1-4. පච්චයානුලොමාදි

හෙතුපච්චයො

202. කාමාවචරං ධම්මං පච්චයා කාමාවචරො ධම්මො උප්පජ්ජති හෙතුපච්චයා – කාමාවචරං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං …පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… (යාව අජ්ඣත්තිකා මහාභූතා) වත්ථුං පච්චයා කාමාවචරා ඛන්ධා. කාමාවචරං ධම්මං පච්චයා නකාමාවචරො ධම්මො උප්පජ්ජති හෙතුපච්චයා – වත්ථුං පච්චයා නකාමාවචරා ඛන්ධා; පටිසන්ධික්ඛණෙ…පෙ…. කාමාවචරං ධම්මං පච්චයා කාමාවචරො ච නකාමාවචරො ච ධම්මා උප්පජ්ජන්ති හෙතුපච්චයා – වත්ථුං පච්චයා නකාමාවචරා ඛන්ධා, මහාභූතෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)

නකාමාවචරං ධම්මං පච්චයා නකාමාවචරො ධම්මො උප්පජ්ජති හෙතුපච්චයා… තීණි (පටිච්චසදිසා).

කාමාවචරඤ්ච නකාමාවචරඤ්ච ධම්මං පච්චයා කාමාවචරො ධම්මො උප්පජ්ජති හෙතුපච්චයා (පටිච්චසදිසා). කාමාවචරඤ්ච නකාමාවචරඤ්ච ධම්මං පච්චයා නකාමාවචරො ධම්මො උප්පජ්ජති හෙතුපච්චයා – නකාමාවචරං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… පටිසන්ධික්ඛණෙ…පෙ…. කාමාවචරඤ්ච නකාමාවචරඤ්ච ධම්මං පච්චයා කාමාවචරො ච නකාමාවචරො ච ධම්මා උප්පජ්ජන්ති හෙතුපච්චයා – නකාමාවචරං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… නකාමාවචරෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3) (සංඛිත්තං.)

හෙතුයා නව, ආරම්මණෙ චත්තාරි, අධිපතියා නව, අනන්තරෙ චත්තාරි, සමනන්තරෙ චත්තාරි, සහජාතෙ නව, අඤ්ඤමඤ්ඤෙ ඡ, නිස්සයෙ නව, උපනිස්සයෙ චත්තාරි, පුරෙජාතෙ චත්තාරි, ආසෙවනෙ චත්තාරි, කම්මෙ නව…පෙ… අවිගතෙ නව.

අනුලොමං.

නහෙතුපච්චයාදි

203. කාමාවචරං ධම්මං පච්චයා කාමාවචරො ධම්මො උප්පජ්ජති නහෙතුපච්චයා – අහෙතුකං කාමාවචරං එකං ඛන්ධං පච්චයා…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා) චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා කාමාවචරා ඛන්ධා, විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයා… තීණි.

නඅධිපතිපච්චයාදි

204. කාමාවචරං ධම්මං පච්චයා කාමාවචරො ධම්මො උප්පජ්ජති නඅධිපතිපච්චයා… එකං (යාව අසඤ්ඤසත්තා). කාමාවචරං ධම්මං පච්චයා නකාමාවචරො ධම්මො උප්පජ්ජති නඅධිපතිපච්චයා – වත්ථුං පච්චයා නකාමාවචරාධිපති, වත්ථුං පච්චයා විපාකා නකාමාවචරා ඛන්ධා; පටිසන්ධික්ඛණෙ…පෙ…. කාමාවචරං ධම්මං පච්චයා කාමාවචරො ච නකාමාවචරො ච ධම්මා උප්පජ්ජන්ති නඅධිපතිපච්චයා – වත්ථුං පච්චයා විපාකා නකාමාවචරා ඛන්ධා, මහාභූතෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)

නකාමාවචරං ධම්මං පච්චයා නකාමාවචරො ධම්මො උප්පජ්ජති නඅධිපතිපච්චයා… තීණි (පටිච්චසදිසා).

කාමාවචරඤ්ච නකාමාවචරඤ්ච ධම්මං පච්චයා කාමාවචරො ධම්මො උප්පජ්ජති නඅධිපතිපච්චයා (පටිච්චසදිසා. මූලං කාතබ්බං.) නකාමාවචරෙ ඛන්ධෙ ච වත්ථුඤ්ච පච්චයා නකාමාවචරාධිපති, විපාකං නකාමාවචරං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… පටිසන්ධික්ඛණෙ…පෙ…. (මූලං කාතබ්බං.) විපාකං නකාමාවචරං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච…පෙ… විපාකෙ නකාමාවචරෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)

නඋපනිස්සයපච්චයා… තීණි… නආසෙවනපච්චයා (සුද්ධකෙ අරූපමිස්සකෙ ච ‘‘විපාක’’න්ති නියාමෙතබ්බං, රූපමිස්සකෙ නත්ථි. සංඛිත්තං).

සුද්ධං

නහෙතුයා එකං, නආරම්මණෙ තීණි, නඅධිපතියා නව, නඅනන්තරෙ තීණි, නසමනන්තරෙ තීණි, නඋපනිස්සයෙ තීණි, නපුරෙජාතෙ නව, නපච්ඡාජාතෙ නව, නආසෙවනෙ නව, නකම්මෙ චත්තාරි, නවිපාකෙ නව, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ එකං, නසම්පයුත්තෙ තීණි, නවිප්පයුත්තෙ ද්වෙ, නොනත්ථියා තීණි, නොවිගතෙ තීණි.

පච්චනීයං.