1-4. පච්චයානුලොමාදි

හෙතුපච්චයො

115. සවිතක්කං ධම්මං සංසට්ඨො සවිතක්කො ධම්මො උප්පජ්ජති හෙතුපච්චයා – සවිතක්කං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. සවිතක්කං ධම්මං සංසට්ඨො අවිතක්කො ධම්මො උප්පජ්ජති හෙතුපච්චයා – සවිතක්කෙ ඛන්ධෙ සංසට්ඨො විතක්කො; පටිසන්ධික්ඛණෙ…පෙ…. සවිතක්කං ධම්මං සංසට්ඨො සවිතක්කො ච අවිතක්කො ච ධම්මා උප්පජ්ජන්ති හෙතුපච්චයා – සවිතක්කං එකං ඛන්ධං සංසට්ඨා තයො ඛන්ධා විතක්කො ච…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

අවිතක්කං ධම්මං සංසට්ඨො අවිතක්කො ධම්මො උප්පජ්ජති හෙතුපච්චයා – අවිතක්කං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. අවිතක්කං ධම්මං සංසට්ඨො සවිතක්කො ධම්මො උප්පජ්ජති හෙතුපච්චයා – විතක්කං සංසට්ඨා සම්පයුත්තකා ඛන්ධා; පටිසන්ධික්ඛණෙ…පෙ…. (2)

සවිතක්කඤ්ච අවිතක්කඤ්ච ධම්මං සංසට්ඨො සවිතක්කො ධම්මො උප්පජ්ජති හෙතුපච්චයා – සවිතක්කං එකං ඛන්ධඤ්ච විතක්කඤ්ච සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1) (සංඛිත්තං.)

හෙතුයා ඡ, ආරම්මණෙ ඡ, අධිපතියා ඡ (සබ්බත්ථ ඡ) අවිගතෙ ඡ.

අනුලොමං.

සවිතක්කං ධම්මං සංසට්ඨො සවිතක්කො ධම්මො උප්පජ්ජති නහෙතුපච්චයා. (එවං ඡ පඤ්හා කාතබ්බා අනුලොමසදිසා, අහෙතුකාති නියාමෙතබ්බා, තීණියෙව, මොහො උද්ධරිතබ්බො.)

නහෙතුයා ඡ, නඅධිපතියා ඡ, නපුරෙජාතෙ ඡ, නපච්ඡාජාතෙ ඡ, නආසෙවනෙ ඡ, නකම්මෙ චත්තාරි, නවිපාකෙ ඡ, නඣානෙ එකං, නමග්ගෙ ඡ, නවිප්පයුත්තෙ ඡ.

පච්චනීයං.