1-4. පච්චයානුලොමාදි

හෙතුපච්චයො

185. උපෙක්ඛාසහගතං ධම්මං සංසට්ඨො උපෙක්ඛාසහගතො ධම්මො උප්පජ්ජති හෙතුපච්චයා – උපෙක්ඛාසහගතං එකං ඛන්ධං සංසට්ඨා ද්වෙ ඛන්ධා, ද්වෙ ඛන්ධෙ …පෙ… පටිසන්ධික්ඛණෙ…පෙ…. (යථා සවිතක්කදුකං සම්පයුත්තවාරො එවං කාතබ්බො.)

හෙතුයා ඡ, ආරම්මණෙ ඡ (සබ්බත්ථ ඡ), අවිගතෙ ඡ.

අනුලොමං.

උපෙක්ඛාසහගතං ධම්මං සංසට්ඨො උපෙක්ඛාසහගතො ධම්මො උප්පජ්ජති නහෙතුපච්චයා – අහෙතුකං උපෙක්ඛාසහගතං එකං ඛන්ධං සංසට්ඨා ද්වෙ ඛන්ධා, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ සංසට්ඨො විචිකිච්ඡාසහගතො උද්ධච්චසහගතො මොහො. (එවං පඤ්ච පඤ්හා යථා සවිතක්කදුකෙ එවං කාතබ්බා.)

නහෙතුයා ඡ, නඅධිපතියා ඡ, නපුරෙජාතෙ ඡ, නපච්ඡාජාතෙ ඡ, නආසෙවනෙ ඡ, නකම්මෙ චත්තාරි, නවිපාකෙ ඡ, නවිප්පයුත්තෙ ඡ.

පච්චනීයං.