1. විභඞ්ගවාරො

හෙතුපච්චයො

142. සප්පීතිකං ධම්මං පටිච්ච සප්පීතිකො ධම්මො උප්පජ්ජති හෙතුපච්චයා – සප්පීතිකං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. සප්පීතිකං ධම්මං පටිච්ච අප්පීතිකො ධම්මො උප්පජ්ජති හෙතුපච්චයා – සප්පීතිකෙ ඛන්ධෙ පටිච්ච පීති ච චිත්තසමුට්ඨානඤ්ච රූපං; පටිසන්ධික්ඛණෙ…පෙ…. සප්පීතිකං ධම්මං පටිච්ච සප්පීතිකො ච අප්පීතිකො ච ධම්මා උප්පජ්ජන්ති හෙතුපච්චයා – සප්පීතිකං එකං ඛන්ධං පටිච්ච තයො ඛන්ධා පීති ච චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

අප්පීතිකං ධම්මං පටිච්ච අප්පීතිකො ධම්මො උප්පජ්ජති හෙතුපච්චයා – අප්පීතිකං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පීතිං පටිච්ච චිත්තසමුට්ඨානං රූපං; පටිසන්ධික්ඛණෙ අප්පීතිකං එකං ඛන්ධං පටිච්ච තයො ඛන්ධා කටත්තා ච රූපං, ද්වෙ ඛන්ධෙ…පෙ… පීතිං පටිච්ච කටත්තාරූපං, ඛන්ධෙ පටිච්ච වත්ථු, වත්ථුං පටිච්ච ඛන්ධා, පීතිං පටිච්ච වත්ථු, වත්ථුං පටිච්ච පීති, එකං මහාභූතං…පෙ…. (යථා සවිතක්කදුකං සබ්බත්ථ, එවං සප්පීතිකදුකං කාතබ්බං, සබ්බත්ථ පවත්තිපටිසන්ධි නවපි පඤ්හා.)