1. විභඞ්ගවාරො

හෙතුපච්චයො

110. සවිතක්කං ධම්මං පච්චයා සවිතක්කො ධම්මො උප්පජ්ජති හෙතුපච්චයා… තීණි (පටිච්චවාරසදිසා).

අවිතක්කං ධම්මං පච්චයා අවිතක්කො ධම්මො උප්පජ්ජති හෙතුපච්චයා – අවිතක්කං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… විතක්කං පච්චයා චිත්තසමුට්ඨානං රූපං; පටිසන්ධික්ඛණෙ අවිතක්කං එකං ඛන්ධං පච්චයා තයො ඛන්ධා කටත්තා ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ විතක්කං පච්චයා කටත්තාරූපං, ඛන්ධෙ පච්චයා වත්ථු, වත්ථුං පච්චයා ඛන්ධා, විතක්කං පච්චයා වත්ථු, වත්ථුං පච්චයා විතක්කො, එකං මහාභූතං පච්චයා තයො මහාභූතා…පෙ… වත්ථුං පච්චයා අවිතක්කා ඛන්ධා, වත්ථුං පච්චයා විතක්කො.

අවිතක්කං ධම්මං පච්චයා සවිතක්කො ධම්මො උප්පජ්ජති හෙතුපච්චයා – විතක්කං පච්චයා සම්පයුත්තකා ඛන්ධා, වත්ථුං පච්චයා සවිතක්කා ඛන්ධා (පටිසන්ධියාපි ද්වෙ).

අවිතක්කං ධම්මං පච්චයා සවිතක්කො ච අවිතක්කො ච ධම්මා උප්පජ්ජන්ති හෙතුපච්චයා – විතක්කං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං, විතක්කං පච්චයා සම්පයුත්තකා ඛන්ධා, මහාභූතෙ පච්චයා චිත්තසමුට්ඨානං රූපං, වත්ථුං පච්චයා සවිතක්කා ඛන්ධා, මහාභූතෙ පච්චයා චිත්තසමුට්ඨානං රූපං, වත්ථුං පච්චයා විතක්කො සම්පයුත්තකා ච ඛන්ධා; පටිසන්ධික්ඛණෙ…පෙ… (පටිසන්ධියාපි පවත්තිසදිසායෙව). (3)

111. සවිතක්කඤ්ච අවිතක්කඤ්ච ධම්මං පච්චයා සවිතක්කො ධම්මො උප්පජ්ජති හෙතුපච්චයා – සවිතක්කං එකං ඛන්ධඤ්ච විතක්කඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… සවිතක්කං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… (පටිසන්ධික්ඛණෙ ද්වෙ කාතබ්බා). (1)

සවිතක්කඤ්ච අවිතක්කඤ්ච ධම්මං පච්චයා අවිතක්කො ධම්මො උප්පජ්ජති හෙතුපච්චයා – සවිතක්කෙ ඛන්ධෙ ච විතක්කඤ්ච පච්චයා චිත්තසමුට්ඨානං රූපං, සවිතක්කෙ ඛන්ධෙ ච විතක්කඤ්ච මහාභූතෙ ච පච්චයා චිත්තසමුට්ඨානං රූපං, සවිතක්කෙ ඛන්ධෙ ච වත්ථුඤ්ච පච්චයා විතක්කො; පටිසන්ධික්ඛණෙ…පෙ… (තීණි, පටිසන්ධියාපි). (2)

සවිතක්කඤ්ච අවිතක්කඤ්ච ධම්මං පච්චයා සවිතක්කො ච අවිතක්කො ච ධම්මා උප්පජ්ජන්ති හෙතුපච්චයා – සවිතක්කං එකං ඛන්ධඤ්ච විතක්කඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… සවිතක්කං එකං ඛන්ධඤ්ච විතක්කඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… සවිතක්කෙ ඛන්ධෙ ච විතක්කඤ්ච මහාභූතෙ ච පච්චයා චිත්තසමුට්ඨානං රූපං, සවිතක්කං එකං ඛන්ධඤ්ච වත්ථුඤ්ච පච්චයා තයො ඛන්ධා විතක්කො ච…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)