1. විභඞ්ගවාරො

හෙතුපච්චයො

170. සුඛසහගතො ධම්මො සුඛසහගතස්ස ධම්මස්ස හෙතුපච්චයෙන පච්චයො… චත්තාරි. (ආරම්මණෙපි අධිපතියාපි සප්පීතිකදුකසදිසා, සුඛන්ති නානාකරණං.)

අනන්තරපච්චයාදි

171. සුඛසහගතො ධම්මො සුඛසහගතස්ස ධම්මස්ස අනන්තරපච්චයෙන පච්චයො – පුරිමා පුරිමා සුඛසහගතා ඛන්ධා පච්ඡිමානං පච්ඡිමානං සුඛසහගතානං ඛන්ධානං අනන්තරපච්චයෙන පච්චයො. (මූලං කාතබ්බං.) පුරිමා පුරිමා සුඛසහගතා ඛන්ධා පච්ඡිමස්ස පච්ඡිමස්ස සුඛස්ස අනන්තරපච්චයෙන පච්චයො. සුඛසහගතං චුතිචිත්තං නසුඛසහගතස්ස උපපත්තිචිත්තස්ස… සුඛසහගතං භවඞ්ගං ආවජ්ජනාය… සුඛසහගතං කායවිඤ්ඤාණං විපාකමනොධාතුයා… සුඛසහගතා විපාකමනොවිඤ්ඤාණධාතු කිරියමනොවිඤ්ඤාණධාතුයා… සුඛසහගතං භවඞ්ගං නසුඛසහගතස්ස භවඞ්ගස්ස… සුඛසහගතං කුසලාකුසලං නසුඛසහගතස්ස වුට්ඨානස්ස… කිරියං වුට්ඨානස්ස… ඵලං වුට්ඨානස්ස අනන්තරපච්චයෙන පච්චයො. (මූලං කාතබ්බං.) පුරිමා පුරිමා සුඛසහගතා ඛන්ධා පච්ඡිමානං පච්ඡිමානං සුඛසහගතානං ඛන්ධානං සුඛස්ස ච අනන්තරපච්චයෙන පච්චයො. (1)

නසුඛසහගතො ධම්මො නසුඛසහගතස්ස ධම්මස්ස අනන්තරපච්චයෙන පච්චයො – පුරිමා පුරිමා නසුඛසහගතා…පෙ…. (මූලං. තීණිපි සප්පීතිකදුකසදිසා.)

172. සුඛසහගතො ච නසුඛසහගතො ච ධම්මා සුඛසහගතස්ස ධම්මස්ස අනන්තරපච්චයෙන පච්චයො – පුරිමා පුරිමා සුඛසහගතා ඛන්ධා ච සුඛඤ්ච පච්ඡිමානං පච්ඡිමානං සුඛසහගතානං ඛන්ධානං අනන්තරපච්චයෙන පච්චයො. (මූලං කාතබ්බං.) පුරිමා පුරිමා සුඛසහගතා ඛන්ධා ච සුඛඤ්ච පච්ඡිමස්ස පච්ඡිමස්ස සුඛස්ස අනන්තරපච්චයෙන පච්චයො; සුඛසහගතං චුතිචිත්තඤ්ච සුඛඤ්ච නසුඛසහගතස්ස උපපත්තිචිත්තස්ස සුඛසහගතං භවඞ්ගඤ්ච සුඛඤ්ච ආවජ්ජනාය … සුඛසහගතං කායවිඤ්ඤාණඤ්ච සුඛඤ්ච විපාකමනොධාතුයා… සුඛසහගතා විපාකමනොවිඤ්ඤාණධාතු ච සුඛඤ්ච කිරියමනොවිඤ්ඤාණධාතුයා… සුඛසහගතං භවඞ්ගඤ්ච සුඛඤ්ච නසුඛසහගතස්ස භවඞ්ගස්ස… සුඛසහගතං කුසලාකුසලඤ්ච සුඛඤ්ච නසුඛසහගතස්ස වුට්ඨානස්ස… කිරියං වුට්ඨානස්ස… ඵලං වුට්ඨානස්ස අනන්තරපච්චයෙන පච්චයො. (මූලං කාතබ්බං.) පුරිමා පුරිමා සුඛසහගතා ඛන්ධා ච සුඛඤ්ච පච්ඡිමානං පච්ඡිමානං සුඛසහගතානං ඛන්ධානං සුඛස්ස ච අනන්තරපච්චයෙන පච්චයො. (3)

සමනන්තරපච්චයෙන පච්චයො… සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො.

උපනිස්සයපච්චයො

173. සුඛසහගතො ධම්මො සුඛසහගතස්ස ධම්මස්ස උපනිස්සයපච්චයෙන පච්චයො… තීණි.

නසුඛසහගතො ධම්මො නසුඛසහගතස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – නසුඛසහගතං සද්ධං උපනිස්සාය නසුඛසහගතෙන චිත්තෙන දානං දෙති, සීලං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති; නසුඛසහගතං සීලං…පෙ… පඤ්ඤං… රාගං…පෙ… පත්ථනං… කායිකං සුඛං… කායිකං දුක්ඛං… උතුං… භොජනං… සෙනාසනං සුඛං උපනිස්සාය නසුඛසහගතෙන චිත්තෙන දානං දෙති…පෙ… සමාපත්තිං උප්පාදෙති, පාණං හනති…පෙ… සඞ්ඝං භින්දති; නසුඛසහගතා සද්ධා…පෙ… සෙනාසනං සුඛඤ්ච නසුඛසහගතාය සද්ධාය…පෙ… පඤ්ඤාය… රාගස්ස… දොසස්ස…පෙ… පත්ථනාය… කායිකස්ස සුඛස්ස, කායිකස්ස දුක්ඛස්ස, මග්ගස්ස, ඵලසමාපත්තියා සුඛස්ස ච උපනිස්සයපච්චයෙන පච්චයො. (1)

නසුඛසහගතො ධම්මො සුඛසහගතස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – නසුඛසහගතං සද්ධං උපනිස්සාය සුඛසහගතෙන චිත්තෙන දානං දෙති…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති; නසුඛසහගතං සීලං…පෙ… පඤ්ඤං… රාගං…පෙ… පත්ථනං… කායිකං සුඛං… කායිකං දුක්ඛං… උතුං… භොජනං… සෙනාසනං සුඛං උපනිස්සාය සුඛසහගතෙන චිත්තෙන දානං දෙති…පෙ… සමාපත්තිං උප්පාදෙති; සුඛසහගතෙන චිත්තෙන අදින්නං ආදියති; මුසා…පෙ… පිසුණං…පෙ… සම්ඵං…පෙ… සන්ධිං…පෙ… නිල්ලොපං…පෙ… එකාගාරිකං…පෙ… පරිපන්ථෙ…පෙ… පරදාරං…පෙ… ගාමඝාතං…පෙ… නිගමඝාතං කරොති; නසුඛසහගතා සද්ධා…පෙ… සෙනාසනං සුඛඤ්ච සුඛසහගතාය සද්ධාය…පෙ… පඤ්ඤාය… රාගස්ස… මානස්ස… දිට්ඨියා… පත්ථනාය… කායිකස්ස සුඛස්ස… මග්ගස්ස ඵලසමාපත්තියා උපනිස්සයපච්චයෙන පච්චයො. (2)

නසුඛසහගතො ධම්මො සුඛසහගතස්ස ච නසුඛසහගතස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – නසුඛසහගතං සද්ධං උපනිස්සාය සුඛසහගතෙන චිත්තෙන දානං දෙති…පෙ… (දුතියගමනසදිසං) මානං ජප්පෙති, දිට්ඨිං ගණ්හාති; නසුඛසහගතං සීලං…පෙ… සෙනාසනං සුඛං උපනිස්සාය දානං දෙති…පෙ… සමාපත්තිං උප්පාදෙති, සුඛසහගතෙන චිත්තෙන අදින්නං ආදියති…පෙ… නසුඛසහගතා සද්ධා…පෙ… සෙනාසනං සුඛඤ්ච සුඛසහගතාය … සද්ධාය…පෙ… පත්ථනාය … කායිකස්ස සුඛස්ස, මග්ගස්ස, ඵලසමාපත්තියා සුඛස්ස ච උපනිස්සයපච්චයෙන පච්චයො. (3)

සුඛසහගතො ච නසුඛසහගතො ච ධම්මා සුඛසහගතස්ස ධම්මස්ස උපනිස්සයපච්චයෙන පච්චයො… තීණි.

පුරෙජාතපච්චයාදි

174. නසුඛසහගතො ධම්මො නසුඛසහගතස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං නසුඛසහගතෙන චිත්තෙන අනිච්චතො…පෙ… විපස්සති අස්සාදෙති අභිනන්දති, තං ආරබ්භ නසුඛසහගතො රාගො උප්පජ්ජති…පෙ… දොමනස්සං උප්පජ්ජති, සුඛං උප්පජ්ජති, දිබ්බෙන චක්ඛුනා රූපං පස්සති…පෙ… ඵොට්ඨබ්බායතනං කායවිඤ්ඤාණස්ස…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු නසුඛසහගතානං ඛන්ධානං සුඛස්ස ච පුරෙජාතපච්චයෙන පච්චයො. (1)

නසුඛසහගතො ධම්මො සුඛසහගතස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං සුඛසහගතෙන චිත්තෙන අනිච්චතො…පෙ… විපස්සති, අස්සාදෙති අභිනන්දති, තං ආරබ්භ සුඛසහගතො රාගො උප්පජ්ජති, දිට්ඨි උප්පජ්ජති. වත්ථුපුරෙජාතං – වත්ථු සුඛසහගතානං ඛන්ධානං පුරෙජාතපච්චයෙන පච්චයො. (2)

නසුඛසහගතො ධම්මො සුඛසහගතස්ස ච නසුඛසහගතස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං සුඛසහගතෙන චිත්තෙන අනිච්චතො…පෙ… විපස්සති, අස්සාදෙති අභිනන්දති, තං ආරබ්භ සුඛඤ්ච සම්පයුත්තකා ඛන්ධා ච උප්පජ්ජන්ති. වත්ථුපුරෙජාතං – වත්ථු සුඛසහගතානං ඛන්ධානං සුඛස්ස ච පුරෙජාතපච්චයෙන පච්චයො. (3)

පච්ඡාජාතපච්චයෙන පච්චයො… තීණි… ආසෙවනපච්චයෙන පච්චයො… නව.

කම්මපච්චයාදි

175. සුඛසහගතො ධම්මො සුඛසහගතස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. (ඡ කම්මානි චත්තාරි සහජාතාපි නානාක්ඛණිකාපි කාතබ්බා, ද්වෙ නානාක්ඛණිකා.)… විපාකපච්චයෙන පච්චයො… නව… ආහාරපච්චයෙන පච්චයො… චත්තාරි… ඉන්ද්‍රියපච්චයෙන පච්චයො… නව… ඣානපච්චයෙන පච්චයො… නව… මග්ගපච්චයෙන පච්චයො… චත්තාරි… සම්පයුත්තපච්චයෙන පච්චයො… ඡ… විප්පයුත්තපච්චයෙන පච්චයො… පඤ්ච… අත්ථිපච්චයෙන පච්චයො… නව… නත්ථිපච්චයෙන පච්චයො… නව… විගතපච්චයෙන පච්චයො… නව… අවිගතපච්චයෙන පච්චයො… නව.