1. විභඞ්ගවාරො

නහෙතුපච්චයාදි

198. කාමාවචරං ධම්මං පටිච්ච කාමාවචරො ධම්මො උප්පජ්ජති නහෙතුපච්චයා – අහෙතුකං කාමාවචරං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… (යාව අසඤ්ඤසත්තා) විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයා… තීණි.

නඅධිපතිපච්චයාදි

199. කාමාවචරං ධම්මං පටිච්ච කාමාවචරො ධම්මො උප්පජ්ජති නඅධිපතිපච්චයා… තීණි.

නකාමාවචරං ධම්මං පටිච්ච නකාමාවචරො ධම්මො උප්පජ්ජති නඅධිපතිපච්චයා – නකාමාවචරෙ ඛන්ධෙ පටිච්ච නකාමාවචරාධිපති, විපාකං නකාමාවචරං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. නකාමාවචරං ධම්මං පටිච්ච කාමාවචරො ධම්මො උප්පජ්ජති නඅධිපතිපච්චයා – විපාකෙ නකාමාවචරෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. නකාමාවචරං ධම්මං පටිච්ච කාමාවචරො ච නකාමාවචරො ච ධම්මා උප්පජ්ජන්ති නඅධිපතිපච්චයා – විපාකං නකාමාවචරං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

කාමාවචරඤ්ච නකාමාවචරඤ්ච ධම්මං පටිච්ච කාමාවචරො ධම්මො උප්පජ්ජති නඅධිපතිපච්චයා – විපාකෙ නකාමාවචරෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (ඉතරෙ ද්වෙ පාකතිකා) නඅනන්තරපච්චයා…පෙ… නපුරෙජාතපච්චයා… නපච්ඡාජාතපච්චයා.

නආසෙවනපච්චයො

200. කාමාවචරං ධම්මං පටිච්ච කාමාවචරො ධම්මො උප්පජ්ජති නආසෙවනපච්චයා… තීණි.

නකාමාවචරං ධම්මං පටිච්ච නකාමාවචරො ධම්මො උප්පජ්ජති නආසෙවනපච්චයා – විපාකං නකාමාවචරං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. නකාමාවචරං ධම්මං පටිච්ච කාමාවචරො ධම්මො උප්පජ්ජති නආසෙවනපච්චයා – නකාමාවචරෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (මූලං කාතබ්බං) විපාකං නකාමාවචරං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

(අවසෙසා තීණි පාකතිකා. සංඛිත්තං.)