1-4. පච්චයානුලොමාදි

හෙතුපච්චයො

183. උපෙක්ඛාසහගතං ධම්මං පච්චයා උපෙක්ඛාසහගතො ධම්මො උප්පජ්ජති හෙතුපච්චයා – උපෙක්ඛාසහගතං එකං ඛන්ධං පච්චයා ද්වෙ ඛන්ධා, ද්වෙ ඛන්ධෙ…පෙ… පටිසන්ධික්ඛණෙ…පෙ… (යථා සවිතක්කදුකසදිසං පච්චයවාරෙ නානාකරණං. ‘‘උපෙක්ඛ’’න්ති නවපි පඤ්හා කාතබ්බා, පටිසන්ධිපවත්තිපි වත්ථුපි.)

හෙතුයා නව, ආරම්මණෙ නව…පෙ… පුරෙජාතෙ නව, ආසෙවනෙ නව (සබ්බත්ථ නව), අවිගතෙ නව.

අනුලොමං.

184. උපෙක්ඛාසහගතං ධම්මං පච්චයා උපෙක්ඛාසහගතො ධම්මො උප්පජ්ජති නහෙතුපච්චයා – අහෙතුකං උපෙක්ඛාසහගතං එකං ඛන්ධං පච්චයා ද්වෙ ඛන්ධා, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පච්චයා විචිකිච්ඡාසහගතො උද්ධච්චසහගතො මොහො. (එවං නවපි පඤ්හා පවත්තිපටිසන්ධියො යථා සවිතක්කදුකස්ස එවං කාතබ්බා. තීණියෙව මොහො, පවත්තෙ වත්ථුපි කාතබ්බා.)

නහෙතුයා නව, නආරම්මණෙ තීණි, නඅධිපතියා නව, නඅනන්තරෙ තීණි, නසමනන්තරෙ තීණි, නඋපනිස්සයෙ තීණි, නපුරෙජාතෙ නව, නපච්ඡාජාතෙ නව, නආසෙවනෙ නව, නකම්මෙ චත්තාරි, නවිපාකෙ නව, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ නව, නසම්පයුත්තෙ තීණි, නවිප්පයුත්තෙ ඡ, නොනත්ථියා තීණි, නොවිගතෙ තීණි.

පච්චනීයං.