1. විභඞ්ගවාරො

හෙතුපච්චයො

68. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස හෙතුපච්චයෙන පච්චයො – දස්සනෙන පහාතබ්බහෙතුකා හෙතූ සම්පයුත්තකානං ඛන්ධානං හෙතුපච්චයෙන පච්චයො. (මූලං කාතබ්බං.) දස්සනෙන පහාතබ්බහෙතුකා හෙතූ චිත්තසමුට්ඨානානං රූපානං හෙතුපච්චයෙන පච්චයො. (මූලං කාතබ්බං.) දස්සනෙන පහාතබ්බහෙතුකා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

69. නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස හෙතුපච්චයෙන පච්චයො – නදස්සනෙන පහාතබ්බහෙතුකා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො, විචිකිච්ඡාසහගතො මොහො චිත්තසමුට්ඨානානං රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං.) විචිකිච්ඡාසහගතො මොහො සම්පයුත්තකානං ඛන්ධානං හෙතුපච්චයෙන පච්චයො. (මූලං කාතබ්බං.) විචිකිච්ඡාසහගතො මොහො සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

ආරම්මණපච්චයො

70. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස ආරම්මණපච්චයෙන පච්චයො – දස්සනෙන පහාතබ්බහෙතුකෙ ඛන්ධෙ ආරබ්භ දස්සනෙන පහාතබ්බහෙතුකා ඛන්ධා උප්පජ්ජන්ති. (මූලං කාතබ්බං.) දස්සනෙන පහාතබ්බහෙතුකෙ ඛන්ධෙ ආරබ්භ නදස්සනෙන පහාතබ්බහෙතුකා ඛන්ධා ච මොහො ච උප්පජ්ජන්ති. (මූලං කාතබ්බං.) දස්සනෙන පහාතබ්බහෙතුකෙ ඛන්ධෙ ආරබ්භ විචිකිච්ඡාසහගතා ඛන්ධා ච මොහො ච උප්පජ්ජන්ති. (3)

71. නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං කත්වා තං පච්චවෙක්ඛති, අස්සාදෙති අභිනන්දති, තං ආරබ්භ නදස්සනෙන පහාතබ්බහෙතුකො රාගො උප්පජ්ජති, උද්ධච්චං උප්පජ්ජති, නදස්සනෙන පහාතබ්බහෙතුකං දොමනස්සං උප්පජ්ජති, පුබ්බෙ සුචිණ්ණානි …පෙ… ඣානා වුට්ඨහිත්වා…පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති…පෙ… අරියා නදස්සනෙන පහාතබ්බහෙතුකෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ…පෙ… පුබ්බෙ සමුදාචිණ්ණෙ කිලෙසෙ ජානන්ති, චක්ඛුං…පෙ… වත්ථුං නදස්සනෙන පහාතබ්බහෙතුකෙ ඛන්ධෙ ච මොහඤ්ච අනිච්චතො…පෙ… විපස්සති, අස්සාදෙති අභිනන්දති, තං ආරබ්භ නදස්සනෙන පහාතබ්බහෙතුකො රාගො උප්පජ්ජති, උද්ධච්චං උප්පජ්ජති, නදස්සනෙන පහාතබ්බහෙතුකං දොමනස්සං උප්පජ්ජති, දිබ්බෙන චක්ඛුනා රූපං පස්සති…පෙ… අනාගතංසඤාණස්ස, ආවජ්ජනාය, මොහස්ස ච ආරම්මණපච්චයෙන පච්චයො.

නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස ආරම්මණපච්චයෙන පච්චයො – දානං…පෙ… ඣානං…පෙ… චක්ඛුං…පෙ… වත්ථුං නදස්සනෙන පහාතබ්බහෙතුකෙ ඛන්ධෙ ච මොහඤ්ච අස්සාදෙති අභිනන්දති, තං ආරබ්භ දස්සනෙන පහාතබ්බහෙතුකො රාගො උප්පජ්ජති, දිට්ඨි…පෙ… විචිකිච්ඡා…පෙ… දස්සනෙන පහාතබ්බහෙතුකං දොමනස්සං උප්පජ්ජති.

නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ච නදස්සනෙන පහාතබ්බහෙතුකස්ස ච ධම්මස්ස ආරම්මණපච්චයෙන පච්චයො – චක්ඛුං…පෙ… වත්ථුං නදස්සනෙන පහාතබ්බහෙතුකෙ ඛන්ධෙ ච මොහඤ්ච ආරබ්භ විචිකිච්ඡාසහගතා ඛන්ධා ච මොහො ච උප්පජ්ජන්ති. (3)

72. දස්සනෙන පහාතබ්බහෙතුකො ච නදස්සනෙන පහාතබ්බහෙතුකො ච ධම්මා දස්සනෙන පහාතබ්බහෙතුකස්ස ධම්මස්ස ආරම්මණපච්චයෙන පච්චයො – විචිකිච්ඡාසහගතෙ ඛන්ධෙ ච මොහඤ්ච ආරබ්භ දස්සනෙන පහාතබ්බහෙතුකා ඛන්ධා උප්පජ්ජන්ති. (මූලං කාතබ්බං.) විචිකිච්ඡාසහගතෙ ඛන්ධෙ ච මොහඤ්ච ආරබ්භ නදස්සනෙන පහාතබ්බහෙතුකා ඛන්ධා ච මොහො ච උප්පජ්ජන්ති. (මූලං කාතබ්බං.) විචිකිච්ඡාසහගතෙ ඛන්ධෙ ච මොහඤ්ච ආරබ්භ විචිකිච්ඡාසහගතා ඛන්ධා ච මොහො ච උප්පජ්ජන්ති. (3)

අධිපතිපච්චයො

73. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දස්සනෙන පහාතබ්බහෙතුකෙ ඛන්ධෙ ගරුං කත්වා දස්සනෙන පහාතබ්බහෙතුකා ඛන්ධා උප්පජ්ජන්ති. සහජාතාධිපති – දස්සනෙන පහාතබ්බහෙතුකාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

දස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස අධිපතිපච්චයෙන පච්චයො. සහජාතාධිපති – දස්සනෙන පහාතබ්බහෙතුකාධිපති චිත්තසමුට්ඨානානං රූපානං අධිපතිපච්චයෙන පච්චයො. (2)

දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ච නදස්සනෙන පහාතබ්බහෙතුකස්ස ච ධම්මස්ස අධිපතිපච්චයෙන පච්චයො. සහජාතාධිපති – දස්සනෙන පහාතබ්බහෙතුකාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

74. නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං කත්වා තං ගරුං කත්වා පච්චවෙක්ඛති අස්සාදෙති අභිනන්දති, තං ගරුං කත්වා නදස්සනෙන පහාතබ්බහෙතුකො රාගො උප්පජ්ජති, පුබ්බෙ සුචිණ්ණානි…පෙ… ඣානා…පෙ… අරියා මග්ගා වුට්ඨහිත්වා මග්ගං ගරුං කත්වා…පෙ… ඵලස්ස අධිපතිපච්චයෙන පච්චයො; චක්ඛුං…පෙ… වත්ථුං නදස්සනෙන පහාතබ්බහෙතුකෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා නදස්සනෙන පහාතබ්බහෙතුකො රාගො උප්පජ්ජති. සහජාතාධිපති – නදස්සනෙන පහාතබ්බහෙතුකාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස අධිපතිපච්චයෙන පච්චයො. ආරම්මණාධිපති – දානං…පෙ… සීලං…පෙ… උපොසථකම්මං කත්වා…පෙ… ඣානා…පෙ… චක්ඛුං…පෙ… වත්ථුං නදස්සනෙන පහාතබ්බහෙතුකෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා දස්සනෙන පහාතබ්බහෙතුකො රාගො උප්පජ්ජති, දිට්ඨි උප්පජ්ජති. (2)

අනන්තරපච්චයො

75. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස අනන්තරපච්චයෙන පච්චයො – පුරිමා පුරිමා දස්සනෙන පහාතබ්බහෙතුකා ඛන්ධා පච්ඡිමානං පච්ඡිමානං දස්සනෙන පහාතබ්බහෙතුකානං ඛන්ධානං අනන්තරපච්චයෙන පච්චයො. (මූලං කාතබ්බං.) පුරිමා පුරිමා විචිකිච්ඡාසහගතා ඛන්ධා පච්ඡිමස්ස පච්ඡිමස්ස විචිකිච්ඡාසහගතස්ස මොහස්ස අනන්තරපච්චයෙන පච්චයො; දස්සනෙන පහාතබ්බහෙතුකා ඛන්ධා වුට්ඨානස්ස අනන්තරපච්චයෙන පච්චයො. (මූලං කාතබ්බං.) පුරිමා පුරිමා විචිකිච්ඡාසහගතා ඛන්ධා පච්ඡිමානං පච්ඡිමානං විචිකිච්ඡාසහගතානං ඛන්ධානං මොහස්ස ච අනන්තරපච්චයෙන පච්චයො. (3)

76. නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස අනන්තරපච්චයෙන පච්චයො – පුරිමො පුරිමො විචිකිච්ඡාසහගතො මොහො පච්ඡිමස්ස පච්ඡිමස්ස විචිකිච්ඡාසහගතස්ස මොහස්ස අනන්තරපච්චයෙන පච්චයො; පුරිමා පුරිමා නදස්සනෙන පහාතබ්බහෙතුකා ඛන්ධා…පෙ… ඵලසමාපත්තියා අනන්තරපච්චයෙන පච්චයො. (මූලං කාතබ්බං.) පුරිමො පුරිමො විචිකිච්ඡාසහගතො මොහො පච්ඡිමානං පච්ඡිමානං විචිකිච්ඡාසහගතානං ඛන්ධානං අනන්තරපච්චයෙන පච්චයො; ආවජ්ජනා දස්සනෙන පහාතබ්බහෙතුකානං ඛන්ධානං අනන්තරපච්චයෙන පච්චයො. (මූලං කාතබ්බං.) පුරිමො පුරිමො විචිකිච්ඡාසහගතො මොහො පච්ඡිමානං පච්ඡිමානං විචිකිච්ඡාසහගතානං ඛන්ධානං මොහස්ස ච අනන්තරපච්චයෙන පච්චයො; ආවජ්ජනා විචිකිච්ඡාසහගතානං ඛන්ධානං මොහස්ස ච අනන්තරපච්චයෙන පච්චයො. (3)

77. දස්සනෙන පහාතබ්බහෙතුකො ච නදස්සනෙන පහාතබ්බහෙතුකො ච ධම්මා දස්සනෙන පහාතබ්බහෙතුකස්ස ධම්මස්ස අනන්තරපච්චයෙන පච්චයො – පුරිමා පුරිමා විචිකිච්ඡාසහගතා ඛන්ධා ච මොහො ච පච්ඡිමානං පච්ඡිමානං විචිකිච්ඡාසහගතානං ඛන්ධානං අනන්තරපච්චයෙන පච්චයො. (මූලං කාතබ්බං.) පුරිමා පුරිමා විචිකිච්ඡාසහගතා ඛන්ධා ච මොහො ච පච්ඡිමස්ස පච්ඡිමස්ස විචිකිච්ඡාසහගතස්ස මොහස්ස අනන්තරපච්චයෙන පච්චයො; විචිකිච්ඡාසහගතා ඛන්ධා ච මොහො ච වුට්ඨානස්ස අනන්තරපච්චයෙන පච්චයො. (මූලං කාතබ්බං.) පුරිමා පුරිමා විචිකිච්ඡාසහගතා ඛන්ධා ච මොහො ච පච්ඡිමානං පච්ඡිමානං විචිකිච්ඡාසහගතානං ඛන්ධානං මොහස්ස ච අනන්තරපච්චයෙන පච්චයො. (3)

සමනන්තරපච්චයෙන පච්චයො… නව… සහජාතපච්චයෙන පච්චයො… නව… අඤ්ඤමඤ්ඤපච්චයෙන පච්චයො… ඡ… නිස්සයපච්චයෙන පච්චයො… නව.

උපනිස්සයපච්චයො

78. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – දස්සනෙන පහාතබ්බහෙතුකා ඛන්ධා දස්සනෙන පහාතබ්බහෙතුකානං ඛන්ධානං උපනිස්සයපච්චයෙන පච්චයො. (අවසෙසෙසු ද්වීසු අනන්තරූපනිස්සයො, පකතූපනිස්සයො.) (මූලං කාතබ්බං.) දස්සනෙන පහාතබ්බහෙතුකා ඛන්ධා නදස්සනෙන පහාතබ්බහෙතුකානං ඛන්ධානං මොහස්ස ච උපනිස්සයපච්චයෙන පච්චයො. (මූලං කාතබ්බං.) දස්සනෙන පහාතබ්බහෙතුකා ඛන්ධා විචිකිච්ඡාසහගතානං ඛන්ධානං මොහස්ස ච උපනිස්සයපච්චයෙන පච්චයො. (3)

79. නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දානං දෙති…පෙ… සමාපත්තිං උප්පාදෙති මානං ජප්පෙති; සීලං …පෙ… පඤ්ඤං… නදස්සනෙන පහාතබ්බහෙතුකං රාගං… දොසං… මොහං… මානං… පත්ථනං… කායිකං සුඛං… කායිකං දුක්ඛං… උතුං… භොජනං… සෙනාසනං උපනිස්සාය දානං දෙති…පෙ… සමාපත්තිං උප්පාදෙති; සද්ධා…පෙ… සෙනාසනං සද්ධාය…පෙ… පඤ්ඤාය නදස්සනෙන පහාතබ්බහෙතුකස්ස රාගස්ස…පෙ… පත්ථනාය ඵලසමාපත්තියා උපනිස්සයපච්චයෙන පච්චයො. (1)

නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දිට්ඨිං ගණ්හාති; සීලං…පෙ… පඤ්ඤං… නදස්සනෙන පහාතබ්බහෙතුකං රාගං… දොසං… මොහං… මානං… පත්ථනං… කායිකං සුඛං… කායිකං දුක්ඛං… උතුං… භොජනං… සෙනාසනං උපනිස්සාය පාණං හනති…පෙ… සඞ්ඝං භින්දති; සද්ධා…පෙ… සෙනාසනං දස්සනෙන පහාතබ්බහෙතුකස්ස රාගස්ස… දොසස්ස… මොහස්ස… දිට්ඨියා… පත්ථනාය උපනිස්සයපච්චයෙන පච්චයො. (2)

නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ච නදස්සනෙන පහාතබ්බහෙතුකස්ස ච ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධා…පෙ… පඤ්ඤා, නදස්සනෙන පහාතබ්බහෙතුකො රාගො… දොසො… මොහො… මානො… පත්ථනා… කායිකං සුඛං…පෙ… සෙනාසනං, විචිකිච්ඡාසහගතානං ඛන්ධානං මොහස්ස ච උපනිස්සයපච්චයෙන පච්චයො. (3)

80. දස්සනෙන පහාතබ්බහෙතුකො ච නදස්සනෙන පහාතබ්බහෙතුකො ච ධම්මා දස්සනෙන පහාතබ්බහෙතුකස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – විචිකිච්ඡාසහගතා ඛන්ධා ච මොහො ච දස්සනෙන පහාතබ්බහෙතුකානං ඛන්ධානං උපනිස්සයපච්චයෙන පච්චයො. (මූලං කාතබ්බං.) විචිකිච්ඡාසහගතා ඛන්ධා ච මොහො ච නදස්සනෙන පහාතබ්බහෙතුකානං ඛන්ධානං මොහස්ස ච උපනිස්සයපච්චයෙන පච්චයො. (මූලං කාතබ්බං.) විචිකිච්ඡාසහගතා ඛන්ධා ච මොහො ච විචිකිච්ඡාසහගතානං ඛන්ධානං මොහස්ස ච උපනිස්සයපච්චයෙන පච්චයො. (3)

පුරෙජාතපච්චයො

81. නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… විපස්සති, අස්සාදෙති අභිනන්දති, තං ආරබ්භ නදස්සනෙන පහාතබ්බහෙතුකො රාගො උප්පජ්ජති, උද්ධච්චං උප්පජ්ජති, නදස්සනෙන පහාතබ්බහෙතුකං දොමනස්සං උප්පජ්ජති; දිබ්බෙන…පෙ…. (සංඛිත්තං. වත්ථුපුරෙජාතං සංඛිත්තං.) (1)

නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අස්සාදෙති අභිනන්දති, තං ආරබ්භ දස්සනෙන පහාතබ්බහෙතුකො රාගො උප්පජ්ජති, දිට්ඨි…පෙ… විචිකිච්ඡා…පෙ… දස්සනෙන පහාතබ්බහෙතුකං දොමනස්සං උප්පජ්ජති. (වත්ථුපුරෙජාතං සංඛිත්තං.) (2)

නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ච නදස්සනෙන පහාතබ්බහෙතුකස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං ආරබ්භ විචිකිච්ඡාසහගතා ඛන්ධා ච මොහො ච උප්පජ්ජන්ති. (වත්ථුපුරෙජාතං සංඛිත්තං.) (3)

පච්ඡාජාතාසෙවනපච්චයා

82. දස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස පච්ඡාජාතපච්චයෙන පච්චයො (සංඛිත්තං). නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස පච්ඡාජාතපච්චයෙන පච්චයො (සංඛිත්තං). දස්සනෙන පහාතබ්බහෙතුකො ච නදස්සනෙන පහාතබ්බහෙතුකො ච ධම්මා නදස්සනෙන පහාතබ්බහෙතුකස්ස ධම්මස්ස පච්ඡාජාතපච්චයෙන පච්චයො (සංඛිත්තං)… ආසෙවනපච්චයෙන පච්චයො.

කම්මපච්චයාදි

83. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස කම්මපච්චයෙන පච්චයො – දස්සනෙන පහාතබ්බහෙතුකා චෙතනා සම්පයුත්තකානං ඛන්ධානං කම්මපච්චයෙන පච්චයො. (මූලං කාතබ්බං.) සහජාතා, නානාක්ඛණිකා. සහජාතා – දස්සනෙන පහාතබ්බහෙතුකා චෙතනා චිත්තසමුට්ඨානානං රූපානං කම්මපච්චයෙන පච්චයො. නානාක්ඛණිකා – දස්සනෙන පහාතබ්බහෙතුකා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ච නදස්සනෙන පහාතබ්බහෙතුකස්ස ච ධම්මස්ස කම්මපච්චයෙන පච්චයො – දස්සනෙන පහාතබ්බහෙතුකා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. (3)

නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නදස්සනෙන පහාතබ්බහෙතුකා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – නදස්සනෙන පහාතබ්බහෙතුකා චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (1)

විපාකපච්චයෙන පච්චයො… ආහාරපච්චයෙන පච්චයො… ඉන්ද්‍රියපච්චයෙන පච්චයො… ඣානපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චයො… ඡ… විප්පයුත්තපච්චයෙන පච්චයො… පඤ්ච.

අත්ථිපච්චයාදි

84. දස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස අත්ථිපච්චයෙන පච්චයො… තීණි.

නදස්සනෙන පහාතබ්බහෙතුකො ධම්මො නදස්සනෙන පහාතබ්බහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං (සංඛිත්තං). නදස්සනෙන පහාතබ්බහෙතුකො ධම්මො දස්සනෙන පහාතබ්බහෙතුකස්ස ච නදස්සනෙන පහාතබ්බහෙතුකස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං (සංඛිත්තං). (3)

85. දස්සනෙන පහාතබ්බහෙතුකො ච නදස්සනෙන පහාතබ්බහෙතුකො ච ධම්මා දස්සනෙන පහාතබ්බහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – දස්සනෙන පහාතබ්බහෙතුකො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ… විචිකිච්ඡාසහගතො එකො ඛන්ධො ච මොහො ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. දස්සනෙන පහාතබ්බහෙතුකො ච නදස්සනෙන පහාතබ්බහෙතුකො ච ධම්මා නදස්සනෙන පහාතබ්බහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). දස්සනෙන පහාතබ්බහෙතුකො ච නදස්සනෙන පහාතබ්බහෙතුකො ච ධම්මා දස්සනෙන පහාතබ්බහෙතුකස්ස ච නදස්සනෙන පහාතබ්බහෙතුකස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං (සංඛිත්තං). (3)

නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.