1. විභඞ්ගවාරො

හෙතුපච්චයො

206. කාමාවචරො ධම්මො කාමාවචරස්ස ධම්මස්ස හෙතුපච්චයෙන පච්චයො – කාමාවචරා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

නකාමාවචරො ධම්මො නකාමාවචරස්ස ධම්මස්ස හෙතුපච්චයෙන පච්චයො – නකාමාවචරා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ…පෙ…. නකාමාවචරො ධම්මො කාමාවචරස්ස ධම්මස්ස හෙතුපච්චයෙන පච්චයො – නකාමාවචරා හෙතූ චිත්තසමුට්ඨානානං රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං.) නකාමාවචරා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (3)

ආරම්මණපච්චයො

207. කාමාවචරො ධම්මො කාමාවචරස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං…පෙ… පුබ්බෙ සුචිණ්ණානි පච්චවෙක්ඛති අස්සාදෙති අභිනන්දති, තං ආරබ්භ රාගො…පෙ… දොමනස්සං උප්පජ්ජති; අරියා ගොත්‍රභුං පච්චවෙක්ඛන්ති, වොදානං පච්චවෙක්ඛන්ති; පහීනෙ කිලෙසෙ…පෙ… වික්ඛම්භිතෙ කිලෙසෙ…පෙ… පුබ්බෙ සුචිණ්ණානි…පෙ… චක්ඛුං…පෙ… වත්ථුං කාමාවචරෙ ඛන්ධෙ අනිච්චතො…පෙ… දොමනස්සං උප්පජ්ජති; රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස ආරම්මණපච්චයෙන පච්චයො. (1)

කාමාවචරො ධම්මො නකාමාවචරස්ස ධම්මස්ස ආරම්මණපච්චයෙන පච්චයො – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන කාමාවචරචිත්තසමඞ්ගිස්ස චිත්තං ජානාති, කාමාවචරා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආරම්මණපච්චයෙන පච්චයො. (2)

208. නකාමාවචරො ධම්මො නකාමාවචරස්ස ධම්මස්ස ආරම්මණපච්චයෙන පච්චයො – නිබ්බානං මග්ගස්ස, ඵලස්ස ආරම්මණපච්චයෙන පච්චයො; චෙතොපරියඤාණෙන නකාමාවචරචිත්තසමඞ්ගිස්ස චිත්තං ජානාති, ආකාසානඤ්චායතනං විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… නකාමාවචරා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආරම්මණපච්චයෙන පච්චයො. (1)

නකාමාවචරො ධම්මො කාමාවචරස්ස ධම්මස්ස ආරම්මණපච්චයෙන පච්චයො – ඣානා වුට්ඨහිත්වා ඣානං පච්චවෙක්ඛති අස්සාදෙති අභිනන්දති, තං ආරබ්භ රාගො උප්පජ්ජති, දිට්ඨි උප්පජ්ජති…පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති; ඵලං…පෙ… නිබ්බානං පච්චවෙක්ඛන්ති, නිබ්බානං ගොත්‍රභුස්ස, වොදානස්ස, ආවජ්ජනාය ආරම්මණපච්චයෙන පච්චයො; ආකාසානඤ්චායතනං පච්චවෙක්ඛති, විඤ්ඤාණඤ්චායතනං පච්චවෙක්ඛති, ආකිඤ්චඤ්ඤායතනං පච්චවෙක්ඛති, නෙවසඤ්ඤානාසඤ්ඤායතනං පච්චවෙක්ඛති, දිබ්බං චක්ඛුං පච්චවෙක්ඛති, දිබ්බං සොතධාතුං පච්චවෙක්ඛති, ඉද්ධිවිධඤාණං පච්චවෙක්ඛති, චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අනාගතංසඤාණං පච්චවෙක්ඛති, නකාමාවචරෙ ඛන්ධෙ අනිච්චතො…පෙ… දොමනස්සං උප්පජ්ජති. (2)

අධිපතිපච්චයො

209. කාමාවචරො ධම්මො කාමාවචරස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං…පෙ… පුබ්බෙ සුචිණ්ණානි ගරුං කත්වා පච්චවෙක්ඛති අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති, සෙක්ඛා ගොත්‍රභුං ගරුං කත්වා පච්චවෙක්ඛන්ති, වොදානං ගරුං කත්වා පච්චවෙක්ඛන්ති, චක්ඛුං…පෙ… වත්ථුං කාමාවචරෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – කාමාවචරාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

210. නකාමාවචරො ධම්මො නකාමාවචරස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – නිබ්බානං මග්ගස්ස, ඵලස්ස අධිපතිපච්චයෙන පච්චයො. සහජාතාධිපති – නකාමාවචරාධිපති සම්පයුත්තකානං ඛන්ධානං අධිපතිපච්චයෙන පච්චයො. නකාමාවචරො ධම්මො කාමාවචරස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – ඣානා වුට්ඨහිත්වා ඣානං ගරුං කත්වා පච්චවෙක්ඛති අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති, අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති, ඵලං…පෙ… නිබ්බානං ගරුං කත්වා පච්චවෙක්ඛන්ති, නිබ්බානං ගොත්‍රභුස්ස, වොදානස්ස අධිපතිපච්චයෙන පච්චයො; ආකාසානඤ්චායතනං ගරුං කත්වා පච්චවෙක්ඛති විඤ්ඤාණඤ්චායතනං…පෙ… ආකිඤ්චඤ්ඤායතනං…පෙ… නෙවසඤ්ඤානාසඤ්ඤායතනං ගරුං කත්වා පච්චවෙක්ඛති, දිබ්බං චක්ඛුං…පෙ… දිබ්බං සොතධාතුං…පෙ… ඉද්ධිවිධඤාණං…පෙ… අනාගතංසඤාණං ගරුං කත්වා පච්චවෙක්ඛති, නකාමාවචරෙ ඛන්ධෙ ගරුං කත්වා අස්සාදෙති අභිනන්දති තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – නකාමාවචරාධිපති චිත්තසමුට්ඨානානං රූපානං අධිපතිපච්චයෙන පච්චයො; නකාමාවචරො ධම්මො කාමාවචරස්ස ච නකාමාවචරස්ස ච ධම්මස්ස අධිපතිපච්චයෙන පච්චයො. සහජාතාධිපති – නකාමාවචරාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

අනන්තරපච්චයාදි

211. කාමාවචරො ධම්මො කාමාවචරස්ස ධම්මස්ස අනන්තරපච්චයෙන පච්චයො – පුරිමා පුරිමා කාමාවචරා ඛන්ධා පච්ඡිමානං පච්ඡිමානං කාමාවචරානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස… අනුලොමං වොදානස්ස… ආවජ්ජනා කාමාවචරානං ඛන්ධානං අනන්තරපච්චයෙන පච්චයො.

කාමාවචරො ධම්මො නකාමාවචරස්ස ධම්මස්ස අනන්තරපච්චයෙන පච්චයො – කාමාවචරං චුතිචිත්තං නකාමාවචරස්ස උපපත්තිචිත්තස්ස… ආවජ්ජනා නකාමාවචරානං ඛන්ධානං අනන්තරපච්චයෙන පච්චයො; කාමාවචරා ඛන්ධා නකාමාවචරස්ස වුට්ඨානස්ස අනන්තරපච්චයෙන පච්චයො; පඨමස්ස ඣානස්ස පරිකම්මං පඨමස්ස ඣානස්ස අනන්තරපච්චයෙන පච්චයො…පෙ… චතුත්ථස්ස ඣානස්ස…පෙ… නෙවසඤ්ඤානාසඤ්ඤායතනස්ස පරිකම්මං…පෙ… දිබ්බස්ස චක්ඛුස්ස…පෙ… දිබ්බාය සොතධාතුයා…පෙ… ඉද්ධිවිධඤාණස්ස…පෙ… චෙතොපරියඤාණස්ස…පෙ… පුබ්බෙනිවාසානුස්සතිඤාණස්ස…පෙ… යථාකම්මූපගඤාණස්ස…පෙ… අනාගතංසඤාණස්ස පරිකම්මං අනාගතංසඤාණස්ස අනන්තරපච්චයෙන පච්චයො; ගොත්‍රභු මග්ගස්ස… වොදානං මග්ගස්ස… අනුලොමං ඵලසමාපත්තියා අනන්තරපච්චයෙන පච්චයො. (2)

212. නකාමාවචරො ධම්මො නකාමාවචරස්ස ධම්මස්ස අනන්තරපච්චයෙන පච්චයො – පුරිමා පුරිමා නකාමාවචරා ඛන්ධා පච්ඡිමානං පච්ඡිමානං නකාමාවචරානං ඛන්ධානං අනන්තරපච්චයෙන පච්චයො; මග්ගො ඵලස්ස, ඵලං ඵලස්ස, නිරොධා වුට්ඨහන්තස්ස, නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. නකාමාවචරො ධම්මො කාමාවචරස්ස ධම්මස්ස අනන්තරපච්චයෙන පච්චයො – නකාමාවචරං චුතිචිත්තං කාමාවචරස්ස උපපත්තිචිත්තස්ස, නකාමාවචරං භවඞ්ගං ආවජ්ජනාය, නකාමාවචරා ඛන්ධා කාමාවචරස්ස වුට්ඨානස්ස අනන්තරපච්චයෙන පච්චයො…. (2)

සමනන්තරපච්චයෙන පච්චයො… සහජාතපච්චයෙන පච්චයො… සත්ත… අඤ්ඤමඤ්ඤපච්චයෙන පච්චයො… ඡ… නිස්සයපච්චයෙන පච්චයො… සත්ත.

උපනිස්සයපච්චයො

213. කාමාවචරො ධම්මො කාමාවචරස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – කාමාවචරං සද්ධං උපනිස්සාය දානං දෙති…පෙ… සීලං…පෙ… උපොසථකම්මං…පෙ… විපස්සනං උප්පාදෙති, මානං ජප්පෙති, දිට්ඨිං ගණ්හාති; කාමාවචරං සීලං…පෙ… පඤ්ඤං… රාගං…පෙ… පත්ථනං… කායිකං සුඛං… කායිකං දුක්ඛං… උතුං… භොජනං… සෙනාසනං උපනිස්සාය දානං දෙති…පෙ… විපස්සනං උප්පාදෙති, පාණං හනති…පෙ… සඞ්ඝං භින්දති; කාමාවචරා සද්ධා…පෙ… සෙනාසනං කාමාවචරාය සද්ධාය…පෙ… පත්ථනාය… කායිකස්ස සුඛස්ස… කායිකස්ස දුක්ඛස්ස උපනිස්සයපච්චයෙන පච්චයො. (1)

කාමාවචරො ධම්මො නකාමාවචරස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – කාමාවචරං සද්ධං උපනිස්සාය නකාමාවචරං ඣානං උප්පාදෙති, මග්ගං…පෙ… අභිඤ්ඤං…පෙ… සමාපත්තිං උප්පාදෙති; කාමාවචරං සීලං…පෙ… සෙනාසනං උපනිස්සාය නකාමාවචරං ඣානං උප්පාදෙති, මග්ගං…පෙ… අභිඤ්ඤං…පෙ… සමාපත්තිං උප්පාදෙති; කාමාවචරා සද්ධා…පෙ… සෙනාසනං නකාමාවචරාය සද්ධාය…පෙ… පඤ්ඤාය… මග්ගස්ස, ඵලසමාපත්තියා උපනිස්සයපච්චයෙන පච්චයො; පඨමස්ස ඣානස්ස පරිකම්මං පඨමස්ස ඣානස්ස…පෙ… චතුත්ථස්ස ඣානස්ස…පෙ… ආකාසානඤ්චායතනස්ස…පෙ… පඨමස්ස මග්ගස්ස…පෙ… චතුත්ථස්ස මග්ගස්ස පරිකම්මං චතුත්ථස්ස මග්ගස්ස උපනිස්සයපච්චයෙන පච්චයො. (2)

214. නකාමාවචරො ධම්මො නකාමාවචරස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – නකාමාවචරං සද්ධං උපනිස්සාය ඣානං උප්පාදෙති, මග්ගං…පෙ… අභිඤ්ඤං…පෙ… සමාපත්තිං උප්පාදෙති; නකාමාවචරං සීලං …පෙ… පඤ්ඤං උපනිස්සාය නකාමාවචරං ඣානං උප්පාදෙති…පෙ… මග්ගං…පෙ… අභිඤ්ඤං…පෙ… සමාපත්තිං උප්පාදෙති; නකාමාවචරා සද්ධා…පෙ… පඤ්ඤා නකාමාවචරාය සද්ධාය…පෙ… පඤ්ඤාය, මග්ගස්ස, ඵලසමාපත්තියා උපනිස්සයපච්චයෙන පච්චයො; පඨමං ඣානං දුතියස්ස ඣානස්ස උපනිස්සයපච්චයෙන පච්චයො…පෙ… තතියං ඣානං…පෙ… චතුත්ථං ඣානං…පෙ… ආකාසානඤ්චායතනං විඤ්ඤාණඤ්චායතනස්ස …පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස උපනිස්සයපච්චයෙන පච්චයො; පඨමො මග්ගො දුතියස්ස මග්ගස්ස…පෙ… දුතියො මග්ගො තතියස්ස මග්ගස්ස…පෙ… තතියො මග්ගො චතුත්ථස්ස මග්ගස්ස උපනිස්සයපච්චයෙන පච්චයො; මග්ගො ඵලසමාපත්තියා උපනිස්සයපච්චයෙන පච්චයො. (1)

නකාමාවචරො ධම්මො කාමාවචරස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – නකාමාවචරං සද්ධං උපනිස්සාය දානං දෙති, සීලං…පෙ… උපොසථකම්මං…පෙ… විපස්සනං උප්පාදෙති, මානං ජප්පෙති, දිට්ඨිං ගණ්හාති; නකාමාවචරං සීලං…පෙ… පඤ්ඤං උපනිස්සාය දානං දෙති, සීලං…පෙ… උපොසථකම්මං…පෙ… විපස්සනං උප්පාදෙති, මානං ජප්පෙති, දිට්ඨිං ගණ්හාති; නකාමාවචරා සද්ධා…පෙ… පඤ්ඤා කාමාවචරාය සද්ධාය…පෙ… පඤ්ඤාය, රාගස්ස…පෙ… පත්ථනාය කායිකස්ස සුඛස්ස, කායිකස්ස දුක්ඛස්ස උපනිස්සයපච්චයෙන පච්චයො; අරියා මග්ගං උපනිස්සාය සඞ්ඛාරෙ අනිච්චතො…පෙ… විපස්සන්ති, මග්ගො අරියානං අත්ථපටිසම්භිදාය… ධම්මපටිසම්භිදාය… නිරුත්තිපටිසම්භිදාය… පටිභානපටිසම්භිදාය… ඨානාඨානකොසල්ලස්ස උපනිස්සයපච්චයෙන පච්චයො; ඵලසමාපත්ති කායිකස්ස සුඛස්ස උපනිස්සයපච්චයෙන පච්චයො. (2)

පුරෙජාතපච්චයාදි

215. කාමාවචරො ධම්මො කාමාවචරස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස …පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු කාමාවචරානං ඛන්ධානං පුරෙජාතපච්චයෙන පච්චයො. කාමාවචරො ධම්මො නකාමාවචරස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. වත්ථුපුරෙජාතං – වත්ථු නකාමාවචරානං ඛන්ධානං පුරෙජාතපච්චයෙන පච්චයො. (2)

පච්ඡාජාතපච්චයෙන පච්චයො… ද්වෙ… ආසෙවනපච්චයෙන පච්චයො… තීණි.

කම්මපච්චයාදි

216. කාමාවචරො ධම්මො කාමාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා (සංඛිත්තං).

නකාමාවචරො ධම්මො නකාමාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා (සංඛිත්තං). නකාමාවචරො ධම්මො කාමාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා (සංඛිත්තං). නකාමාවචරො ධම්මො කාමාවචරස්ස ච නකාමාවචරස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා (සංඛිත්තං). (3)

විපාකපච්චයෙන පච්චයො… චත්තාරි… ආහාරපච්චයෙන පච්චයො… චත්තාරි… ඉන්ද්‍රියපච්චයෙන පච්චයො… චත්තාරි… ඣානපච්චයෙන පච්චයො… චත්තාරි… මග්ගපච්චයෙන පච්චයො… චත්තාරි… සම්පයුත්තපච්චයෙන පච්චයො… ද්වෙ.

විප්පයුත්තපච්චයො

217. කාමාවචරො ධම්මො කාමාවචරස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). කාමාවචරො ධම්මො නකාමාවචරස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං (සංඛිත්තං) පටිසන්ධික්ඛණෙ වත්ථු නකාමාවචරානං ඛන්ධානං විප්පයුත්තපච්චයෙන පච්චයො. පුරෙජාතං – වත්ථු නකාමාවචරානං ඛන්ධානං විප්පයුත්තපච්චයෙන පච්චයො. (2)

නකාමාවචරො ධම්මො කාමාවචරස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – නකාමාවචරා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො; පටිසන්ධික්ඛණෙ…පෙ…. පච්ඡාජාතා – නකාමාවචරා ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අත්ථිපච්චයාදි

218. කාමාවචරො ධම්මො කාමාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). කාමාවචරො ධම්මො නකාමාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු නකාමාවචරානං ඛන්ධානං අත්ථිපච්චයෙන පච්චයො. පුරෙජාතං – දිබ්බෙන චක්ඛුනා රූපං පස්සති…පෙ… (පුරෙජාතසදිසං). (2)

නකාමාවචරො ධම්මො නකාමාවචරස්ස ධම්මස්ස අත්ථිපච්චයෙන පච්චයො – සහජාතං (සංඛිත්තං). නකාමාවචරො ධම්මො කාමාවචරස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං (විප්පයුත්තසදිසං). නකාමාවචරො ධම්මො කාමාවචරස්ස ච නකාමාවචරස්ස ච ධම්මස්ස අත්ථිපච්චයෙන පච්චයො (පටිච්චසදිසං). (3)

219. කාමාවචරො ච නකාමාවචරො ච ධම්මා කාමාවචරස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතා – නකාමාවචරා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො; පටිසන්ධික්ඛණෙ…පෙ…. පච්ඡාජාතා – නකාමාවචරා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – නකාමාවචරා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. කාමාවචරො ච නකාමාවචරො ච ධම්මා නකාමාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – නකාමාවචරො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ… පටිසන්ධික්ඛණෙ…පෙ…. නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො. (2)