1. විභඞ්ගවාරො

නහෙතුපච්චයො

13. කිලෙසං ධම්මං පච්චයා කිලෙසො ධම්මො උප්පජ්ජති නහෙතුපච්චයා – විචිකිච්ඡං පච්චයා විචිකිච්ඡාසහගතො මොහො, උද්ධච්චං පච්චයා උද්ධච්චසහගතො මොහො. (1)

නොකිලෙසං ධම්මං පච්චයා නොකිලෙසො ධම්මො උප්පජ්ජති නහෙතුපච්චයා (යාව අසඤ්ඤසත්තා) – චක්ඛායතනං පච්චයා චක්ඛුවිඤ්ඤාණං…පෙ… කායායතනං…පෙ… වත්ථුං පච්චයා අහෙතුකා නොකිලෙසා ඛන්ධා. (1)

නොකිලෙසං ධම්මං පච්චයා කිලෙසො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (2)

කිලෙසඤ්ච නොකිලෙසඤ්ච ධම්මං පච්චයා කිලෙසො ධම්මො උප්පජ්ජති නහෙතුපච්චයා – විචිකිච්ඡඤ්ච සම්පයුත්තකෙ ච ඛන්ධෙ වත්ථුඤ්ච පච්චයා විචිකිච්ඡාසහගතො මොහො, උද්ධච්චඤ්ච සම්පයුත්තකෙ ච ඛන්ධෙ වත්ථුඤ්ච පච්චයා උද්ධච්චසහගතො මොහො (සංඛිත්තං). (1)