස අනන්තරපච්චයෙන පච්චයො – රූපාවචරං චුතිචිත්තං නරූපාවචරස්ස උපපත්තිචිත්තස්ස අනන්තරපච්චයෙන පච්චයො; රූපාවචරං භවඞ්ගං ආවජ්ජනාය… රූපාවචරා ඛන්ධා නරූපාවචරස්ස වුට්ඨානස්ස අනන්තරපච්චයෙන පච්චයො. (2)

251. නරූපාවචරො ධම්මො නරූපාවචරස්ස ධම්මස්ස අනන්තරපච්චයෙන පච්චයො – පුරිමා පුරිමා නරූපාවචරා ඛන්ධා පච්ඡිමානං පච්ඡිමානං නරූපාවචරානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස…පෙ… නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. නරූපාවචරො ධම්මො රූපාවචරස්ස ධම්මස්ස අනන්තරපච්චයෙන පච්චයො – නරූපාවචරං චුතිචිත්තං රූපාවචරස්ස උපපත්තිචිත්තස්ස අනන්තරපච්චයෙන පච්චයො; නරූපාවචරා ඛන්ධා රූපාවචරස්ස වුට්ඨානස්ස අනන්තරපච්චයෙන පච්චයො; පඨමස්ස ඣානස්ස පරිකම්මං පඨමස්ස ඣානස්ස අනන්තරපච්චයෙන පච්චයො…පෙ… චතුත්ථස්ස ඣානස්ස…පෙ… දිබ්බස්ස චක්ඛුස්ස…පෙ… දිබ්බාය සොතධාතුයා…පෙ… ඉද්ධිවිධඤාණස්ස…පෙ… චෙතොපරියඤාණස්ස…පෙ… පුබ්බෙනිවාසානුස්සතිඤාණස්ස…පෙ… යථාකම්මූපගඤාණස්ස…පෙ… අනාගතංසඤාණස්ස, පරිකම්මං අනාගතංසඤාණස්ස අනන්තරපච්චයෙන පච්චයො. (2)

සමනන්තරපච්චයෙන පච්චයො… සහජාතපච්චයෙන පච්චයො… සත්ත… අඤ්ඤමඤ්ඤපච්චයෙන පච්චයො… ඡ… නිස්සයපච්චයෙන පච්චයො… සත්ත.

උපනිස්සයපච්චයො

252. රූපාවචරො ධම්මො රූපාවචරස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – රූපාවචරං සද්ධං උපනිස්සාය රූපාවචරං ඣානං උප්පාදෙති, අභිඤ්ඤං…පෙ… සමාපත්තිං උප්පාදෙති; රූපාවචරං සීලං…පෙ… පඤ්ඤං උපනිස්සාය රූපාවචරං ඣානං…පෙ… අභිඤ්ඤං…පෙ… සමාපත්තිං උප්පාදෙති; රූපාවචරා සද්ධා…පෙ… පඤ්ඤා රූපාවචරාය සද්ධාය…පෙ… පඤ්ඤාය උපනිස්සයපච්චයෙන පච්චයො, පඨමං ඣානං දුතියස්ස ඣානස්ස උපනිස්සයපච්චයෙන පච්චයො, දුතියං ඣානං තතියස්ස ඣානස්ස…පෙ… තතියං ඣානං චතුත්ථස්ස ඣානස්ස උපනිස්සයපච්චයෙන පච්චයො. (1)

රූපාවචරො ධම්මො නරූපාවචරස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – රූපාවචරං සද්ධං උපනිස්සාය දානං දෙති, සීලං…පෙ… උපොසථකම්මං කරොති; රූපාවචරං ඣානං…පෙ… විපස්සනං…පෙ… මග්ගං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති; රූපාවචරං සීලං…පෙ… පඤ්ඤං උපනිස්සාය දානං දෙති…පෙ… මානං ජප්පෙති, දිට්ඨිං ගණ්හාති; රූපාවචරා සද්ධා…පෙ… පඤ්ඤා නරූපාවචරාය සද්ධාය…පෙ… පඤ්ඤාය… රාගස්ස…පෙ… පත්ථනාය… කායිකස්ස සුඛස්ස… කායිකස්ස දුක්ඛස්ස… මග්ගස්ස, ඵලසමාපත්තියා උපනිස්සයපච්චයෙන පච්චයො. (2)

253. නරූපාවචරො ධම්මො නරූපාවචරස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – නරූපාවචරං සද්ධං උපනිස්සාය දානං…පෙ… සීලං…පෙ… උපොසථකම්මං කරොති; නරූපාවචරං ඣානං…පෙ… විපස්සනං…පෙ… මග්ගං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති; නරූපාවචරං සීලං…පෙ… පඤ්ඤං, රාගං…පෙ… භොජනං, සෙනාසනං උපනිස්සාය දානං දෙති…පෙ… පාණං හනති…පෙ… සඞ්ඝං භින්දති; නරූපාවචරා සද්ධා…පෙ… පඤ්ඤා… රාගො…පෙ… සෙනාසනං නරූපාවචරාය සද්ධාය…පෙ… පඤ්ඤාය… රාගස්ස…පෙ… පත්ථනාය… කායිකස්ස සුඛස්ස… කායිකස්ස දුක්ඛස්ස… මග්ගස්ස, ඵලසමාපත්තියා උපනිස්සයපච්චයෙන පච්චයො. (1)

නරූපාවචරො ධම්මො රූපාවචරස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – නරූපාවචරං සද්ධං උපනිස්සාය රූපාවචරං ඣානං…පෙ… අභිඤ්ඤං …පෙ… සමාපත්තිං උප්පාදෙති; නරූපාවචරං සීලං…පෙ… සෙනාසනං උපනිස්සාය රූපාවචරං ඣානං…පෙ… අභිඤ්ඤං…පෙ… සමාපත්තිං උප්පාදෙති; නරූපාවචරා සද්ධා…පෙ… සෙනාසනං රූපාවචරාය සද්ධාය…පෙ… පඤ්ඤාය උපනිස්සයපච්චයෙන පච්චයො, පඨමස්ස ඣානස්ස පරිකම්මං පඨමස්ස ඣානස්ස උපනිස්සයපච්චයෙන පච්චයො…පෙ… චතුත්ථස්ස ඣානස්ස…පෙ… දිබ්බස්ස චක්ඛුස්ස පරිකම්මං…පෙ… දිබ්බාය සොතධාතුයා…පෙ… ඉද්ධිවිධඤාණස්ස…පෙ… චෙතොපරියඤාණස්ස…පෙ… පුබ්බෙනිවාසානුස්සතිඤාණස්ස…පෙ… යථාකම්මූපගඤාණස්ස…පෙ… අනාගතංසඤාණස්ස පරිකම්මං අනාගතංසඤාණස්ස උපනිස්සයපච්චයෙන පච්චයො. (2)

පුරෙජාතපච්චයාදි

254. නරූපාවචරො ධම්මො නරූපාවචරස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං …පෙ… වත්ථුං අනිච්චතො…පෙ… දොමනස්සං උප්පජ්ජති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස පුරෙජාතපච්චයෙන පච්චයො. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස පුරෙජාතපච්චයෙන පච්චයො; වත්ථු නරූපාවචරානං ඛන්ධානං පුරෙජාතපච්චයෙන පච්චයො. නරූපාවචරො ධම්මො රූපාවචරස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. වත්ථුපුරෙජාතං – වත්ථු රූපාවචරානං ඛන්ධානං පුරෙජාතපච්චයෙන පච්චයො. (2)

පච්ඡාජාතපච්චයෙන පච්චයො… ද්වෙ… ආසෙවනපච්චයෙන පච්චයො… තීණි.

කම්මපච්චයාදි

255. රූපාවචරො ධම්මො රූපාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – රූපාවචරා චෙතනා සම්පයුත්තකානං ඛන්ධානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – රූපාවචරා චෙතනා විපාකානං රූපාවචරානං ඛන්ධානං කම්මපච්චයෙන පච්චයො. රූපාවචරො ධම්මො නරූපාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – රූපාවචරා චෙතනා චිත්තසමුට්ඨානානං රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – රූපාවචරා චෙතනා කටත්තාරූපානං කම්මපච්චයෙන පච්චයො. රූපාවචරො ධම්මො රූපාවචරස්ස ච නරූපාවචරස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – රූපාවචරා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – රූපාවචරා චෙතනා විපාකානං රූපාවචරානං ඛන්ධානං කටත්තා ච රූපානං කම්මපච්චයෙන පච්චයො. (3)

නරූපාවචරො ධම්මො නරූපාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නරූපාවචරා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – නරූපාවචරා චෙතනා විපාකානං නරූපාවචරානං ඛන්ධානං කටත්තා ච රූපානං කම්මපච්චයෙන පච්චයො…. (1)

විපාකපච්චයෙන පච්චයො… චත්තාරි… ආහාරපච්චයෙන පච්චයො… චත්තාරි… ඉන්ද්‍රියපච්චයෙන පච්චයො… චත්තාරි… ඣානපච්චයෙන පච්චයො… චත්තාරි… මග්ගපච්චයෙන පච්චයො… චත්තාරි… සම්පයුත්තපච්චයෙන පච්චයො… ද්වෙ.

විප්පයුත්තපච්චයො

256. රූපාවචරො ධම්මො නරූපාවචරස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (1)

නරූපාවචරො ධම්මො නරූපාවචරස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). නරූපාවචරො ධම්මො රූපාවචරස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු රූපාවචරානං ඛන්ධානං විප්පයුත්තපච්චයෙන පච්චයො. පුරෙජාතං – වත්ථු රූපාවචරානං ඛන්ධානං විප්පයුත්තපච්චයෙන පච්චයො. (2)

අත්ථිපච්චයාදි

257. රූපාවචරො ධම්මො රූපාවචරස්ස ධම්මස්ස අත්ථිපච්චයෙන පච්චයො (පටිච්චසදිසං). රූපාවචරො ධම්මො නරූපාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං. රූපාවචරො ධම්මො රූපාවචරස්ස ච නරූපාවචරස්ස ච ධම්මස්ස අත්ථිපච්චයෙන පච්චයො (පටිච්චසදිසං). (3)

නරූපාවචරො ධම්මො නරූපාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). නරූපාවචරො ධම්මො රූපාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු රූපාවචරානං ඛන්ධානං අත්ථිපච්චයෙන පච්චයො. පුරෙජාතං – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, වත්ථු රූපාවචරානං ඛන්ධානං අත්ථිපච්චයෙන පච්චයො. (2)

258. රූපාවචරො ච නරූපාවචරො ච ධම්මා රූපාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – රූපාවචරො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ… පටිසන්ධික්ඛණෙ…පෙ…. රූපාවචරො ච නරූපාවචරො ච ධම්මා නරූපාවචරස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතා – රූපාවචරා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො; පටිසන්ධික්ඛණෙ…පෙ…. පච්ඡාජාතා – රූපාවචරා ඛන්ධා ච කබළීකාරො ආහාරො ච පුරෙජාතස්ස ඉමස්ස කායස්ස අත්ථිපච්චයෙන පච්චයො. පච්ඡාජාතා – රූපාවචරා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.